2 Timote 2
2
Kankəm njerɔ lə Jeju Kristi
1Ŋgonəm, i kara wa rɔi kɔgərɔ gə goo noji gə́ Jeju Kristi wa səi lé. 2Né gə́ oo tam’g no̰ dəwje gə́ njékootaje bula lé ndá ɔm taree ta diŋgamje gə́ to majikojije gə́ d’askəm ndoo mar deeje togə́bè tɔ.
3Ula rɔi ndubu səm na̰’d asəna gə njerɔ lə Jeju Kristi gə́ maji ya. 4Ɓó lé dəw aw gə́ loo rɔ’g ndá yeḛ a jɔg rəa gə mba néje gə́ yeḛ ya̰ gogo el ŋga, yen ɓa yeḛ a taa kəm yeḛ gə́ njekila gée’g ɓəi. 5Yeḛ gə́ uba mula gə maree, ɓó lé yeḛ ra lée’g el ndá d’a kula dɔgugu dəa’g el. 6Njendɔ lé ula rəa ndubu loo ndɔ’g ləa kédé ɓa yeḛ ra kée ɓəi. 7Ǝ̰ji goo taje lai gə́ ma m’ulai lé ndá Mbaidɔmbaije a kar kəmi inja dɔ néje’g lai.
8Ar məəi olé dɔ Jeju Kristi yeḛ gə́ ḭ ginka’g lə Dabid ləm, yeḛ unda loo teḛ dan njé gə́ d’wəi’g gə goo tagə́maji gə́ to gə́ kama lé ləm tɔ. 9Yee ɓa, deḛ tɔm ne, d’am m’isi ne dan némeeko̰’g asəna gə njera néje gə́ majel bèe. Nɛ ta lə Ala lé ndá təa el. 10Gelee gə́ nee ɓa, m’wa ne siŋgam kɔgərɔ dɔ néje’g lai mbata lə deḛ gə́ yeḛ mbər dee lé gə mba kar dee-deḛ nja kara d’iŋga kaji gin Jeju Kristi lé na̰’d gə rɔnduba gə́ to gə no̰ lé tɔ. 11Ta neelé to kankəmta ya:
Ɓó lé j’wəi səa ndá j’a si kəmba səa na̰’d tɔ,
12Ɓó lé jeḛ j’ai meḛ sí sam-sam
Ndá j’a si səa na̰’d loo-ko̰ɓee’g ləa tɔ.
Nɛ ɓó lé j’ɔr rɔ sí gelee’g
Ndá yeḛ kara a kɔr rəa rɔ sí’g tɔ .
13Ɓó lé jeḛ n’tel n’to gə́ majikojije el
Ndá yeḛ lé to njemeenda londoŋ njaŋg gə no̰
Ɓó yeḛ askəm tel rəa raŋg el.
Njekula lə Kristi gə́ maji péd-péd lé
14Maji kolé meḛ dee dɔ taje’g neelé, tɔg dee ne no̰ Ala’g mba kar dee d’əw rɔ dee maḭ na̰ ta dɔ tapa dee’g, mbata maḭta gə́ togə́bè to gə́ né el nɛ yee tuji dee gə́ d’oo taree gə mbi dee. 15Un rɔi ɓidi mba kar Ala ooi gə́ njekula gə́ maji péd-péd gə́ ra kəmkul el ləm, gə́ ɔr goo kankəmta gə goo rəbee sur ləm tɔ. 16Maji kari uba ta gə́ gə mḭdé ba ləm, gə ta gə́ kori-kori ləm tɔ ya̰ mbata deḛ gə́ njépa taje gə́ togə́bè lé d’a kɔs ne Ala rəw kəm dee gə́ kédé-kédé ləm, 17ta lə dee lé a yɔlé gə́ kédé-kédé asəna gə bairaŋ-boo ləm tɔ. Yee ɓa gə́ néra Imene gə Pilɛtə. 18Deḛ lé d’uba kankəmta d’ya̰ d’ula dəwje pana: Kàr kar dəwje teḛ dɔkumbwa’g lé teḛ mba̰. Yee ɓa d’unda ne meekun lə njé gə́ na̰je naŋg rə̰dəŋ-rə̰dəŋ. 19Nɛ ta gə́ Ala tum ginee lé kiriŋ naŋg kiriŋ-kiriŋ. Tor jia ɓa to ta nee gə́ deḛ ndaŋg kédé lé pana: Mbaidɔmbaije gər dee gə́ to kea̰je gao. Tɔɓəi pa ya ɓəi pana: Maji kar nana ɓa gə́ ɓar ri Mbaidɔmbaije ndá unda rəa ɓad dɔ néje gə́ ndɔji pɔdɔdɔ’g .
20Mee kəi gə́ boo lé jo larlɔr ləm, gə jo hand ləm tɔ ɓa to keneŋ goo kára el, nɛ ka̰ kag gə ka̰ a̰ji to keneŋ tɔ, deḛ gə́ kédé lé d’wɔji ne dɔ mbai-kula, deḛ gə́ raŋg lé d’wɔji ne dɔ néje gə́ gə mḭdé-mḭdé ba. 21Bèe ndá ɓó lé dəw kára aa dɔ rəa kər-kər ləm, sa rəa rəw dɔ né gə́ mina̰’g ləm tɔ ndá yeḛ a to asəna gə jo ra mbai-kula gə́ d’unda gə kəmee doi ləm, yeḛ a to gel néra kula lə ɓéeje gə́ yeḛ a kaskəm ra ne kula gə́ maji gə́ rara kara gə lée-lée ləm tɔ.
22Sa rɔi rəw dɔ mal néje gə́ ra basaje ndá tel ndolè goo meekarabasur ləm, gə meekun ləm, gə meenoji ləma, gə meelɔm ləm tɔ, ɔm ne na̰’d gə deḛ gə́ ɓar ri Mbaidɔmbaije gə meenda kɔr jol-jol. 23Ta dəji mbə gə́ gə mḭdé ba lé ɔs rəw gə́ raŋg mbata i gər gao ta dəji gə́ togə́bè ɓa oji kɔl ya. 24Tɔgərɔ ya, kura lə Mbaidɔmbaije a to gə́ njḛgər ginta el, nɛ yeḛ a kwa noji gə dəwje lai ləm, a kaskəm ndoo dee né ləma, a to njemeekila ləm tɔ. 25Deḛ gə́ d’oma̰ səa kara yeḛ a gɔl dee gə ndu noji ya mba kar Ala ar dee d’un ne kəm dee rəw dɔ kaiya’g lə dee mba kar kəm dee inja dɔ kankəmta’g tɔ. 26Yen ɓa gum lə njekurai gə́ yeḛ uba dee naŋg bus kiri dee dɔ na̰’d mba kar dee ra né gə́ mée wɔji lé d’a teḛ sɔd ne rɔ dee danee’g.
Currently Selected:
2 Timote 2: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
