1 Njé gə́ Kɔrḭtə 3
3
Kula gə́ wɔji dɔ kuraje lə Ala lé
1Ŋgakɔmje, ta gə́ kəm kula dəwje gə́ gər ndaa Ndil lé m’askəm kula sí el mbata m’oo sí gə́ dəwje gə́ ka̰ darɔ ba, seḭ toje asəna gə ŋganje gə́ kas gin Kristi’g. 2Mbà ɓa m’ar sí ɓəi ɓó muru gə́ kədərə gəw-gəw el mbata a kwa sí ɓəi. Saar ɓasinè kara wa sí ya ɓəi mbata néra sí wɔji dɔ darɔ ɓəi . 3Tɔgərɔ ya, kəmkəḭ gə ta tḭ-na̰ to mbuna sí’g lé ndá see néra sí wɔji dɔ darɔ el wa. See panjaa sí to gə́ panjaa dəwje gə́ kari ba ɓəi el wa. 4Loo gə́ dəw gə́ na̰ pana: Neḛ n’to gə́ ka̰ Pool. Dəw gə́ na̰ pana: Neḛ n’to ka̰ Apolɔs. Ŋga see seḭ toje gə́ dəwje el wa .
5See Apolɔs ɓa gə́ na̰ ɓəi wa. Esé see Pool ɓa gə́ na̰ ɓəi wa. Deḛ joo bɔr to kuraje lə Mbaidɔmbaije gə goo rəw gə́ yeḛ nja ɔr dee ne. Mbɔl dɔ dee-deḛ nja ɓa seḭ ɔmje ne meḛ sí dəa’g. 6Ma ɓa gə́ njedubu né ndá Apolɔs to gə́ njesaa mán dɔ’g tɔ, né Ala ɓa gə́ njekaree teḛ mbi gə teḛ boo . 7Bèe ndá dəw gə́ njedubu né to gə́ njea el ləm, dəw gə́ njesaa mán dɔ’g kara to gə́ njea el ləm tɔ. Nɛ Ala gə́ njekaree teḛ mbi gə teḛ boo lé ɓa to gə́ njeaje. 8Yeḛ gə́ njedubu né əsé yeḛ gə́ njesaa mán dɔ’g kara d’asəna joo bɔr, nana kara a kiŋga dɔ jia gə́ wɔji dɔ kula rəa-rəa. 9Mbata jeḛ lé n’to njéboakulaje lə Ala lé. Seḭ toje ndɔ lə Ala ləm, seḭ toje kəi ra Ala ləm tɔ.
10Mbɔl dɔ noji gə́ Ala wa səm ɓa ma m’tum ne gin kəi asəna gə gɔŋgé-tum-gin-kəi ɓa dəw gə́ raŋg rɔd maree dɔ’g ɓəi. Nɛ maji kar nana kara tɔs kəmee dɔ kəi gə́ rɔd dɔ maree’g tar. 11Mbata gin kəi gə́ gəd gə́ deḛ tum lé to Jeju Kristi ɓó dəw kára kara askəm tum gin kəi gə́ raŋg el. 12Bèe ndá ɓó lé dəw unda kəi dɔ ginee’g neelé nɛ ra kəi gə larlɔr əsé larnda, əsé mbalje gə́ gad dee dum ndogo, əsé kag əsé ləm mu, əsé mu gə́ ŋgal pɔ-pɔ ndá nana kara kula rəa a nduba rəa gə́ raga. 13Mbata ndəa neelé gin kula ra dee a kinja gə́ raga wagəsa dan pər’g mbata pər a naa kula ra nana kara mba koo see to kula gə́ ban wa. 14Ɓó lé kula ra dəw kára gə́ yeḛ rɔd dɔ kəi gə́ tum ginee lé to njaŋg ndá a kiŋga dɔ jia ya. 15Lée pər o̰ kula ra dəw neelé ndá nai njḛ, darəa ɓa a kaji ya nɛ d’a kée asəna gə dəw gə́ teḛ kəm pər’g pəd-pəd bèe. 16Seḭ toje kəi-Ala, Ndil Ala si meḛ sí’g tɔ. See seḭ gərje bèe el wa . 17Ɓó lé dəw tuji kəi-Ala ndá Ala kara a tujee nja tɔ, mbata kəi-Ala lé to kəi gə́ d’unda gə kəmee ləm, seḭje kara seḭ toje kəi-Ala ya ləm tɔ.
18Maji kar nana kara əsta dɔ rəa’g el. Ɓó lé dəw kára ə̰ji ta mée’g pana: Neḛ n’to gə́ njekəmkàr gə goo kəmkàr lə dəwje gə́ dɔ naŋg nee ɓasinè ndá maji kar njea tel mbə ɓa gə mba tel njekəmkàr gə́ gəd ɓəi. 19Mbata kəmkàr gə́ dɔ naŋg nee to gə́ némbə kəm Ala’g lé to gə́ ndaŋg taree mee maktub’g pana:
Yeḛ wa ta njékəmkàrje dɔ goso’g lə dee .
20Tɔɓəi deḛ pa taree loo gə́ raŋg’g pana:
Mbaidɔmbaije gər takə̰ji lə njékəmkàrje gao,
Oo to gə́ to ta gə́ mḭdé ba .
21Maji kar dəw kára kara ti rəa dɔ dəwje’g el mbata néje lai to gə́ ka̰ sí ya: 22lé Pool əsé Apolɔs əsé Képas, əsé naŋg nee, əsé kisi gə kəmə, əsé kwəi əsé néje gə́ to gən, əsé néje gə́ d’a gə ree. 23Néje lai to gə́ ka̰ sí ləm, seḭ toje ka̰ Kristi ləma, Kristi kara to gə́ ka̰ Ala ləm tɔ.
Currently Selected:
1 Njé gə́ Kɔrḭtə 3: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.