(Evangelio según San Marcos) 5
5
Gadaranmaya aents wakan pegkegchau chimpimtuamun Jesús jiijamu
(Mt. 8.28-34; Lc. 8.26-39)
1Kuchá amain katigkajui gadaranmaya batsamtai nugkeen. 2Nunik Jesús barcanmaya jiinaig, ukumatainmaya aents wakan pegkegchau egkemtugbau tajuauwai. 3Nunú aentsuk ukumatainum pujú, makichkish cadenayaikish jigkamainchau. 4Kuashtá cadenayai uwejin jigkajá, dawenum jigkajá awajkamash tsujiag utsau, imaniau asa makichkish depetmainchau. 5Nuniak tuke kashi tsawaishkam mujanum, ukumatainmash wekaegas untsumá wekagu, nuigtush kayai ijumak tsupimag wekagu. 6Nuniau Jesusan atushat wainmawaik, tupikatki jegantun tikishmatjau. 7Nunik senchi untsumak:
—¡Jesusah, Apajuí ashí tikich aidau nagkaesau muunta nuna uchijiyah! ¿Wagka amesh minaish miname? Apajuí daajin segajame, ¡wait aneasam waitkagkagtusaipa!, tau.
8Nunak Jesús:
—Wakan pegkegchauwah, aents jiinkim ukuktá, tibau asa tiuwai.
9Tutai Jesús iniak:
—¿Amesh yaitpa?, tau.
Tama ni aiimak:
—Wika Untsujiyaitjai, wagki jutiik kuashat asaja, tiuwai.
10Nuna tii senchi segau Jesusan tikich nugkanum aweti tusa. 11Mujanum tikiju kuashat kuchi dupaan yuwinak yujau asamtai, 12ashí wakan pegkegchau aidau Jesusan segainak:
—Kuchi batsata awi awekagtita, kuchinum wayawagmi, tuidau.
13Tutai Jesuschakam nuniktinme tusa idaisauwai. Dutikam wakan pegkegchau aidaushkam jiinjag, dos mil kuchi tumain batsatunum utsanawajui. Dutikawajam kuchishkam pisajag betsag tajagak kuchanum najataunum utsanawag jinawajui.
14Nunikagmatai kuchí kuitamin aidaushkam pisajaju, nunikag yaaktanum jegawag etsejuinak, ajanum batsataidaunash dutiksag ujakajam, aents aidaushkam nu nunikbaun diisagtatus shimutkaju. 15Nunik Jesús pujamunum jegakmag, wakan pegkegchau untsují chimpimtuamu aajakushkam pegkeg wajas, jaanchin nugkujá eketun wainkag, senchi ishamkajui. 16Nuna wainkau aidau tikich aidaunashkam ujaidau, aents iwanch chimpimtuamu tsagajun nuigtú kuchi jinaamun pachisashkam. 17Tiagtai Jesusan segajui, ditá nugkenak ukuak, yajá weti tusag.
18Jesús waketak barcanum egkemtai, iwanch egkemtuamu aajakushkam niijai wetatus segauwai. 19Tujash Jesusak nunikta tichauwai, ayatak:
—Jeemin wetá pataim batsatbaunum, nunikam shiig kuashat Apu Apajuí amina wajuk wait anenjamjae nunú pachisam ashí ujaktá, tiuwai.
20Tima weuwai, nunik Decápolis jegaa Jesús niina shiig kuashat wait anenja nu pachisa etsegtan nagkabau. Nunitai ashí aents aidauk anentai jegachaju.
Jairo nawanji nuigtú nuwa Jesusa jaanchjin antigkua nu
(Mt. 9.18-26; Lc. 8.40-56)
21Jesús barcanum egkemag ataktú kuchá amain katigmatai, kuashat aents aidau tuwagkaju; dutikam nigka nuig kuchá tugkitkenig juwakui. 22Nuniai jega ijuntaiya nuna apuji aina nuiya makichik Jairo daagtin Jesusan wainak jegantun tikishmatjau; 23nunik senchi segau: —Mina nawantug ashí jakaun ukukmajai; ame taam uwegmin achigtukta, dutikam tsagag pujustí, tusa.
24Tama Jesús niijai wegau, nuniai kuashat aents saetuidau asag senchi chanuidau. 25Nu imatikainamunum nuwa doce mijadai numpan puwak waitú pujú asa, 26kuashat ampijatin aidaunum wekaegas ampimak ashí ni ajamuchijinak ashimkush, tsagautsuk nuní nagkaemas waitú wekayin, 27Jesús pachisa chichainamun antuk, aents tuwakbaunum eteenki, ukujin pataetuk Jesusa jaanchjin antinkauwai. 28Wagki ni anentaimsag: “Imá jaanchjinakesh antiaknuk tsagagtatjapi”, tau asa. 29Nuniamuik numpa puwamujinak megkaekau, tuja ashí iyashin jaamujinash pegkeg weamujin dekapjauwai. 30Nuniaig Jesuschakam niina senchijí jiinun dekapeg, aents minidaun ayampatua:
—¿Yaa jaanchjuish antinkae?, tau.
31Tutai niina jintintaiji aidau ayaak:
—Kuashat aents chanumpaina nu wainiatkumek, ¿ya antinkae tame?, tuidau.
32Tujash Jesusak ashí diyau, yaki antinkame tusa wainkatatus. 33Nunitai nuwak ishamak kujaukmaikia, ni wajukae nuna dekau asa, jegantun niina eemtin tikishmag, dekaskenum ashí ni waitiamujinak ujakú. 34Tusá ujaam:
—Nawantah, ame dekaskeapi tabaugmia nu etsaentamjae, shiig agkan anentaimsam wetá, yamaik jaamugmik tsagajume, tiuwai.
35Tusa eke chichaak wajai, apu Jairo jeen batsatu kaunawag ujainak:
—Nawanjumek jakame ¿utugkatasamea Maestrosh waitkame?, tuidau.
36Tujash Jesusak nu tuinamun antuk, jega ijuntain apujiya nuna chichajak:
—Ishamkaipa, ayatak dekaskeapi tita, tiuwai.
37Nuna tii makichik aentskesh uyuntusainmegka tusa Pedro, Jacobo ni yachi Juan aatus weajui. 38Nunik apú jeen jegakmá aents pampainak, untsu untsumas butuidaun wainkauwai. 39Nunik wayá:
—¿Wagka pampakjumesh buutush batsatjume? Nuwauchik jakache kanag tepawai, tiuwai.
40Tutai dushikidau. Tujash nigka ashí aents nui batsatunak jiijá, nuwauchi apají, dukují nuigtú ni jintintaiji uyunaina nujai utsanawajui nuwauch jaka tepamunum. 41Nunik uwegnum achik:
—¡Talitá cum!,#5.41 “Talitá cum”, tawa duka arameo chichamai, texto griegonmag aatus tau asamtai dutiksaik jui inagkeakji. tiuwai. Nunak: “Nuwauchih, amina tajame, nantaktá”, taku tiuwai.
42Tamawaik nuwauchik nantakiu nunik wekagu, duka doce mijan ajau. Nuna dutikamtai aents aidauk senchi ishamkajui. 43Tujash Jesusak makichkish etsegkaigpajum tusa shiig akatjag idaiyak, nuwauch yumain susatajum yuwati, tiuwai.
Currently Selected:
(Evangelio según San Marcos) 5: AGR
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.