(Evangelio según San Marcos) 1

Juan Yamijatin uwegshunum chichagkagtukbau

(Mt. 3.1-12; Lc. 3.1-20; Jn. 1.19-28)

1Jesucristo Apajuí uchijiya nu pachisa yamajam chicham etsegbauwa nu nagkamnamu. 2Profeta Isaías agagbaunum:

“ ‘Wi mina chichamjun etsegnun emtikan awemajai,

ni jintanak umigtamkati tusan’.

3‘Makichik chicham uwegshunum untsubau antuewai’:

‘Apu minitin jinta iwajatajum, jinta tutupit dakuektajum, tibauwa nu uminkauwai’ ”.

4Aatus asamtai Juagshakam uwegshunum aentsun yamiau, nuniak etseju tudau idaiyinak yamimajag tudau aidaun tsagkugnagtinme tusa. 5Nuna antukag ashí yaakat Judea nugkanmaya aidauk, ashí Jerusalegnumia aidaushkam kautuidau. Nunikag ditá tudaujin etsegtumagtai Juagshakam Jordagnum yamiau.

6Juagká nugkutaijig camello uje najanamu, akachumtaijish duwap aajakui, tuja langostan#1.6 “Langostak yutai aajakui, manchi katsajait tutaya numamtin”. nuigtú dapá yumijin yuujakui. 7Juan aents aidaun chichajak: “Mina ukujui minittawai dekas mina nagkaetasu senchigtin. Wika nuna sapatjinak tsuntsumtuankesh jigkatuamunak atitmaitsujai niiya imanchau asan. 8Wika ayatak yumiik yamigmajime, tujash nigka Wakaní Pegkejiya dui yamigmagtatjume”, tau.

Jesús yamimagbau

(Mt. 3.13-17; Lc. 3.21-22)

9Nunú tsawantai Jesús Nazaret, Galilea nugkanum awa nuiya jiinki jegauwai, nunikmatai Juan Jordagnum yamijui. 10Dutikam yuminmaya jinkamá, Jesús wainkauwai nayaim ujanmatai, Wakaní Pegkeji pauma nunin niiní akaetatman. 11Nuniai nayaimpinmaya chicham antuekau: “Ametme mina uchig aneetaigmek, dui aminig shiig aneajai”, tabau.

Iwanch Jesusan pegkegchaunum dekapsamu

(Mt. 4.1-11; Lc. 4.1-13)

12Juna timatai Wakaní Pegkeji uwegshunum emauwai. 13Nui cuarenta tsawan pujusui, nunittaman Iwanch pegkegchaunum dekapsauwai. Kuntin kajen aidau batsatbaunum pujau; tuja ángel aina nu Jesusnak kuitamaidau.

Jesús Galileanum ni takatji nagkamamu

(Mt. 4.12-17; Lc. 4.14-15)

14Juagkan achikag egkeawaju ai, Jesús Galilea weuwai yamajam chicham Apajuinua nuna etsegkatatus. 15Nuniak: “Tsawantak yamaik uminkae, Apajuí inamjatnuk tikijuch wajasé; tudau idaikujum, yamajam chichama ju dekaskeapi titajum”, tiuwai.

Jesús ni jintintaiji atinun cuatro namaká main aidaun yajuakbau

(Mt. 4.18-22; Lc. 5.1-11)

16Jesús Galilea kuchají yantamen wekamá Simogkan, ni yachi Andresjai namakan main asag retan ajuntuinak yujattaman wainkau, 17nunik Jesús:

—Minitajum wi jintintuatjime, namak maatasajum yujagjum anmamtuk, Apajuí chichame etsegkujum aents aidau minai ikautjin atajum tusan, tau.

18Tamawaik ditá redjinak ukuinak niijai weajui.

19Nuwi nagkaemaki machik kuwaesag wekamá, Zebedeo uchijí Jacobo ni yachi Juagjai, barcajin chimpimas redjin apijuinak chimpimtatman wainkauwai. 20Dutika nunashkam:

—Weajai, mina jintintaig atajum, tiu. Tama ditashkam apají Zebedeonak ditajai takau aidaunak barcanum ukuinak Jesusjai weajui.

Aents wakan pegkegchau egkemtugbaun Jesús etsagagbau

(Lc. 4.31-37)

21Capernaúm jegawajui, nunik tsawan ayamtai tsawagmatai Jesús jega ijuntainum wayá jintinkagtau. 22Nunitai aents aidauk ni jintinkagtamujin puyatjuk diidau, wagki maestro chicham umiktinun jintinkagtin aidaun nagkaegas, apu chichame antugtai jintimaina imatika jintinkagtau asamtai. 23Nuniamunum jega ijuntaiya nui, makichik aents wakan pegkegchau egkemtuamu eketu untsumak:

24—¡Jesús nazaretnumiayah! ¿Wagka amesh jutii pujamunmash miname, ijijatuatasamek minam? Wika ame yaitpa nunak dekagme, amek pegkejam Apajuinuitme, tiuwai.

25Tama Jesús wakan pegkegchaun jiyaak:

—¡Takamtak jiinkim ju aentsuk ukuktá!, tiuwai.

26Tamawaik wakan pegkegchaushkam aentsun waugmitkak nugká ajiajui, dutika shiig senchi untsumak jiinki ukukiuwai. 27Nunikmatai ashí ishamkag, ditak pempeentunikiag:

—¿Jusha yaita? ¿Jintiamujish yamagmajama, wajuku asaya chichamesh senchigtinaita wakan pegkegchau aidaush antujuina dusha?, tudayinau.

28Nunú nunikbaunak wamak ashí galileanmaya aidauk dekawajui.

Pedro tsatsají Jesús etsagagbau

(Mt. 8.14-15; Lc. 4.38-39)

29Nunik Jesusak jega ijuntainmaya jiinki Jacobojai nuigtú Juagjai, Simón nuigtú Andresa jeega nui weajui. 30Simogka tsatsajig tsuweak pegakjin tepau, nunitai Jesusan ujakajui. 31Tima Jesuschakam jegantun uwegnum achik inankiuwai; dutikamuik tsuweamunak megkaegak, Jesusan yutain umijuk ajamsauwai.

Kuashat jau aidau etsagakbau

(Mt. 8.16-17; Lc. 4.40-41)

32Kintamai, etsa akaikiu ai, ashí aents jau aidaun nuigtú iwanch egkemtuamu aidaunashkam Jesusan ikautkaju; 33tuja ashí aents nui batsamin aidauk waitinmag tuwakaju. 34Nunikagmatai Jesús kuashat aents ashí tikich jatai jau aidaun etsagakui, kuashat iwanch aidaunashkam jiijui; tujash iwanch aidaunak chichaktí tusag idaichau, wainainamu asa.

Jesús Galileanum chichagkagtukbau

(Mt. 4.23-25; Lc. 4.42-44)

35Tsawak eke suwe aig nantakí, jiinki aents atsamunum weuwai, nunik nui Apajuí auju. 36Nunikmatai Simón ni kumpají aidaujai egaak weajui; 37nunik Jesusan wainkag:

—Ashí aents egapainawai, tuidau.

38Tusa tama ni chichaak:

—Wemí yaakat tikiju anem aina nui, awishkam chichaman etsegkatjai; wika nuna nuniktasan tauwaitjai, tau.

39Nunik Jesusak ashí Galileanum makí makichik yaaktanum jega ijuntai aidaunum chichagkagtak, iwanch aidaunashkam jiijá ishimu.

Aents lepragtinun Jesús etsagagbau

(Mt. 8.1-4; Lc. 5.12-16)

40Makichik aents lepra achikbau Jesusa jegantun tikishmag pujus:

—Wakegakmek etsaentumainaitme, tau.

41Tama Jesuschakam wait anentug uwejin antiak:

—Wakegajai, pegkeg wajastá, tiuwai.

42Tusa taig leprak megkaekauwai, nunikmatai pegkeg wajasui. 43Tujash Jesús nuna shiig akateg ukuak:

44—Nijah, makichik aentskesh ujakaipa; ayatak weme sacerdote wantintukta, nuniakum ofrenda jukita Moisés tibauwa dutiksamek, ame pegkeg wajasum nuna ditash waipaktinme, tiuwai.

45Tujash nigka jiinki weak makichkish uutsuk ni tsagagbaujinak etse etsegkawa weuwai. Dutikau asamtai, Jesusak wantinak yaaktanmash waimainchau wajasú asa, aents atsamunum wekagu; nuniaig ashí yantamnumia aidau niina wainkatatus minituidau.

Currently Selected:

(Evangelio según San Marcos) 1: AGR

Highlight

Copy