(Evangelio según San Lucas) 7
7
Jesús Capernaumnumia capitani inaken etsagagbau
(Mt. 8.5-13; Jn. 4.43-54)
1Jesús aents aidau jintinbaun ashimak Capernaúm weuwai. 2Nui makichik capitán pujau, nuna inake aneetaijiya nu jau, nuniak jakattak tepau. 3Nunitai Capitán Jesús pachisa chichaamun antuk, ujumak judío apuji aidaun awetiuwai, mina inakjun taa etsaentujati, timae titajum tusa. 4Tima Jesusan jegajiag ujakaju, nuninak:
—Au capitanik dekas wait aneasam yaimainaitme; 5nigka judío aidautinash anejatnuwe, nuniau asa jega ijuntainash jegamjutpakmayi, tuidau.
6Tiagtai Jesuschakam ditajai weuwai. Tujash jegá tikiju wajasá weenai, capitán#7.6 Diistá Mt. 8.8. ujumak niina kumpají aidaun ishitkauwai, dutikak: “Apu kajegtukaigka, wika niiya ibau, mina jegajui utuamak amaitsujai; 7nuniau asan wika niinakesh adijmaitsujai, tujash tsagagti tujutti, tamak mina inakjush tsagagtatui; 8wagki wikishkam apu umigbau ajutui, antsag suntag mina umigtuidaush ajutuinawai, nunú aina nuiyan wi: Wetá, tamak wegawai: Tikichia nuna: Taata, tamak minawai, aikasnuk mina inakjunash: Ju dutikata, tamak dutikawai”, tujamae tita tiuwai. 9Tusá ujaam Jesús antuk anentai jegagchau, nunik nui aents minidaun ayampattsag:
—Dekas tajime, Israel aina nuiyanakesh imatika dekaskeapi tabauji ajamunak wainkachjai, tau.
10Nunú awemamu aidau waketug jegá jegakmag, inak jau ukukbauk tsagag pegkeg pujaun wainkaju.
Nuwa wajé uchijí jakau Jesús inankimu
11Nu nuniku ai, Jesús yaakat Naín tutainum wegau, nunitai ni jintintai aidau nuigtú kuashat aents aidau saetukaju. 12Nunik yaakta waitijin tikiju wajas wegai, nuwa wajé uchijí makichkiuch ajamu jakamtai ukustatus emaidau, nunitai nuwan uyunainak kuashat aents weedau. 13Nunittaman Apu Jesús nuwan wainak wait anenjau, nunik chichajak:
—Buutipa, tiu.
14Tusa jakau patasá yanakí emamun adijkau, nunik antigku. Dutikamtai yanasá weedaush wajantaju, nunikmatai Jesús chichajak:
—Datsauchih, amina tajame nantaktá, tiu.
15Tama jakaushkam nantakiu, nunik chichatan nagkabau, nunikmatai Jesús dukujin susauwai. 16Dutikamtai ashí aents aidauk ishamkag Apajuin emematuinak: Profeta dekas senchigtin jutiinash wantintugmakji, Apajuí ni aentsji aidautin yaimpaktatus tajutjamaji, tuidau.
17Nu Jesús dutikamuk ashí Judeanmag antuekau, nuigtú tikiju aneem batsatu aidaunmashkam.
Juan Yamijatin ni jintintaiji aidaun chicham dekaatajum tusa ishiakbau
(Mt. 11.2-6)
18Juagká jintintaiji ashí nu wají dutikamu aidaun ujakaju. Dutikam Juagshakam jimag jintintaijin untsuká, 19Apu Jesús pujamunum awemau iniastinme: “¿Amekaitam minitnai tibauwa nu atsa tikichik dakastatag?” tusa. 20Tusá awemajam Jesusan jegajuawag:
—Juan Yamijatna nu amina iniasti tusa awetamaji, nuniak: ¿Amekaitam minitnai tibauwa nu atsa tikichik dakastatag? timae, tuidau.
21Nuna tuinaig aents jau aidaun, tikich jatai waituidaunash, wakan pegkegchau egkemtuamu aidaun, nuigtú kuashat wainmachu aidaunash nimtikiaju. 22Tiagtai Jesús ditan ayaak:
—Wetajum, nunikjum atum wainkaujum ju nuigtú antukujum dushakam Juan ujaktajum: Wainmachush wainmainawai, shutú aidaushkam wekaegainawai, lepragtin aidaush tsagainawai, empekush antuinawai, jakaush nantainawai, tuja ujunauch aidauk yamajam chicham ujaam ainawai; 23nuigtú shiig aneasagtinai minai dekaskeapi tabaujin megkaegainatsu duka, timae tusam ujaktajum, tiuwai.
Juan pachisa Jesús tibau
(Mt. 11.7-15)
24Juan awemamu aidau waketjamtai, Jesús Juagkan pachis aents aidaun iniak: “¿Wají wainkatasagmea uwegshunmash weabiugme? ¿Tagkanan dase umpuau wainkatasagmek weabiujum? 25Nuniachkugmesh ¿wají wainkatasagmea weabiugme? ¿Aents, jaanch shiig pegkejan nugkujá pujau wainkatasagmek weabiujum? Atumek dekagme, nugkutai shiig pegkejan nugkuaju aidauk rey aidau jeen shiig aneenak pujuinawai. 26Tujash ¿wají wainkatasagmea weabiugme? ¿Profetaka? Ehé, dekaske, duka profeta nagkaesau aajakui. 27Juuwai ni pachisa agagbauwa duka:
“ ‘Wi mina chichamjun etsegnun emtikan awemajai,
ni jintanak umigtamkati tusan’, tawa nu.
28“Dekas tajime, ashí aents akiinaina nuiyag Juagká nagkaesauk atsawai, tujash Apajuí inamtainig aents imanchauchia nuuwai niina nagkaesauk.
29“Nunú tabaun antukag ashí aents aidau nuigtú apú kuichkiji atinun ijumin aidaushkam, Apajuí nuniktinme tusa wakega nuna dutiksag umiinak, Juan yamijatbaunum yamimakajui. 30Tujash fariseo aidauk, maestro chicham umiktinun jintinkagtin aidaujai dakitjaju, Apajuí ditan wait anentuinak umiktajum tibauwa nu umitnak, nunidau asag Juan yamijatbaunmash yamimakchajui”.
Juagkan dekaskeapi tichaju aidau
(Mt. 11.16-19)
31“¿Jujú aents aina junash wajijai apatkanua tumainaitja? ¿Wajijai betekai tumainaita? 32Ditak, uchi aidau plazanum pekaamsag kumpajijai untsuninak: ‘Flauta umpuakuish, atumek nantsemachmaugme; wake besemjan kantamkuish, buutchamugme’, tudaiyin aina numamtin ainawai. 33Wagki Juan Yamijatin taa pagnash yuwachu, vinonash umachu nuniakui atum chichagkujum: Iwanch ajamu asa aniawai, tajume. 34Tuja Aentsmaga akiinauwa nu yutainash yuwau, umutainash umakui: Ju aentsua juka yuwa yuwakua wegawai nuigtush vino umú wekaewai, nuniau asa apú kuichkiji ijumin nuigtú tudaugtin aina nuna kumpajiyai, tajume. 35Tujash Apajuí yachajiya nunak, uchijí aina nu pegkegnak iwainawai”.
Jesusan fariseo Simón daagtin ipaamu
36Fariseo aina nuiya yujumkan ajamsatatus Jesusan ipauwai, tima fariseo jeen wayá mesanum jegan ekeemsauwai. 37Nuniai nuwa pujutji pegkegchauwa nu yaaktanum pujau. Nuniau Jesús fariseo jeen yuwak pujawai tabaun dekaa, botella alabastro najanamunum kugkuinun juki tajuntau; 38nunik Jesusa nawen ayaumas pujus buutak nawen negaikiajui, dutika intashinig ujugtuju, nuniak nawen kugkuntak kugkuinui ukatu. 39Dutiktai fariseo Jesusan ipauwa nunú nigki anentaimas: “Jujú aents profetayaitkug, ya antiawa, tuja jusha nuwash wajukuita, pujutji pegkegchauwa nuna dekamainapi”, tau.
40Nunitai Jesús chichaak:
—Simón, makichik wajiin titajame.
Tutai:
—Maestro tujutta, tau.
41Tutai Jesús ayaak:
—Kuichkin tsagkatkagtinun jimag aents diwimaidau, nuniamunum makichkia nu quinientos denario diwimai, tikichia nu cincuenta diwimu; 42nunú akikmamainji atsujiagtai mai tsagkujauwai. Yamai tujutta: ¿Ju jimaja juwiyash tu imá senchish aneemainaita?, tau.
43Tama Simón ayaak:
—Diwijí imá muun tsagkujamua nu imá senchi aneemain diyajai. Tutai: Duka dekas tiume, tau.
44Tusa nuwan ayampatua diis Simogkan chichajak:
—¿Ju nuwa wainmek? Jeemin wayamjai, nunikmataish daweg dijagtinuk yumik sujuschamume; tujash jujú dawejun negaikiag niina intashinig ujugtujae. 45Kumpamjakmesh minak kugkuntsachmaume; tujash ju nuwa juka wayamag dui nagkamas dawegnak kugkunjú pujawai. 46Buukeajuish aceiteyaikish nijatkachmaume; tujash jujú kugkuinui dawejun nijatjuje. 47Nunin asamtai tajame; niina tudauji shiig kuashta duka ashí tsagkugnaje, dutikamu asa imá senchi anentui, tujash aents tudauji ujumak ajamu tsagkujamuk ujumak anentui, tiuwai.
48Nuna tii nuwan chichajak:
—Tudaujum aidauk tsagkugnaje, tiu.
49Tuja mesanum niijai pekajaidauk ditak pempeentunisag chichainak:
—¿Jusha ya asaya tudaunash tsagkugkagtawa?, tudayinau.
50Tuinaig nigka nuwan chichajak:
—Ame dekaskeapi tame nu uwemtijamjae, shiig agkan anentaimsam wetá, tiuwai.
Currently Selected:
(Evangelio según San Lucas) 7: AGR
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.
