(Evangelio según San Lucas) 3
3
Juan Yamijatin uwegshunum chichagkagtukbau
(Mt. 3.1-12; Mr. 1.1-8; Jn. 1.19-28)
1Tiberio César quince mijadai inabaunum, Poncio Pilato gobernador wajas Judeanum inamu, nuniai Herodes Galilea inamu, untsu niina yachi Felipe Iturea nuigtú Traconitenum inamu, nuniai Lisanias Abilinia inamu, 2nuniai Anás, Caifás aatus sumo sacerdote wajas pujuinai, Zacariasa uchijí Juan uwegshunum pujuttaman Apajuí ujakui chichagkagtukti tusa, 3dutikam niishkam Jordagnum tikiju batsataidaunum ashí wekaegas chichagkagtau, tudau idaiyinak yamimajag tudau aidaun tsagkugnagtinme tusa; 4profeta Isaías tibau agagbaunum tawa nunisag, duka:
“Makichik chicham uwegshunum untsubau antuewai:
‘Apu minitin jinta iwajatajum, jinta tutupit dakuektajum’,
5ashí japagau aidaunash nugkan ainjatnai,
nainnashkam yumpuag pakamak betekmaktinai, jinta tunin aidaunash tutupit esekatnai, jinta
japaejau aidaunash ainjatnai, tawai.
6Apajuí uwemtikagtamua nunak ashí aents wainkagtatui”, tawai.
7Kuashat aents aidau Juan yamijati tusag minituidau, nuniagtai chichajak: “¡Iwanchi uchijí aidauwah! ¿Yaa atumnash yamimaku Apajuí suwimkaji tikijuch wajasa nu uwemtumainai tusash tujabiagmae? 8Dekas tudau takatan idaisaush wajuku amainaita nunú iwainmamkatajum, wainka atumek anentaimsajum: Abraham wegantu asaja yupichu uwemain ainaji, tumamigpa; wagki Apajuik jujú kaya aina junakesh Abrahama uchijí emamainai. 9Nuigtush yamaiya juik jachai kagkap tsupitiama dutikatatus Apajuí suwimkeg uminas awai; ashí numi nejenatsu duka tsupika jiinum apeam atatui”.
10Tutai aents aidau iniinak:
—¿Wají dutikmainaitji?, tuidau.
11Tiagtai ni ayaak:
—Jimag nugkumainji ajamuk atsugbaun susati, yumainji ajamushkam dutiksag dutikati, tau.
12Apú kuichkiji atinun ijumin ujumak yamijati tusag kaunawag iniinak:
—Maestroh, ¿jutiish wajukmainaitji?, tuidau.
13Tiagtai Juan ayaak:
—Wajupa akikmakta tibauwaita, nunú uwaekajum akikmakta tiigpa, tau.
14Tutai ujumak suntag aidaushkam iniinak:
—¿Jutiish wajukmainaitji?, tuidau.
Tiagtai:
—Makichkish uwakagmek atankigpajum, tikichish tsanugmek jujukigpa, apujum akigmaina nujaig shiig aneasjum juwaktajum, tau.
15Tuja aents aidauk, dakak batsataidau asag, ditá anentainig, Juagchauwashit Cristo, tuidau; 16tujash Juan ashí ditan chichajak: “Wika dekaskenmag yumí yamijatjai, tujash mina nagkaetasu makichik senchigtin minawai, wika niina sapatji jigkamunakesh atitmaitsujai niiya imanchau asan. Niiyai Wakaní Pegkejiya nujai yamigmagtinuk nuigtush jiiyai yamigmagtina dushakam. 17Nigka trigo awagti wampuji utsanku neje akantayama numamtuk awakatatus uminas awai, dutika ijumtainum trigonak yajumak, wampujinak jii ajumaish kajinkashtina nui apeatnai”, tiuwai.
18Juna aatus tusa nuigtú kuashat tikich chicham aidaujai Juagkak aents aidaunak jintintu yamajam chicham pegkeja nuna. 19Tuja gobernador Herodesan jiyakui, yachi Felipe nuwen Herodiasan juki pujau asamtai, nuigtú ashí pegkegchau dutikamuji aina nuna pachis, 20nu aaja tibau asa nuní nagkaemas pegkegchaun takaak, Juagkan achiká cárcel egkeauwai.
Jesús yamimagbau
(Mt. 3.13-17; Mr. 1.9-11)
21Ashí aents yamimainamunum, Jesuschakam yamimajui, nunik Apajuí aujai nayaim ujaniu; 22nuniai Wakaní Pegkeji pauma nunin wajas paan niiní akaegu, nuniai nayaimpinmaya chicham antuekau:
—Ametme mina uchig aneetaigmek, aminí shiig aneamu ajutui, tabau.
Jesucristo muunji aajakú aidau
(Mt. 1.1-17)
23Jesús takatjin nagkamauwa duka treinta mijan tumain ajujakui, José uchijiyai tujakajua nu,
Josek Elí uchijí aajakui, 24Elik Matata uchijí,
Matat Leví uchijí, Levik Melqui uchijí,
Melquik Jana uchijí, Jana José uchijí,
25José Matatiasa uchijí, Matatías Amosa uchijí,
Amós Nahuma uchijí, Nahúm Eslí uchijí,
Eslí Nagai uchijí, 26Nagai Maata uchijí,
Maat Matatiasa uchijí, Matatías Semeí uchijí,
Semei José uchijí, José Judá uchijí,
27Judá Joana uchijí, Joana Resa uchijí,
Resa Zorobabela uchijí, Zorobabel Salatiela uchijí,
Salatiel Neri uchijí, 28Neri Melqui uchijí,
Melqui Adi uchijí, Adi Cosama uchijí,
Cosam Elmodama uchijí, Elmodam Era uchijí,
29Er Josué uchijí, Josué Eliezera uchijí,
Eliezer Jorima uchijí, Jorim Matata uchijí,
Matat Leví uchijí, 30Leví Simeogka uchijí,
Simeón Judá uchijí, Judá José uchijí,
José Jonagka uchijí, Jonán Eliaquima uchijí,
31Eliaquim Melea uchijí, Melea Mainagka uchijí,
Mainán Matata uchijí, Matat Natagka uchijí,
Natán Davita uchijí, 32David Isaí uchijí,
Isaí Obeta uchijí, Obed Booza uchijí,
Booz Salmogka uchijí, Salmón Naasogka uchijí,
33Naasón Aminadapa uchijí, Aminadab Arama uchijí,
Aram Esroma uchijí; Esrom Faresa uchijí,
Fares Judá uchijí, 34Judá Jacopa uchijí,
Jacob Isaaca uchijí, Isaac Abrahama uchijí,
Abraham Taré uchijí, Taré Nacora uchijí;
35Nacor Serugka uchijí, Serug Ragau uchijí,
Ragau Pelegka uchijí, Peleg Hebera uchijí,
Heber Sala uchijí, 36Sala Cainanka uchijí,
Cainán Arfaxata uchijí, Arfaxad Sema uchijí,
Sem Noé uchijí, Noé Lameka uchijí,
37Lamec Matusalegka uchijí, Matusalén Enoca uchijí,
Enoc Jareta uchijí, Jared Mahalaleela uchijí,
Mahalaleel Cainagka uchijí,
38Cainán Enosa uchijí,
Enós Seta uchijí, Set Adagka uchijí,
Adán Apajuí najanamu.
Currently Selected:
(Evangelio según San Lucas) 3: AGR
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.
