(Evangelio según San Lucas) 10
10
Jesús setenta y dos ishiakbau aidau
1Nuna tii, Apu Jesús tikichnashkam setenta y dos#10.1 Yamajam chicham nagkamku griego chichamai agagbau aina nuwish jimajan tuinawai, tikich 70 tai tikich 72 tawai, nuniau asa apach chicham aina nuwish mai pegkejai. Duwi iina chichamega juig 72 apusamui. etejauwai, dutika jimá jimajan emtika ashí yaakat nuigtú nugka ni wetin aidaunum ishiakui.
2Dutika chichajak: “Dekaskenmag ajak juumainuk kuashtai, tujash takau aidau ujumke; nuadui ajakjinna nu segatajum aents nuwi takastin aidaun ishiakti tusajum, tiuwai. 3Nunin asamtai wetajum; tujash kuitamamkatajum, atumnak uwig ikamyawa batsatbaunum ishimaina numamtuk aents pegkegchau batsatbaunum ishimjime. 4Weakjumesh kuichik egketai, wají egkesá jutaigkesh, sapat aidaukesh jukigpajum; jintá weakjumesh makichik aentskesh kumpamkujum wajantaigpa. 5Makichik jeganum wayaakjumesh, dekatkauk: Apajuí atumnash shiig agkan anentaimsa pujutan amastinme titajum. 6Tajumin aents nui puja nu shiig aneas jujabiagtaik, Apajuí ditanash yaigtatui. Untsu atumin shiig aneas jujamchagtaik, Apajuishkam ditanak yaigchagtatui. 7Nunú jega nuwig pujustajum nunikjum dita yutain amainamuk yuwatajum, umutain amainakuish uwagtajum; wagki aents takaa duka akiam auwai, makí makichik jeganum kanagjum nagkaemá yujaigpajum. 8Atum makichik yaaktanum jegattajum nui jujamkiag, yutain amasagtata duka yuwatajum. 9Nuniakjum nui jau akuish etsagaitajum, dutikakjum: ‘Apajuí inama duka tikiju wajasé’, titajum. 10Tuja makichik yaaktanum jegagmin jujamtan dakitjamainakuig jiinkijum: 11‘Atumi yaaktagminia nugka jutii nawen peemja juka, atuminig pegajá akakeka ukuaji, chicham etsegbau dakitjau asagmin; tujash Apajuí inamjatta duka tikiju wajasé’, titajum. 12Juna tajime: Suwimak sukagtamu tsawan jegatna duik, sodomanmaya aidau suwimkan jukiuwa nuna nagkaesau jukiagtinai.
Aents pegkegchau idaitan dakitin aidau
(Mt. 11.20-24)
13“¡Corazinkah aminak wait anentajame! ¡Betsaidah aminash wait anentajame! Tironmash nuigtú Sidonkash aents dutikmainchau atum iwaintukbau ainajum dutikamu ainakug, yaunchkes senchi anentai idagmak tudau takatan idaiyinak yapajinmain aajakú ainatai. 14Tujash Apajuí suwimak sukagtamu jegatna duik, tironmaya, sidogkanmaya aina nuna nagkaesau atumek suwimkak jukiagtin ainagme. 15Capernaúm,#10.15 Diistá Mt. 11.23. ¿amesh nayaimpinum juwam atinaitjai tamek? Atsa, amek Hades#10.15 Diistá Mt. 11.23. akaikitnaitme.
16“Atum chicham etsegbaun antugtamaina duka, mina antugtuinawai; untsu atumin dakitjamaina duka, mina dakitjuinawai; mina dakitjuina dushakam mina awetiuwa nuna dakituinawai”.
Setenta y dos ishiakbau waketja kaunkamu
17Setenta y dos ishiakbau shiig aneas kaunawag:
—Apuh, ame daagmin iwanch aidaush: Jiinkita tamak, iinash antugtamak aents aidaunash jiinkiag ukuagmae, tuidau.
18Tama ni ayaak:
—Dekaske, wisha wainkabiajai Iwanch peem wajukea imanik nayaimpinmaya iyaun. 19Nuadui atumi shiwajum Iwanchia nuna senchijí depetkatnun mina senchijun amasmajime. Dutikamu asagmin dapi esapainakuish, titigkesh ijupainakuish wajukashtatjume. 20Tujash shiig aneasaigpajum wakan pegkegchau aidau antugtamkaja duikik, dekas shiig aneastajum, atumi daagmik nayaimpinum agagbauwa nuadui.
Jesús shiig aneasbau
(Mt. 11.25-27)
21Nuna tusa idaiyak, Jesús Wakaní Pegkeji shiig anemtikam: “Apawah, amek ashí nayaimpinum batsamin aidau, nugkaya aidaushkam apuji asamin emematjame; wagki yacha nuigtú unuimaju aina duka uugkam aents imanchauch aina nunú iwaintuku asamin. Dekaske Apawah, wagki amek aajam wakegame”.
22“Mina Apag ashí wají aina nunak mina idaitugsauwai. Makichkish dekajuinatsui Apajuí Uchijiyaitag nunak, imá mina Apajuk shiig dekajui, aikasag mina Apagnash dekainatsui, imá wiki shiig wainjai. Tuja Uchijiya nu iwaintamu dekamain ainawai”.
23Tusa jintintaiji aidaun ayampatua ditanak chichajak: “Shiig aneasagtinai atum wainjum juna wainaidauk; 24wagki junak tajime kuashat profeta aidau, rey aidaushkam atum wainjum juna wainkatatus wakegajakú ainawai, tujash wainkachajui; antutnash atum antajum juna antukagtatus wakegajakú ainawai, nuninakush ditak antukchajui ju chichamnak”, tiuwai.
Samarianmayan pachis Jesús augmattsamu
25Tutai maestro chicham umiktajum tibauwa nuna jintinkagtin wajakí, Jesusan dekapsatatus:
—Maestroh, ¿wajina dutikmainaitja pujut tuke atina nuna jukitasanush?, tau.
26Tama ni ayaak:
—¿Wajintu agagbauwaita chicham umiktina nuwish? ¿Wajintu augme?
27Tama ni ayaak:
—“Amina Apujum Apajuiya nu ashí anentaimjai, ashí wakanmijai, ashí senchigmijai, ashí anentaimtagmijai aneeta, nuniakum tikich aidaush amek anenmamsam aneeta” tawai, tiu.
28Tutai Jesús ayaak:
—Shiig aimkaume; nunú dutikata, nuniakum pujut tuke atina nu jukittame, tau.
29Tujash ni tabaujin shiig juwakta tau asa, Jesusan iniak:
—¿Yaita wijai ijutkamush?, tau.
30Tutai Jesús ayaak:
—Makichik aents Jerusalegnumia juwaki Jericó wegau, nunikmá kasanum egkemkauwai; nunikmatai kasa achikag suwi suwimainakua, ipu ipujú ashí maawag, ni takakbaujinak yajutuk weak ukukiajui. 31Dutikamu ai, pachiachbau sacerdoteshkam nunú jintanmag nagkaemakmá wainak, ikaag diis ukukiuwai. 32Nunisag levitashkam nuwi jegakmá wainak, ikaag wajas diis weak ukukiuwai. 33Nuniai samarianmaya aentschakam nu jintanmag wekamá wainkauwai, nunik wait anenjauwai. 34Nunik jegantun, aceite vinojai juki ipujamu aidaun ampijua pempeaju, dutika niina entsamtaijin ekeni jega kajiitainum ejega kuitamkauwai. 35Nunik kashinia dui weak, jeennun jimag denarion akik chichajak: “Ame kuitamjutkata, wi waketkun wajupa tujuttatme nunash akiktajame”, tiuwai. 36Tusa, ¿ju kampatum aina nuiyash ya aajakuita nigki anenmamas kasa suwimam aents tepaun wait anenjaush?, tau.
37Tutai ni ayaak: Nuna wait anenjauwa nuuwai, tiuwai.
Timatai Jesuschakam:
—Ameshkam wakitkim, dutiksamek amijai ijutkamu wait anenjata, tiuwai.
Jesús Martan Mariajai ijagsatasa webau
38Tusa ukuak Jesusak wega weakua yaakat yaig aunum jegauwai; nunikmatai nuwa Marta daagtin niina jeen juki awayauwai. 39Nuna kai María daagtin pujau, duka Jesús chichatai ayaumas antak eketu. 40Tujash Martak kuashat takamainun uyumak wekaetau asa, Jesusan jegantun chichajak:
—Apuh, anú mina kaig ayatak eketa nu, kaim yaigtá tusam awetujia niish yainkati, tau.
41Tama Jesús ayaak:
—Marta, Marta, shiig kuashat takamain uyumakam pimpikim wekaeme, 42tujash dekas imá senchi puyatjumainuk makichkiuchi, Mariak dekas pegkejan etegka mina chichamjun antak eketui nunak makichkish atanmain ainatsui, tiuwai.
Currently Selected:
(Evangelio según San Lucas) 10: AGR
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.
