Santiago 3
3
Lic kachajij kib che tak ri cakabi'ij
1Alak nu hermanos, mu'ana ri lic e q'ui che alak quebu'an e aj c'utunel, ma ri cojc'utunic, keta'am wa' e jun nimalaj chac ya'om chikakul. Ruma c'u wa', we caka'an ri na utz taj, más c'ax ri k'atbal tzij re ri Dios cape pakawi' chwa ri k'atbal tzij cape paquiwi ri na e ta aj c'utunel. 2Na jinta junok lic jusuc', ma konoje ri oj ticawex lic q'ui uwach ri cojmacun wi. No'j we c'o junok na camacun ta c'ana ruc' tak ri cubi'ij, ri' e jun ticawex lic jusuc' yey ri' cuch'ij ne uchuk'ab tak ri rayibal re ronoje rucuerpo.
3E ri'oj cakacoj preno pa quichi' ri cawayu' cha' caqui'an ri cakaj ri'oj y jec'ula' tob lic c'o quichuk'ab, quekac'am bi pa cakaj wi ri'oj. 4Ch'obo pe alak puwi tak ri barcos. Tob lic e nima'k y e jeq'uetal ruma unimal tew, na ruc' ta c'u ri', e c'amom bi xa ruc' jun ralco timón; y ruc' wa', ri chapayom re cuc'am bi pa ri caraj wi rire. 5Jec'uri'la' ri kak', tob lic xa ch'uti'n, na ruc' ta c'u ri', na xa ta jubik' ri na utz taj cu'ano echiri' cakatac'aba' kak'ij. ¡Chilape c'u alak runimal c'ache'laj#3:5 “C'ache'laj”: Wa' pa caxtila “bosque” quecha che. caporotaj xa ruma juna upuc' ak'!
6Jec'ula' ri kak' e pacha' ri ak'. Ma che ronoje ri c'o che ri kacuerpo, ri kak' tob lic xa ch'uti'n, na ruc' ta c'u ri', cuc'am lo uq'uiyal mac y jela' cuyoj ri kabinic y ri kac'aslem. Y wa' wa kak' e pacha' tzijital chi ruma ri ak' re xibalba', ma chila' cape wi ri na utz taj cakabi'ij.
7E ri oj ticawex ya'tal chike cojtakan paquiwi ruq'uiyal uwach awaj, wa' e tak ri e c'o che ruwachulew, ri quexiq'uic' che ruwa caj, ri quecharar chu'lew y ri e c'o pa ri mar. Ronoje c'u ruq'uiyal uwach awaj ch'ijital quichuk'ab cuma ri ticawex. 8No'j c'u ri kak' na cakach'ij ta c'ana uchuk'ab, ma na cuya ta rib cak'obisax ruchuk'ab; e pacha' rupuchi' juna cumatz nojinak che veneno cacamisanic. 9Ruc' ri kak' cakayac uk'ij ri Kakaw Dios yey ruc' wa' tzel cojch'aw chiquij ri ticawex, ri ebu'anom ri Dios re caquic'utubej uwach Rire. 10Xa c'u che jun uchi' kulaj quel lo chomilaj ch'a'tem y itzelilaj ch'a'tem. Alak nu hermanos, wa' na usuc' taj ca'anic. 11Ma ¿c'o neba juna ac'al quel lo ya' qui' y ya' c'a chupa? 12Alak nu hermanos, ¿c'o neba juna che' re higo echiri' cawachinic quel lo aceitunas che? ¿O c'o neba juwi' uva echiri' cawachinic quel lo higo che? Jec'ula' ri', chupa juna ac'al re ya' tza, na quel ta lo ya' qui'.
Ri sakil na'oj cape ruc' ri Dios
13We c'o junok chixo'l alak lic c'o una'oj y lic cumaj usuc' ronoje, e chuk'alajisaj c'u ri' ri sakil una'oj ruc' jun binic silabic lic jusuc' y mu'an ne nim che rib. 14Pero we c'ax c'u'x alak chibil ib alak y c'o retzelal c'u'x chiwach alak, matac'aba' c'u k'ij alak ri' y mabi'ij ne alak lic c'o runa'oj ri Dios uc' alak, ma xa rak'ubal. 15Yey wa' na e ta ri sakil na'oj petinak ruc' ri Dios, ma xa e re ruwachulew, xa que ticawex y re Ritzel. 16Ma we c'o c'axc'olil c'u'xaj y retzelal c'u'xaj chiwach alak, wa' cuc'am lo ch'a'oj y ronoje tak ri na utz taj ca'anic. 17No'j c'u ri sakil na'oj petinak ruc' ri Dios, nabe na cak'alajisax ruc' jun chomilaj binic silabic; ec'u junok c'o wa sakil na'oj ruc', na aj ta ch'a'oj, utz uc'u'x y na cu'an ta utitz'itiquil; lic cuc'ut ri c'axna'bal uc'u'x y cu'an utzilaj tak chac; na cacha'w ta chiquixo'l ri winak y na xa ta queb upalaj. 18Yey ri caquitzucuj ri utzil chomal y caquitic wa' chiquiwach, ri' quec'oji' chi usuc'liquil cuc' ri ticawex jela' pacha' ri caraj ri Dios.
Currently Selected:
Santiago 3: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.