Hebreos 11
11
Ri cubulibal c'u'xaj ruc' ri Dios
1Ec'u ri cubulibal c'u'xaj ruc' ri Dios que'elok e lic cakajiquiba' uwach cakac'ul ri koye'em che Rire. Ruma ri cubulibal kac'u'x, kacojom lic c'olic janipa ri cuk'alajisaj ri Dios chike, tob wa' na quilitaj taj.
2Lic chom ri xtataj puwi ri quibinic quisilabic ri kati'-kamam ojertan ruma ri cubulibal quic'u'x ruc' ri Dios.
3Ruma ri cubulibal kac'u'x, keta'am ri Dios xch'awic y ruc' c'u ruch'a'tem xu'an ronoje ri c'olic,#Sal. 33:6, 9 ma ronoje ri cakil wo'ora upetebem lo che ri na quilitaj ta uwach.
4Ri Abel, ruma ri cubulibal uc'u'x, xuya chwach ri Dios jun kasa'n más utz chwa rukasa'n ri Caín. Ruma la', ri Dios jusuc' xril rubinic usilabic y xuc'ul c'u rukasa'n. Tob c'u caminak chi ri Abel, c'a cach'a't ne wo'ora kuc' ruma ri cubulibal uc'u'x.#Gn. 4:3-7
5Ri Enoc, ruma ri cubulibal uc'u'x ruc' ri Dios, xc'am bi chuc'asliquil chila' chicaj y na xric'owibej ta ri camic. Ec'u rucuerpo na xrikitaj taj, ma e ri Dios xuc'am bi. Yey ri Enoc echiri' c'a c'o ne che ruwachulew, lic chom xilitaj rubinic usilabic chwach ri Dios.#Gn. 5:24 6No'j e junok na jinta cubulibal uc'u'x ruc' ri Dios, ri' na cuc'ul ta c'ana uc'u'x ri Dios janipa ri cu'an chwach. Ma e junok caraj cakib ruc' ri Dios, lic chirajawaxic cucojo ri Dios c'olic y cucojo Rire cuya rajil uc'axel chique ri quetzucuw re.
7Ri Noé, ruma ri cubulibal uc'u'x ruc' ri Dios, xucojo echiri' xbi'x che ruma ri Dios sa' tak ri catajin lok, tob ne wa' c'amaja' cu'ana'. Xutakej c'u ri xubi'ij ri Dios che y xu'an ri nimalaj barco re quebucolobej rufamilia chupa. Yey ruma wa cubulibal c'u'xaj xuc'utu, xk'alajin c'u ri quimac ri na quicojom ta utzij ri Dios y xpe c'u k'atbal tzij paquiwi'. Ec'u ri' ri Noé ruma xcubi' uc'u'x ruc' ri Dios, e xuc'ul ri utz cuya ri Dios chique ri e jusuc' chwach ruma ri cubulibal quic'u'x ruc'.
8Ri Abraham, ruma ri cubulibal uc'u'x, echiri' xsiq'uix ruma ri Dios, xucoj tzij y xe'ec chupa ri luwar ubi'tisim ri Dios che. Xel c'u bi pa rutinamit, tob na reta'am taj pa que'ec wi. 9Ruma ri cubulibal uc'u'x ruc' ri Dios, ri Abraham xe'jekela pa ri luwar ubi'tisim ri Dios che, tob rire na aj ta chila'. Na xc'oji' ta chupa juna ja; xa xjeki' xe' tak carpa, y jela' xqui'an ri Isaac y ri Jacob, ma e ne jun rique xquic'ul ri ubi'tisim lo ri Dios chique. 10Ec'u ri Abraham roye'em ri jun tinamit tz'akom lo chi utz, yey wa tinamit e ri Dios xch'obow re y xyacaw re.
11Rixok Sara, ruma ri cubulibal uc'u'x ruc' ri Dios, tob lic nimalaj winak chic y na utz tane calanic, xya'taj che xalax jun ralab ma xucojo ri Dios lic e cu'ana na janipa rubi'tisim che. 12Jec'ula' ri Abraham, tob ne xa nakaj chi c'o wi lo rucamic, xalax ruc'ajol. Yey tak ri ralc'o'al rire lic xeq'uiyar quiwach, xebu'ana lic e q'ui pacha' ri quiq'uiyal ri ch'umil e c'o che ruwa caj y pacha' ri sanyeb c'o chuchi' ri mar, ri na utz taj cajilaxic.
13Conoje wa' xecamic echiri' c'amaja' caquic'ul janipa rubi'tisim lo ri Dios chique. Ruma c'u lic xcubi' quic'u'x ruc' ri Dios, e pacha' xquil pan wa' y lic xequi'cot ruc' tak ri xquil apanok. Y ruc' wa', xquik'alajisaj rique na e ta aj wara che ruwachulew, xa ebic'owel. 14Yey ri caquik'alajisaj wa', caquic'utu quetajin che utzucuxic jun quitinamit pa quejeki' wi. 15We ta e la' c'a caquich'ob rakan puwi ri tinamit pa xebel lo wi, ri' lic paquik'ab c'o wi quetzelej tanchi chila'. 16No'j rique e xcaj jun quitinamit lic junwi, wa' e ri jun chomilaj tinamit chila' chicaj. E uwari'che, ri Dios na caq'uix ta che cabi'x che e Dios que rique, ma uyijbam chi jun quitinamit lic chom chila' chicaj.
17Ec'u ri Abraham, ruma ri cubulibal uc'u'x ruc' ri Dios, echiri' xc'am upa, xuc'am bi ruc'ajol Isaac re cucamisaj chwi raltar, tob xew ne uc'ajol ri' yey puwi rire u'anom ri bi'tisinic ri Dios echiri' jewa' xubi'ij canok: 18«Xew che rac'ajol Isaac caquipetebej wi lo rawalc'o'al»#Gn. 21:12 xcha'. 19Xuya c'u ranima' ruc'ajol ma lic reta'am ri Dios c'o uchuk'ab re cuc'astajisaj lo ri Isaac chiquixo'l ri ecaminak, y echiri' ri Dios xuya tanchi che, e pacha' xuc'ul tanchi ruc'ajol chiquixo'l ri ecaminak.
20Ri Isaac, ruma ri cubulibal uc'u'x ruc' ri Dios, echiri' xebu'an bendecir ri Jacob y ri Esaú, xujiquiba' uwach chom tak sipanic cuya ri Dios chique chwach apanok.#Gn. 27:27-29, 39-40 21Jec'ula', ri Jacob ruma ri cubulibal uc'u'x ruc' ri Dios, echiri' xa nakaj chi c'o wi rucamic, xebu'an can bendecir ri queb uc'ajol ri José, xutz'onoj chom tak sipanic re ri Dios paquiwi' chiquijujunal y lic xulok'nimaj uk'ij ri Dios e ri' yuxul chwi ruch'ami'y.#Gn. 48
22Ri José, ruma ri cubulibal uc'u'x ruc' ri Dios, echiri' xa nakaj chi c'o wi rucamic, xuk'alajisaj c'o jun k'ij raj Israel quebel bi chupa ri tinamit Egipto cha' quetzelej tanchi pa ri luwar ubi'tisim ri Dios chique. Y xtakan c'u canok sa' ca'an che rubakil echiri' quebel bi, ma xraj camuki' rubakil chila'.#Gn. 50:24-25; Éx. 13:19
23Ruchu-ukaw ri Moisés, ruma ri cubulibal quic'u'x ruc' ri Dios, xquewaj ri Moisés oxib ic', ma xquilo lic chomilaj ac'a. Na xquixi'ij ta c'u quib che ri takanic re ri rey echiri' xutak quicamisaxic conoje ri raltak co alabo e aj Israel.#Éx. 1:22–2:2
24Ri Moisés, ruma ri cubulibal uc'u'x ruc' ri Dios, echiri' xnimaric na xraj ta chic cabi'x che e ralab rumi'al ri faraón, ri rey re Egipto. 25Xucha' c'u ri cutij c'ax junam cuc' rutinamit ri Dios#11:24-25 Rumi'al ri rey re Egipto xuq'uiyisaj ri Moisés y xu'an ralab che. Ruma c'u wa' lic c'o uwach ri Moisés, pero echiri' xnimaric xuya can wa' cha' e cu'an jun cuc' rutinamit ri Dios, tob rique na jinta quiwach ma xa e aj chac paquik'ab ri tinamit Egipto. Éx. 2:10-12 chwa ri cac'oji' chupa rukusil ri mac, ma wa' xa quic'owic. 26Ec'u ri beyomalil más c'o uwach chwach rire e ri cach'amixic pacha' x'an che ri Cristo, na e ta tak ri beyomalil re Egipto; ma runa'oj e c'o pan puwi ri rajil uc'axel cuya ri Dios che chwach apanok. 27Ruma c'u ri cubulibal uc'u'x ruc' ri Dios, xel bi Egipto y na xuxi'ij ta c'ana rib chwa ri royowal ri rey. Ec'u ri xu'ano e lic xuchuk'ubej rib che ri cu'ano, ma e pacha' lic cutzutza' chi pan uwach ri Dios, tob Rire na quilitaj ta uwach. 28Ruma c'u ri cubulibal uc'u'x ruc' ri Dios, e xu'an ri xtak che; xuyijba' ri nimak'ij Pascua y xtakan che casok' uquiq'uel bexex che tak ruchi' ja cha' echiri' quic'ow ru ángel ri Dios, na cucamisaj ta can ri nabe calc'o'al ri e aj Israel.#Éx. 12:21-30
29Ri tinamit Israel, ruma ri cubulibal quic'u'x ruc' ri Dios, xebic'ow chupa ri mar Rojo echiri' wa' xjakataj upa y e la' pa chaki'j ulew xebic'owic. No'j echiri' raj Egipto xquijek quebic'ow chupa ri mar, ri ya' xuc'ul tanchi rib y jela' xejik' can chupa.#Éx. 14:21–15:21
30Raj Israel, ruma ri cubulibal quic'u'x ruc' ri Dios, xebin chirij ri tinamit Jericó wukub k'ij, y tec'uchiri' xwuluwub lo ri tapia re ri tinamit.#Jos. 6:12-21
31Ri Rahab e jun ixok retz'abem uwa uk'ij cuc' achijab; na ruc' ta c'u ri', ruma xcubi' uc'u'x ruc' ri Dios, na xcam ta cuc' ri e aj palajiy tzij e aj Jericó, ma rire xebuc'ul chi utzil chomal ri e c'ac'alenel e aj Israel y xebuto'o.#Jos. 2:1-21; 6:22-25
32¿Sa' chi más cambi'ij? Ma na cu'an ta wa jun k'ij quinch'a't chwi ri cubulibal quic'u'x ri Gedeón, ri Barác, ri Sansón, ri Jefté, ri David, ri Samuel y ri k'alajisanelab. 33Ruma ri cubulibal quic'u'x ruc' ri Dios, e c'o ri xquich'ij uchuk'ab uq'uiyal tinamit, xetakan c'u paquiwi' chi jusuc' y lic xquirik ri to'bal re ri Dios bi'tisim lo chique. E c'o ne ri xquitz'apij ruwaque' ri coj cha' na quetij ta cuma. 34E c'o ne ri xec'ak chupa ri ak' y na xec'at taj. E c'o ri xecolobetaj chwach ri camic ruc' espada. E c'o ri xya'i' quichuk'ab echiri' na jinta quichuk'ab, lic xnimar ri quichuk'ab pa ch'a'oj y ruma c'u ri', ri soldados e aj naj xebanimaj bi. 35E c'o ne ixokib xquic'ul ri calc'o'al e c'astajinak tanchi lo chiquixo'l ri ecaminak.
No'j e c'o jujun chic ticawex, ruma ri na xcaj taj cacok'otaj ri Dios, e xquicha' ri na xetzokpix ta chubi y ruc' c'u unimal c'axc'olil xecamic, ma e xquicha' ri jun chomilaj c'astajibal re c'aslemal na jinta utakexic. 36E c'o jujun chic lic xech'amixic, xjich' quipa, xeya'i' pa carena y xeya' pa cárcel. 37E c'o ri lic xc'am tak quipa, e c'o ri xecamisax ruc' abaj, e c'o ri xk'ati' quipa ruc' sierra, e c'o ri xecamisax ruc' espada. E c'o ri lic xesutinic quicojom quik'u' xa re utz'u'mal bexex o caprux, x'an niba' chique, lic xpaxir c'u quic'u'x y lic x'an c'ax chique. 38Rique xebin pa tak luwar catz'intz'otic, xebin pa tak juyub, xejeki' che ruwachulew xe' tak pec y pa tak jul. E tak c'u wa' wa winak re ruwachulew na takal tane chique quec'oji' wa nimak e aj chac re ri Dios chiquixo'libal.
39Tob conoje wa' lic xquic'ut ri cubulibal quic'u'x ruc' ri Dios, na jinta c'u junok chique xuc'ul wara che ruwachulew ronoje rubi'tisim lo ri Dios chique. 40Ma ojertan ri Dios uch'obom chi lo ri más chom#11:40 “Ri más chom”: Wa' e que'elawi ri colobetajic cuya ri Cristo. cu'ana' cha' cutz'akatisaj lo ri caraj cu'an kuc' ri'oj junam cuc' rique.
Currently Selected:
Hebreos 11: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
