1 Corintios 9
9
Ri takal che juna tako'n re ri Jesús
1Ri'in ¿na in ta neba jun chique rutako'n#9:1 “Tako'n”: Pa ri ch'a'tem griego y pa caxtila wa' e “apóstol”. Cabi'x “tako'n” chique ri cablajuj utijo'n ri Jesús, ri xetak ruma Rire cha' caquitzijoj ri Utzilaj Tzij y caquitic iglesias. Yey ri Pablo xtak lo ruma ri Jesús cha' cutzijoj ri Utzilaj Tzij y cutic iglesias. ri Jesús yey c'o c'u panuk'ab can'an ri takal che cu'an juna tako'n? In utako'n ma xinwil uwach ri Jesús ri Kanimajawal, yey ralak alak c'utubal re ri nuchac ma wuma ri'in xc'oji' alak puk'ab Rire. 2Laj chiquiwach jujun chic ri'in na in ta jun tako'n re ri Jesús; no'j ralak lic eta'am alak in utako'n Rire, ma wuma ri'in xc'oji' alak puk'ab Rire yey wa' e c'utubal re pakatzij wi ri'in in tako'n re ri Kanimajawal. 3Chique c'u ri caquitz'ak nuchi', e cambi'ij wa' re to'bal wib: 4Ri oj utako'n ri Kanimajawal, ¿na takal ta neba chike caya' ri kawa y ri kaya'? 5¿Yey na takal ta neba che juna tako'n c'o rixokil ucojom rubi' ri Cristo yey carachbilaj echiri' cu'ana ruchac ri Kakaw? Takalic, ma jela' qui'anom ri Cefas#9:5 “Cefas”: E jun chic ubi' ri Pedro. cuc' ri jujun chic tako'n yey tak ruchak' ri Kanimajawal. Takal c'u wa' chike ma oj tako'n jela' pacha' rique. 6Ri nic'aj chic tako'n e c'o pa ruchac ri Kakaw, quetojic y na quechacun ta pa juna chic chac. ¿Na takal ta neba wa' che ri Bernabé y chwe ri'in? ¿O xew cami ri' ri'oj na takal ta wa' chike?
7Ma ¿c'o neba juna soldado catak che culok' ruc' rumeyo ri cajawax che? Na jintaj, ma ronoje wa' caya' che. Jec'ula' juna aj tico'n, ¿na takal ta neba che cutij re ri uva xutico? Y juna aj chajal chicop, ¿na takal ta neba che cutij re ri leche cuyitz'o? 8Y wa cambi'ij, ¿xa nawi na'oj re ticawex? Na e taj, ma jela' tz'ibital can pa Rutzij Upixab ri Dios. 9Ma chupa ri takanic tz'ibital can ruma ri Moisés, jewa' cubi'ij: «Macoj bozal che ri boyex echiri' cukil uwi ri trigo, ma takal che catzukic.»#Dt. 25:4 ¿Xubi'ij neba wa' ri Dios xew ruma c'ax quebuna' ri boyexab? 10¿Na pakawi' ta neba ri'oj cubi'ij wi wa'? Katzij, e pakawi' ri'oj xtz'ibax wi. Ma jela' pacha' rabixom takal che c'o roye'em che ruchac cu'ano; yey ri aj chac c'o pa kiloj trigo c'o roye'em chwa ri cu'ano; 11jec'ula' ruma ri'oj xkatic chixo'libal alak Rutzij Upixab ri Dios, ¿na takal ta cami ri' chike ri'oj cakac'ul che alak ri cajawax chike wara che ruwachulew? 12Ma e c'o jujun tojom alak ri quichac piglesia. We takal c'u ri' chique rique quetoj alak, más lic takal chike ri'oj, ma oj xojticow riglesia alak. Na ruc' ta c'u ri', ri'oj na jinta c'o katz'onom che alak, tob takal chike. Ri ka'anom e cojchacun pa ke wi y lic kach'ijom lo ronoje cha' na cakacoj ta k'atbal che rutzijoxic ri Utzilaj Tzij re ri Cristo.#9:12 Ri Pablo na xraj taj cu'an alc'ayew chique ri e aj Corinto, yey na xraj taj c'o junok cuch'obo rire cutzijoj ri Utzilaj Tzij xa ruma cach'acan chirij. 13Yey ralak eta'am alak raj chaquib pa Rocho Dios takal chique quewa' chirij ri kasa'n ya'om puk'ab ri Dios; yey ri queniman chwa raltar, takal chique c'o caquic'ul che ri que'yo'k chiri'.#Lv. 7:6-9, 31-34; Dt. 18:1 14Yey ri takanic uya'om can ri Kanimajawal paquiwi ri caquitzijoj ri Utzilaj Tzij, e wa': E lic takal chique caquic'asba' quib e chirij ruchac ri Cristo caqui'ano.#Mt. 10:10; Lc. 10:7 15Na ruc' ta c'u ri', ri'in na jinta c'o nutz'onom che alak tob takal wa' chwe. Y na e tane uwach wa' quintz'iban pana che alak cha' quintoj alak. Ma chinuwach ri'in, más utz we quincamic chwa quesax chwe ri sakil qui'cotemal canna'o echiri' cantzijoj ri Utzilaj Tzij y na jinta wajil cantz'onoj.
16Ri'in na canyac ta nuk'ij ruma cantzijoj ri Utzilaj Tzij. Xew weta'am chirajawaxic can'an wa' wa chac ma e ri Cristo intakayom che. ¡Lic tok'o' c'u nuwach we na can'an taj! 17We ta in xincha'w wa chac, laj woye'em c'u ri' ri tojbal we'in. No'j ruma e ri Nukaw intakayom che u'anic wa', na jinta panuk'ab canjec' wib che. 18¿Sa' c'u ri canch'ac che ri chac can'ano? E ri unimal qui'cotemal canna'o echiri' cantzijoj ri Utzilaj Tzij y na cantz'onoj ta wajil tob takal wa' chwe.
19Ri'in na in jinta puk'ab juna patrón; na ruc' ta c'u ri', nuya'om wib che quinu'ana nimanel que conoje cha' jela' e q'ui ri caquicoj rubi' ri Cristo. 20Echiri' in c'o chiquixo'l ri watz-nuchak' e aj judi'ab, can'an che wib jela' pacha' rique cha' caquicoj rubi' ri Cristo. Ec'uchiri' in c'o chiquixo'l rique, cantakej ri quitakanic, tob weta'am na in jinta chuxe' wa'. Nu'anom c'u wa' cha' rique caquicoj rubi' ri Cristo. 21Jec'ula' echiri' in c'o chiquixo'libal ri na quitakem ta ri takanic tz'ibital can ruma ri Moisés, can'an che wib pacha' in jun chique, tob in c'o chuxe' rutakanic ri Dios y rutakanic ri Kanimajawal. Nu'anom c'u wa' cha' rique caquicoj rubi' ri Cristo. 22Jec'ula' echiri' in c'o chiquixo'libal ri hermanos na jinta ucowil ri quina'oj, c'o ri na can'an ta ri'in xa ruma e mac chiquiwach rique, tob ri'in weta'am na mac taj, pero rique c'amaja' caquimaj usuc' wa'. Jela' can'ano cha' rique caquijiquiba' quib chi utz puk'ab ri Dios. Ruc' c'u ronoje ri can'an chiquiwach conoje ri ticawex, cantzucuj sa' ri lic quebuto'o cha' jela' e c'o jujun chique quecolobetajic. 23Ruc' ronoje c'u ri can'ano, cank'alajisaj ri Utzilaj Tzij cha' junam cakac'ul ri utz ruc'a'am lo wa Utzilaj Tzij.
Kachuk'ubej kib cha' cakac'ul ronoje ri caraj cuya ri Dios chike
24Eta'am alak pa juna etz'anem re c'alalem, conoje ri quec'alalic lic caquitij uk'ij caquich'ac ri premio, tob queta'am xa jun ri cac'uluw ri premio. Jec'ula' chuk'ubej ib alak cha' cac'ul alak ri premio cuya ri Dios che alak. 25E junok lic cutijoj rib che juna etz'anem, lic cuch'ij uchuk'ab ronoje xa ruma jun premio xa casach uwach. No'j ri'oj cakachuk'ubej kib che uc'ulic jun premio na casach ta c'ana uwach. 26Ec'u ri'in lic weta'am sa' ruchac ri nuc'aslem. Na can'an ta c'u pacha' junok xa cajumumic pero na reta'am taj pa caraj copon wi o pacha' junok cach'o'jin pa t'o'y#9:26 “Cach'o'jin pa t'o'y”: Wa' cach'a't puwi jun “boxeador”. pero xa pa tew cach'ayanic. 27Ma ri'in quintakan puwi ri nucuerpo tob cantij c'ax ruma. Jec'ula' na canya ta c'ana luwar che tak ri rayibal re ri nuti'jil catakan panuwi'. Ma ri'in xink'alajisaj ri chomilaj be re ri K'ijsak chiquiwach uq'uiyal ticawex; lic tok'o' c'u nuwach ri' we e la' na canch'ac ta ri premio cuya ri Dios.
Currently Selected:
1 Corintios 9: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
