1 Corintios 8

Ri wa'im ic'owisam chiquiwach ri tiox

1Wo'ora cuaj quinch'a't puwi' we utz o na utz taj catij ri ic'owisam chiquiwach ri tiox. K'alaj c'ut chikajujunal ri'oj c'o chi kana'oj chwi wa'. Pero e c'o jujun caquich'obo quimajom chi usuc' ronoje; y ruma la', caqui'an nim che quib. No'j we pakatzij wi c'o rutzil c'u'xaj pa kanima', lic cakato' c'u kib ri' cha' c'o kaq'uiyibal chwach ri Dios. 2We c'o c'u junok cuch'obo lic c'o reta'am, ri' c'amaja' cumaj usuc' ronoje ri lic chirajawaxic wi careta'maj.#8:1-2 Ri kamajom usuc' na tz'akat taj we na jinta ri rutzil uc'u'x ri Dios kuc'. 3No'j ri pakatzij wi c'ax cana'w re ri Dios, ri' ralc'o'al ri Dios yey eta'matal c'u uwach ruma ri Dios.

4Chwi tak c'u ri wa'im ic'owisam chiquiwach ri tiox, ri'oj keta'am na jinta juna tiox che ruwachulew c'o uc'aslem, ma xa jun ri Dios c'olic, na jinta jun chic. 5Tob c'o ri caquibi'ij e c'o tak dios che ruwa caj y che ruwachulew; yey chiquiwach c'u ri quecojow wa', lic e q'ui ri quidios y ri cajawal;#8:5 “Cajawal”: E c'o ri caquich'obo c'o rajawal ri ya', c'o rajawal ri juyub o c'o rajawal ri tico'n; yey chiquiwach rique, wa' wa rajawal na winak taj, e jun uxlabixel c'o pa tew. 6no'j ri'oj keta'am xa jun ri Dios c'olic, e ri Kakaw, ri 'anayom re ronoje ri c'olic. Yey ri'oj oj c'o puk'ab Rire. Y xa jun ri Kanimajawal, e Jesucristo. Ruma Rire 'anom ronoje ri c'olic y ruma ne Rire oj c'as ri'oj.

7Na conoje ta c'ut caquimaj usuc' puwi wa jun Dios c'aslic; ma e c'o hermanos ojertan xequitakej tak tiox, yey c'a c'o pa quijolom wa' e c'aslic. Ec'u wo'ora we rique caquitij ri ic'owisam chwach juna tiox, e caquina' rique mac ri caqui'ano. E caquich'ob wa' ruma na jinta ucowil ri quina'oj. 8Rique na caquimaj ta usuc' wa': Na ruma ta ri cakatijo cojilitaj chi utz ruma ri Dios. Na ruma ta ri cakatijo o ri na cakatij taj c'o kawach o na jinta kawach chwach ri Dios.

9Pak'ab alak c'o wi sa' ri ca'an alak. Na ruc' ta c'u ri', chajij ib alak che ri ca'an alak, tob eta'am alak na mac taj. Ma na utz taj we xa uma ralak quetzak pa mac ri na jinta ucowil ri quina'oj. 10Ma c'axtaj c'o juna hermano na jinta ucowil runa'oj y caril c'u la tz'ul la chwa ri mexa pa cac'ayix wi ri wa'im ic'owisam chwach juna tiox. Rilal eta'am la na mac ta wa', no'j ri jun chic na cumaj ta usuc' wa' yey xa ruma xril la catij rilal wa', cu'an c'u re pacha' ri ca'an rilal y cutijo. 11Tob rilal c'o na'oj la chwi wa', pero ruma ri ca'an la, ri hermano na jinta ucowil runa'oj, caresaj rib chirij ri Cristo. ¡Wa' lic na ube taj, ma ruma ne rire xcam ri Cristo! 12Jec'ula' we casachisaj alak quina'oj ri na e tiquil ta chi utz, ri' camacun alak chiquij rique y ruc' c'u wa', e camacun alak chirij ri Cristo. 13E uwari'che we ri cantij ri'in cu'ana tzakibal che juna hermano, xa jumul ri' na cantij ta chi ti'o'n cha' jela' na catzak ta ri jun hermano wuma ri'in.

Currently Selected:

1 Corintios 8: acrT

Highlight

Copy