1 Corintios 12
12
Ri cuya ri Ruxlabixel ri Dios chike re 'anabal ruchac
1Hermanos, ri'in lic cuaj queta'maj alak chi utz puwi tak ri sipanic uya'om ri Ruxlabixel ri Dios chike cha' ruc' wa' caka'an ruchac ri Kakaw. 2Ma eta'am alak rojertan echiri' c'amaja' c'o alak pa ri K'ijsak, xsocotaj alak y xya c'u ib alak che quilok'nimaxic tiox tob wa' na quech'aw taj. 3Pero wo'ora lic cuaj queta'maj alak wa': We c'o junok tzel cach'a't chirij ri Jesús, ri' lic k'alaj na e ta ruma ri Ruxlabixel ri Dios cubi'ij wa'. No'j we c'o junok cutzijoj: «Ri Jesús e Kanimajawal,» ri' e ruma ri Santowilaj Ruxlabixel cubi'ij wa', ma xew ri Ruxlabixel ri Dios cak'alajisan re wa' che junok.
4Tape alak, q'ui tak uwach ri sipanic ya'tal chike cha' caka'an ruchac ri Dios; pero xa Jun ri caya'w re, wa' e ri Ruxlabixel ri Dios. 5Lic q'ui tak uwach ri chac; pero xa Jun c'u ri rajaw, wa' e ri Kanimajawal Jesucristo. 6Yey ru'anic wa' wa chac q'ui tak uwach; pero xa Jun ri caya'w chike caka'an wa', xew ri Dios.
7Ri Dios uya'om chikajujunal ri'oj c'utubal re ri Ruxlabixel Rire chupa ri kabinic kasilabic, wa' e re to'bal que rutinamit ri Dios.
8Ma e c'o jujun ya'tal chique ruma ri Ruxlabixel ri Dios quech'a't ruc' sakil na'oj.
Jec'ula' ruma ri Ruxlabixel ri Dios, ya'tal chique jujun chic caquitzijoj sa' ri uk'alajisam ri Dios chique.
9E c'o c'u jujun chic ya'tal chique ruma ri Ruxlabixel ri Dios lic caquicojo ri Dios c'o uchuk'ab re cu'an ronoje tob lic c'ayew.
E c'o jujun chic ya'tal chique ruma ri Ruxlabixel ri Dios caqui'an orar paquiwi ri yewa'ib yey wa' quecunutajic.
10Jec'ula' e c'o jujun chic ya'tal chique caqui'an milagros ruc' ruchuk'ab ri Kakaw,
y e c'o jujun chic ya'tal chique caquik'alajisaj runa'oj ri Dios.
E c'o jujun chic ya'tal chique caqueta'maj we juna tzij petinak ruc' ri Ruxlabixel ri Dios.
Jec'ula' e c'o jujun chic ya'tal chique quech'a't pa jujun chic ch'a'tem na quimajom taj;
yey e c'o c'u jujun chic ya'tal chique caquik'alajisaj ri xbi'x ruma junok tob na caquirik ta wa' wa ch'a'tem.
11Pero ronoje wa' ya'tal chike, e ruma ri Ruxlabixel ri Dios, ri ca'anaw re ronoje. Yey e Rire cajachaw chikajujunal sa' ri caraj cuya chike.
12E pacha' juna ticawex, tob q'ui uwach ri chapayom re rucuerpo, wa' xa jun u'anom. Jec'ula' u'anom ri Cristo kuc' konoje ri'oj. 13Ma ri Ruxlabixel ri Dios xu'an xa jun chike echiri' xkac'ul ri bautismo pa rubi' ri Cristo. Konoje c'u ri' xa jun kawach, tob e c'o jujun chike e aj judi'ab y jujun chic na e ta aj judi'ab, tob ne jujun chic e aj chaquib elok'otal ruma cajaw yey jujun chic quechacun pa que rique; pero konoje junam kac'ulum ri Uxlabixel re ri Dios.
14E juna cuerpo na xa ta jun uwach ri chapayom re, ma lic q'ui uwach. 15Ma we ta cach'aw ri akanaj y cubi'ij c'u ri': «Ri'in na in ta re ri cuerpo ma na in ta k'abaj.» Tob ne jela' ri' cubi'ij, lic rewi che ri cuerpo c'o wi. 16Jec'ula' we ta ri xiquinaj cubi'ij: «Ri'in na in ta re ri cuerpo ma na in ta wachaj.» Tob ne jela' ri' cubi'ij, lic rewi che ri cuerpo c'o wi.
17We ta ronoje ri kacuerpo xa jun chi wachaj u'anom, ¿sa' c'u u'anic ri' cojtanic? Yey we ta ronoje ri kacuerpo xa jun chi xiquinaj u'anom, ¿sa' c'u u'anic ri' cojuxlabic? 18Pero ri Dios uya'om can sa' tak ri cajawax che ri kacuerpo e chirij ri xraj Rire. 19Ma we ta xa jun uwach ronoje ri chapayom re ri kacuerpo, lic na e ta c'ana ri'. 20Lic q'ui uwach c'u ri' ri chapayom re ri kacuerpo, yey wa' xa jun u'anom.
21E uwari'che ri wachaj na utz taj we cubi'ij che ri k'abaj: «Ri'at na catajawax ta chwe.» Jec'ula' na utz ta nenare' we ri jolomaj cubi'ij che rakanaj: «Ri'at na catajawax ta chwe.» 22Yey e janipa ri pacha' na jinta ucowil che ri kacuerpo, e ne lic quebajawax ri' chike. 23Jec'ula' e janipa ri pacha' lic na il ta uwach che ri kacuerpo, e ne ri lic cakach'uk chi utz; yey e janipa ri na utz taj quilitajic, e ne lic cojoc il ri' che uch'ukic. 24No'j tak ri utz quilitaj chike, na jinta uchac cakach'uku. Ec'u ri Dios xyijban chi utz ri kacuerpo cha' ri na il ta uwach chike, cojoc más il che. 25Ri Dios xu'an wa' cha' janipa ri c'o che ri kacuerpo cujunimaj rib; jec'uri'la' janipa ri c'o che ri kacuerpo junam caquichajij quib. 26Ruma c'u la' we c'o juna c'ax che ri kacuerpo, ri' ronoje ri kacuerpo cuna' uc'axc'olil. Jenela' we c'o ri lic cojoc il che, ri' ronoje ri kacuerpo caqui'cotic.
27Ralak e alak rucuerpo ri Cristo y chijujunal alak c'o jun chac takal che alak ca'an alak. 28Ruma c'u la' ri Dios ebucojom e raj chac piglesia:
nabe, e ri e tako'n re ri Jesús,
uca'm, e ri quek'alajisan re runa'oj ri Dios,
urox, e ri e c'utunel re tak ruc'utunic ri Dios,
yey e c'o ri caqui'an milagros ruc' ruchuk'ab ri Dios,
ri quecunan ruc' ruchuk'ab ri Dios,
ri quiya'om quib che quequito' jujun chic,
ri ya'tal chique caquichap utza'm ri chac piglesia
y ri ya'tal chique quech'a't pa jujun chic ch'a'tem na quimajom taj.
29Junwi tak ri chac. Ma ¿konoje neba oj tako'n? ¿Konoje neba oj k'alajisanel re runa'oj ri Dios? ¿Konoje neba oj c'utunel? ¿Konoje neba oj 'anal milagros? 30¿Konoje neba ya'tal chike oj cunanel? ¿Konoje neba cojch'a't pa jujun chic ch'a'tem ya'tal ruma ri Ruxlabixel ri Dios? ¿Konoje neba oj k'alajisanel re ri xbi'x ruma junok pa jun chic ch'a'tem ya'tal ruma ri Ruxlabixel ri Dios? Na konoje taj. 31Rayij c'u alak urikic ri chac lic chirajawaxic che riglesia. Yey ri'in canc'ut chi jun be che alak, ri más chirajawaxic wi chwa ronoje wa', e ri rutzil c'u'xaj.
Currently Selected:
1 Corintios 12: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
