1 Corintios 10

Ri k'atbal tzij xu'an ri Dios puwi rutinamit ojertan

1Hermanos, mic'ow chic'u'x alak ri xquic'ulumaj ri kati'-kamam e aj Israel ojertan. Echiri' rique xebin chupa ri luwar catz'intz'otic, ri Dios xutak lo jun sutz'#Éx. 13:21 paquiwi' y echiri' xebopon chuchi' ri mar, xebuto'o cha' conoje xquik'axuj ri mar.#Éx. 14:22 2Conoje c'u rique junam ruc' ri Moisés e pacha' xquic'ul ri bautismo echiri' xebic'ow chupa ri mar ruc' ri sutz' paquiwi' y ri ya' pa tak quitzal. 3Yey conoje rique xquitij ri maná petinak chicaj,#Éx. 16:4, 35 ri xutak lo ri Dios chique. 4Jec'ula' conoje xquitij ri ya' xel lo chupa jun pec.#10:4 “Pec”: Pa caxtila wa' cabi'x “peña” che. Wa ya' e ri xuya lo ri Dios, y wa pec que'elawi e ri Cristo,#10:4 Che wa jun pec xel lo ri ya' lic chirajawaxic chique ri e aj Israel. (Éx. 17:6) Jec'ula' che ri Cristo, petinak wi lo ri lic chirajawaxic che ri kac'aslemal chwach ri Dios. ri xerachbilaj rutinamit che ri quibenam. 5Tob ri Dios lic xebuchajij, na ruc' ta c'u ri', lic e q'ui chique xquipetisaj ri royowal ri Dios paquiwi'. Ruma c'u la', xecam can pa ri luwar catz'intz'otic.#Nm. 14:22-23, 35; 16:31-32; 21:6; 26:65

6Ronoje ri xquic'ulumaj rutinamit ri Dios ojertan e c'utubal chikawach ri'oj wo'ora cha' na que'ec ta kac'u'x ruc' ri na utz taj pacha' ri xqui'an rique. 7Ma'an c'u ralak alak aj tioxab pacha' xqui'an jujun chique rique ojertan. Ma jela' tz'ibital can chupa Rutzij Upixab ri Dios: «Rutinamit ri Dios xetz'uyi'ic, xewa'ic y xek'abaric. Tec'uchiri' xeyactajic y xquiya quib chupa ri na utz taj.»#10:7 E xqui'an wa' echiri' xqui'an nimak'ij chwach ri tiox, ri xquitak ri Aarón che u'anic. Éx. 32:6,8 8Maka'an ne ke'oj pacha' xqui'an jujun chique rique echiri' xquetz'abej uwa quik'ij cuc' jujun chic na quic'ulel taj, yey ruma la' xecamisax xa pa jun k'ij laj veintitres mil chi achijab.#10:8 Wa' xu'ano echiri' rachijab aj Israel xesiq'uix cuma rixokib na e ta aj Israel cha' caqui'an nimak'ij chwach ri quitiox. Xquiyoj c'u quib ri' rachijab cuc' rixokib e aj tioxab y ruma wa' xpe royowal ri Dios cuc'. Ec'u ri xu'an ri Dios e xtakan che quecamisax wa' wa'chijab. Nm. 25:1-5,9 9Makac'am upa ri Dios Kajawxel pacha' xqui'an jujun chique rutinamit echiri' xquipetisaj royowal ri Dios ruma xeyajan chirij. Yey ruma c'u ri' xecamic ma xeti'taj cuma cumatz.#Nm. 21:4-6 10Mayajan c'u alak chirij ri Dios pacha' xqui'an jujun yey ruma c'u ri', ri Dios xutak lo jun aj 'Anal Camic paquiwi'.#Nm. 16:41-49 11Ronoje c'u ri xquic'ulumaj rutinamit ri Dios ojertan e c'utubal chikawach ri'oj wo'ora cha' na caka'an ta ke'oj pacha' ri xqui'an rique. Ronoje c'u wa' tz'ibital canok re pixabanic chike ri'oj, ri oj c'o che tak ri q'uisbal k'ij re ruwachulew. 12E uwari'che, we c'o junok cuch'obo catiqui' jusuc', e lic chuchajij c'u rib ri' cha' na catzak taj. 13We cac'am pa alak, mabi'ij alak: «Xew ri'in quinic'owiben wa'», ma konoje ri oj ticawex cojic'ow chupa wa'. Na ruc' ta c'u ri', cubul kac'u'x ruc' ri Dios, ma Rire na cojrok'otaj ta q'uenok y na cuya ta luwar cape juna c'ambal kapa we na ya'tal ta chike cakach'ij ruc' ruchuk'ab Rire. 14Ruma c'u ronoje wa nubi'im lok, campixabaj alak hermanos, ri lic c'ax canna' alak: Lic chajij ib alak cha' na catzak ta alak chupa ri quilok'nimaxic uk'ij tak ri tiox.

15Weta'am lic c'o na'oj alak cha' camaj alak usuc' ri cambi'ij. Ch'obo pe c'u alak chi utz puwi wa cambi'ij we katzij. 16Echiri' cakachap ri c'olibal c'o vino chupa, cuxtabal re ruquiq'uel ri Cristo xturuw kuma ri'oj, cojtioxin chwach ri Dios. Echiri' cakatij c'u wa', ¿na e ta neba coju'an xa jun ruc' Rire? Jec'ula' echiri' cakatij ri pam cuxtabal re rucuerpo xya' pa camic, ¿na e ta neba coju'an xa jun ruc' Rire? 17Wa' wa pam xa jun, tob cawech'ic y cajach chike. Jec'ula' ri'oj, tob oj q'ui, xa jun kawach ma konoje junam cakatij wa pam.

18Chilape alak ri caqui'an ri e aj Israel. Echiri' caquitij rawaj ecamisam chwach raltar re ri Dios Kajawxel, ruc' wa' ebare jun caquicuxtaj ri Dios. 19¿Sa' c'u ri cambi'ij puwi tak ri ic'owisam chwach juna tiox? ¿E nawi cambi'ij c'o uwach ri tiox o e c'o uwach rawaj ecamisam chwach? ¡Na e taj! 20Ri cambi'ij e wa': Echiri' ri na queta'am ta uwach ri Dios quekasan ruc' awaj chwach juna tiox, na e ta chwach ri Dios quekasan wi, ma e chiquiwach tak ri itzel uxlabixel. E uwari'che lic na cuaj taj ca'an e alak cuc' ri caquilok'nimaj tak ri itzel uxlabixel. 21Yey na ube ta q'uenok catij alak ri vino re yacbal uk'ij ri Kanimajawal yey catij alak ri vino re yacbal quik'ij ri itzel uxlabixel. Jec'ula' na ube ta nenare' we ralak catij alak ri wa'im chwi rumexa ri Kanimajawal yey catij ne alak ri wa'im chwi ri mexa que ri itzel uxlabixel. 22Ma ¿ca'aj cami alak e capetisaj alak royowal#10:22 Pa ri ch'a'tem griego cubi'ij “achixomanic”. E pacha' juna achi o juna ixok lic na cuc'ul ta c'ana uc'u'x echiri' ruc'ulel que'ec uc'u'x ruc' junok chic. Jec'ula' ri Dios lic cape royowal we ri'oj oj re Rire yey cakayac uk'ij juna tiox. ri Dios ruma x'an e alak cuc' ri caquilok'nimaj tiox? ¿Cach'ij neba alak ruchuk'ab Rire?

Ka'ana ronoje re yacbal uk'ij ri Dios

23E c'o ri quebi'n re: «Panuk'ab c'o wi can'an sa' ri cuaj can'ano» quecha'. Katzij, pero na ronoje taj takal chwe can'ano. «Panuk'ab c'o wi can'an sa' ri cuaj can'ano» quecha'. Pero na ronoje taj cuya nuq'uiyibal chwach ri Dios. 24Na utz ta c'u ri' we junok e xew cutzucuj ri utz chiribil rib, ma ri lic chirajawaxic wi e cutzucuj ri utz chique ri nic'aj chic. 25Ronoje c'u ri cac'ayix pa carnes, utz catij alak; xew matz'onobej alak y mac'o mach'ob ne alak che we ic'owinak chwa juna tiox o na ic'owinak taj. 26Ma jewa' tz'ibital can pa Rutzij Upixab ri Dios:

Ronoje ruwachulew ruc' ronoje tak ri c'o chwach,

re ri Dios Kajawxel Sal. 24:1

cacha'.

27Yey we c'o junok na ucojom ta rubi' ri Cristo cusiq'uij alak pa juna wa'im y ca'aj alak que'ec alak, utz ri'. Ronoje c'u ri cuya chiwach alak, utz catij alak, xew c'u matz'onobej alak y mac'o ne mach'ob alak pa petinak wi. 28No'j we e la' c'o junok cubi'ij che alak: «Wa' ic'owisam chwach tiox,» ri' matij alak ruma ri cuch'ob ri jun xbi'n re wa', tob eta'am chi alak na mac taj catijic. Ma ronoje ruwachulew ruc' ronoje ri c'o chwach, re ri Dios Kajawxel.#Sal. 24:1 29We na catij ta c'u alak wa', e ruma ri cuch'ob ri jun chic hermano, ma chwach rire e mac, tob chiwach ralak na mac taj. ¿Utz c'u nawi we junok chic cak'ataw tzij panuwi' ri'in echiri' can'an ri lic cuna' nuc'u'x utz can'ano? 30Yey we cantioxij che ri Kakaw janipa ri caya' chwe pa wa'im, ¿su'be c'u ri' quinch'a'tibexic?

31Ruc' c'u ri wa'im y ri mik'ina' catij alak o tob sa' ri ca'an alak, ri lic chirajawaxic wi e 'ana alak ronoje re yacbal uk'ij ri Dios. 32Ma'an ralak alak latz'anel chique ri jujun chic, tob e aj judi'ab o na e ta aj judi'ab; ma'an ne alak wa' chique ri quicojom rubi' ri Cristo. 33Ri'in ruc' ronoje ri can'ano, e can'an ri utz chique conoje. Na cantzucuj ta c'u ri utz xew chiwibil wib ri'in, ma e cantzucuj ri utz que conoje cha' jela' caquirik ri chomilaj c'aslemal re ri Dios.

Currently Selected:

1 Corintios 10: acrT

Highlight

Copy