Colosenses 2

1Napaꞌ nemneñ oꞌch señoch attho napaꞌ eꞌñe nellkëñothes sa atarr nanak nethorrena sokop. Eꞌñe atthekma nethorrena ñamha laodiceoꞌmarneshakop, amaꞌt ñamha allowenakop ñeñth ama poentarno. 2Allochñapaꞌ atthochña eꞌñe soksherra seyoxhrowen attho eꞌñe semorrentannaꞌteñothpaꞌ oꞌch eꞌñe separrokmaterr. Atthochña xhaponasa seyoxhro atthoch atarr es señotyerr. Oꞌch señoterr ñeñth ama eñoteteꞌthe awathotheñ, ñeñthpaꞌ ñapthaña Yompor eñoteneꞌ. Ñeñthpaꞌ eꞌñepaꞌtkaꞌye Cristeshoꞌtsenña 3allowen paꞌnamen eñoteñets ñeñth nanak koxhneshareꞌ yentyen. Ñeñthpaꞌ eꞌñe yeyemteñotha Cristo eshekchaꞌ yeñoterrña ñeñth amaꞌt awathapaꞌ ama eñotpawo. 4Ñeñthoꞌmarña napaꞌ ateth notenes allochñapaꞌ sapaꞌ amach eseshaꞌ seshkërraye amaꞌtchaꞌ kothapeꞌchatyesaset ñeñth atarr kowen ñoñets sentyerreñ. 5Amaꞌtchaꞌ ama alloꞌtsenno eꞌñe na tharraña neyerpoeñothes neyoxhropaꞌ eꞌñe parroꞌtsaꞌyenakmay. Sapaꞌ eꞌñech noksheñeshaꞌ nentyenes attho eꞌñe kowenareꞌ es sorrtatyen. Ñamha nentenes attho eꞌñe sameꞌñeñoth Cristo oꞌ eꞌñe womenk sephaꞌyen seyoxher ñokop.

6Attho oꞌ sagapoer Yepartseshar Cristo Jesús, theꞌña sapaꞌ alloꞌnepaꞌch sesen eꞌñe parrokmatats epas. 7Atthochña sapaꞌ eꞌñech womenk serrmoerrñañ poꞌñoñ ateth ñerraꞌmrratheꞌ tsachrexh atarr womenk rromoenan pats, eꞌñe separrokmateñoth epaspaꞌ alloꞌnepaꞌchña atonetnomaña ñeñth attho sameꞌñena. Eꞌñe sameꞌñeñothpaꞌ womenkëpaꞌchña sephaꞌyesnom seyoxher. Attherepaꞌchña alloꞌna sesen ñeñth ateth yexhatyenes. Ñamha xhokmoepaꞌchña separasyosoꞌchña Yompor.

Eꞌñe yameꞌñeñoth Cristopaꞌ oꞌch yeswanomña ateth moenatyesyeꞌth yechets

8Señotaꞌthach allochña sapaꞌ amach eseshaꞌ seshkërraye. Ñatoꞌrraña poꞌpoñ kothaphñatsothpaꞌ xhatheꞌ shekërrset. Ñeñth kothaphñatserpaꞌ eꞌñe orrena tharroꞌmar ñeñthpaꞌ attha shekënset. Ñeñthpaꞌ arromñatha aꞌmhteneꞌña pokthaphña ñeñth attho shekareꞌtyenet. Ñeñthpaꞌ patsoꞌmarnesha, ñeñthñapaꞌ ama poktenanoña Cristo pokthaphña.

9Tharroꞌmar Cristo attho acheñetos ñepaꞌtña chorrenayaña allowen Yompor poꞌpartsoña. 10Sapaꞌ eꞌñe separrokmateñoth Cristo saꞌnaña chorrapretenayaña Parets. Ñeñth allowen allpon amhchaꞌtarethetyestsa, Cristoñapaꞌ eꞌñe ñaptha atarr sherben. Ñamha allowen ñeñth allsensarethetyestsa, ñañapaꞌ eꞌñe ñaptha atarr sherben. 11Sapaꞌ eꞌñe separrokmateñoth Cristo theꞌpaꞌ seswanom ateth moenatyesaseꞌth sa sechets. Ñeñthpaꞌ ama añotheyeꞌ weno oꞌch setsorratannena eꞌñe sañeña sechets ñeñth ateth yexhena judioneshaꞌ. Ñeñthpaꞌ Cristeshothña wena eꞌñe seyemteñoth ña. Ñeñthoꞌmarña eꞌñe separrokmateñoth Cristopaꞌ theꞌña sapaꞌ oꞌ seyomporenaꞌtarterra eꞌñe poꞌñoxh. 12Tharroꞌmar allempo sapatarethta Yomporekop sapaꞌ añ setmaꞌntena ñerraꞌmrratheꞌ xho sepampapreteña Cristo. Elloña eꞌñe sa sameꞌñeñothpaꞌ atthoña oꞌ setantapreteraña Cristo. Tharroꞌmar sapaꞌ añ sameꞌñateꞌ attho Yomporpaꞌ orrtatan poꞌpartsoteña allo tantaterran Poechemer allempo rroma. 13Awath sapaꞌ soꞌchñarothña ama es sokthapeꞌchperraꞌ seyoxhro amaꞌt eꞌñe mamesha ñeñth kowentetsa Yomporekop. Eꞌñe ateth sepeꞌth ñerraꞌm poꞌpoñ acheñ ñeñth ama Yomporenaꞌtareyaye. Ñeñthoꞌmarña sapaꞌ xha sotteꞌth ñerraꞌmrratheꞌ sekamkëñpaꞌ xha rromoen. Tharraña theꞌña Yomporpaꞌ oꞌ apoerres atthoch sapaꞌxhoꞌña korretsasach eꞌñe ateth pena Cristo, tharroꞌmar ñapaꞌ oꞌ peretnaꞌwerrnas allowen soꞌchñar. 14Tharroꞌmar ñapaꞌ oꞌ eꞌñe eꞌshowerrnay ñoñets ñeñth oꞌ kellkaꞌwetañ alloch yotteñeꞌcharethterrañ ya, ateth oten ñoñets ñeñth ateth anareth awathotheñ. Ñeñth ñoñets Paretsñapaꞌ alla aꞌwañatamperrey ateth ñerraꞌmrratheꞌ ñeñth apatarethtetsa korsocho. 15Ñeñthña amhchaꞌnoxhetyetsa añe patsro amaꞌt ñamha ñeñth womenk entyetsapaꞌ Cristoñapaꞌ eꞌñe poerratampeswerranet allo amhchaꞌnoxhetyenet. Attho rroma korsocho allothña eꞌñe aꞌmtsoññetwerranet. Allempoñapaꞌ orrtatanet allowenet acheñeneshesho atthoch ñetpaꞌ eñochet ñeñthpaꞌ oꞌ aprratarethterra poꞌwamenk.

16Ñatoꞌt sameꞌñeñaꞌña amaꞌt erraꞌtsena acheñer ñeñthchaꞌ soteꞌ sa amoꞌ pokteyaye ñeñth attho es serraꞌyen amaꞌt ñamha attho es sorryen. Ñamha amach sameꞌñatsche ñeñthchaꞌ soteneꞌ sapaꞌ amoꞌ setsotenoña añ yethñatser ñeñth allpon anaꞌyesareth judioneshakop, amaꞌt allempoch xherrerr patheꞌtets char, amaꞌt ñamha allempoch eꞌñe errteꞌ orrterrtsa poemhaꞌtets arrorr. Ñamha amach sameꞌñatsche ñeñthchaꞌ soteneꞌ sapaꞌ añoꞌ setsotenoña ñeñth yethñatser ñeñth anareth allempokma yamesen. 17Ñeñthpaꞌ paꞌchoyesheꞌmakaꞌye peñña ñeñth wapatsa. Ñeñth wapatsapaꞌ poꞌñoxhpaꞌ ñeñthkaꞌyeña Cristo ñeñth atarr sherbets. 18Ñamha amach sameꞌñatsche ñeñthchaꞌ soterreꞌ sapaꞌ añoꞌch sagërroña atthoch koshaterres Yompor tharroꞌmar sapaꞌ añoꞌ attheyeꞌ sepeno ñeñth ateth penet ñet. Ñeñth acheñer ateth, ñetpaꞌ aña kothapeꞌchyenet oꞌch moeroxhtatenet eꞌñe ñañeñeta, tharraña ñetpaꞌ pommoꞌcheñotha ateth penet ñeñth poꞌñoxhpaꞌ ama es sherbeno Yomporekop. Ñeñthoꞌmarkaꞌyeña ñetpaꞌ añakaꞌye maꞌyochyenet Yompor poꞌmhllañotheñer. Ñamha ñetpaꞌ aña nanak yemtenet ñeñth entpesaꞌtyenetañ. Pokthaphñothet ñeñth eꞌñe ñeta poꞌchtsothet wena, ñetpaꞌ ñeñtha atarr ommoꞌchenet, ñeñthoꞌmarña ñeñthpaꞌ eꞌñe orrena ateth penet. 19Ñetpaꞌ ama parrokmateñeto Cristo ñeñthoꞌmarña ama poeyoxhreyeꞌ peñetoña Cristo. Ñewa, yapaꞌ yoten yeyoxher#2.19 Oꞌch sekweꞌ nota 1.18. ñeñthña atarr sherbets tharroꞌmar ñeñth atarrtateneꞌña ora yechets. Ateth pena yellokëmh ñamha yechtsorexh ñeñthña orreneꞌña yechets ñeñthoꞌmarña eꞌñe parrokmatateñ atthoña ora yechetspaꞌ atarrtena. Ateth penaña Cristo ateth ñerraꞌm poꞌñoxh ñeñth yeyoxher yepen. Alloweney ñeñthey ameꞌñaꞌyenaya Cristo eꞌñe parrokmatateney, allochña yapaꞌ alloꞌnach yesen orrtatyesnomoeꞌ ñeñth atarr sherbets Yomporekop tharroꞌmar yapaꞌ ateth moenateney Yompor.

20Sa attho oꞌ serromapretera Cristo ñeñthoꞌmarña añ kothaphñatser arr patsro ñeñth arromñatheneshaꞌ pokthaphña, ñeñthpaꞌ amakaꞌye sokpayaye. Sa attho oꞌ serromapretera Cristo ñeñthpaꞌ añekop atthoch sekexhpoerrñañ arromñatheneshaꞌ pokthaphña. Theꞌñapaꞌ esoꞌmareꞌtchaꞌña alla sameꞌñerrerrña patsoꞌmar kothaphñats. Ñatoꞌtña sameꞌñenaꞌña ñerraꞌm esempo otenset: 21“Amach es saꞌphllatsetyesatsto, amach es serratseꞌtyesatsto, amach es sechtaꞌyesatsto.” Tharraña ñeñthpaꞌ eꞌñech orrena ateth otenset, 22tharroꞌmar ñeñth allowen ñeñth añe patsroꞌtsen ñeñthpaꞌ eꞌñekaꞌye eꞌnwapoꞌ. Ñerraꞌm yeꞌnwepaꞌ oꞌch eꞌñe wañ. Ñeñthoꞌmarña ñeñthchaꞌ ateth sotyeseꞌ ñeñthpaꞌ arromñathakaꞌye pokthaphña yexhatenset. 23Ñetpaꞌ poꞌñoxhpaꞌ orrtenetañ ateth ñerraꞌm esokmañen eñotwenetañ ñeñth kowentetsañ tharroꞌmar poemaꞌyoxhreñothetpaꞌ moechatseꞌtyenet, ñamha ñetpaꞌ eꞌñe ñañeñeta moeroxhtatetset poꞌchets, tharraña eꞌñe pommoꞌcheñotheta ateth penet. Tharraña ñeñth ateth penet ñeñthpaꞌ amaña añeyeꞌña ateth peneto alloch wenaterret ñeñth ateth moenatseꞌtatyenanet poꞌchets paꞌnamen sosyaꞌtsañexhno.

Currently Selected:

Colosenses 2: ame

Highlight

Copy