Colosenses 1

Attho Pablopaꞌ kellkan carta añekop ñeñth ameꞌñetsa anetso Colosaso

1-2Masheñneshachaꞌ ñamha noxhaneshachaꞌ ñeñthes oꞌ poeyochreshaꞌ perres Parets eꞌñe seyemteñoth Cristo, sa ñeñthes yexhetsa all anetso Colosaso. Na Pablon sekellkëneꞌña añ carta epan masheñ Timoteo. Napaꞌ ñeñthen Cristo Jesús poellsensaren tharroꞌmar ateth moenatenen Yompor. Eꞌñe newomhchaꞌteñothes sa napaꞌ oꞌch notas: Yomporepaꞌch Parets sebensareꞌtampeneꞌ ñepaꞌchña sokshateneꞌ eꞌñe sa seyoxhro allowenes.

Arrpaꞌ all parasyosoꞌteñet Yompor ñokpoet

3Yapaꞌ allempo yemaꞌyochampensapaꞌ xhokma yeparasyosoꞌteñ Yompor, ñeñthara Yepartseshar Jesucristo Pompor. 4Tharroꞌmar yapaꞌ oꞌ yeꞌmareꞌtas attho sapaꞌ atarr sameꞌñeña Cristo Jesús. Ñamha yeꞌmareꞌtenes sapaꞌ atarr semoereña allowen ñeñth poeyochreshaꞌ pen Parets. 5Ñeñthpaꞌ tharroꞌmarña sapaꞌ ateth atarr seyemteña sapaꞌ eꞌñe sameꞌñeñoth Cristopaꞌ sapaꞌ añ atarr seyemtena ñeñth oꞌpatatensa all poeꞌntaño. Ñeñthña sapaꞌ awañotheñ seꞌmhñotenña kowen ñoñets ñeñth eꞌñe poꞌñoxh Yompor poꞌñoñ alloch yekeshperra. 6Ñeñthña kowen ñoñets ñeñth xhapats sesho ñeñthña theꞌpaꞌ allemeñ xhapyen, allpaꞌxhoꞌña nanak ameꞌñatenana shonteꞌ acheñeneshaꞌ. Allpaꞌ alloꞌna senet orrtatyeset ñeñth eꞌñe kowen enten Yompor. Ñetpaꞌ eꞌñe ateth penet ateth sepena samha. Sa poꞌñoxh allempo errtes eꞌmoerreꞌ Yompor poꞌñoñ attho ñapaꞌ atarr morrentenya, sañapaꞌ eꞌñe allempotheñ xhaponasa seyoxhro ñeñthña ñoñetspaꞌ eꞌñe poꞌñoxh Yomporo poꞌñoñ. Allempotheñña sapaꞌxhoꞌña alloꞌna sesen orrtatyesnomoeꞌ ñeñth eꞌñe kowen enten Yompor. 7Ñeñthara kowen ñoñets ñeñth ñanom yexhatas masheñ Epafras. Ñapaꞌ ñeñth eꞌñe parrokma yethorrena Yomporekop, atarr yemoerannena. Ñapaꞌ xhokma atarr kowen thorrena Cristokop ñeñthñapaꞌ eꞌñe sokop. 8Ñapaꞌ eꞌñe kowen eñotatwerrey attho sapaꞌ atarr semorrentannena eꞌñe sameꞌñeñoth Cristo.

Arrpaꞌ all maꞌyochampeñet colosasoꞌmarneshaꞌ

9Ñeñthoꞌmarña allempo yeꞌmareꞌtas allempotheñ yapaꞌ ama yekexhpoeno semaꞌyochamphsaya Yompor. Yapaꞌ añ yenamoennas Yompor: Sapaꞌ xhokmoepaꞌchña eñotatenes ñeñth ateth moenen ña ñeñthchaꞌ ateth sephaꞌyes eꞌñe kowen ñokop. Ñamha xhaponasepaꞌch seyoxhro ora allowen ñeñth atarr kowentetsa yekamkëñekop. 10Allochñapaꞌ oꞌch eꞌñe seyxherr ñeñth ateth poktetsa allowenakop ñeñthey poeyochreshaꞌ pen Yepartseshar. Allochñapaꞌ atthochña eꞌñe sokshateñ. Eꞌñe attho es kowen sorrtatyenpaꞌ nanakchaꞌ kowenoth sesherbeñ. Alloꞌnepaꞌchña sesen eñotnomoeꞌ ñeñth ateth penaña Parets. 11Ñamha añ yenamoennas Yompor: Poꞌpartsoteña ñeñth kowenñatsotetspaꞌ eꞌñepaꞌchña awamenkath phaꞌyesas eꞌñe poktakma allochñapaꞌ amach xha sekexhpatstere. Eꞌñechña soksheñeshaꞌ saꞌwantaꞌwanomña allowen ñeñth atarr echarr sentyen. 12Ñamha sapaꞌ xhokmoepaꞌch separasyosoꞌch Yompor tharroꞌmar ñapaꞌ aꞌpoktaterrnay atthoch yagapapreter yamha ñeñth oꞌpatatenana allowen poeyochreshaxhno. Ñeñthñapaꞌ ñeñth poꞌkowenña pen ñeñth atarr kowentetsa allñapaꞌ poetaretsa. 13Tharroꞌmar theꞌ Yomporpaꞌ oꞌ cheterrey chekmetoth all amhchaꞌnoxhtena oneñeth. Theꞌña yapaꞌ oꞌ xhapaterrey poꞌkowenño all ayochreshathtena eꞌñe ña Poechemer ñeñth Jesucristo ñeñth atarr morrentena ña. 14Ñeñthña Jesucristo ñeñthña rromats yokop ñapaꞌ atthoña eꞌñe tsaꞌtwerrnayaña yoꞌchñar atthoch eꞌñe peretnaꞌwerrnay yoꞌchñar eshekchaꞌña eꞌñech kowen aꞌkeshphaterrey Yompor.

Allempo ashatarethta Cristo poꞌrras korsocho, ñeñthña eꞌñe aꞌmchechatweꞌña allowen esokmañen

15Yompor Paretspaꞌ ama entpawo, tharraña Cristoña amaꞌt entpoꞌpaꞌ ñapaꞌ eꞌñe parro atthekma ñerraꞌm Pompor Parets ñeñth ama entpawoyaye. Ora allowen allpon eñalletyestsa, Cristoñapaꞌ eꞌñe ñanom eñall ñeñthchaꞌ pomnaren penawet allowenet. 16Allowen ñeñth allpon ayexhkatarethetyestsa ña eꞌñe yexhkatwawet, amaꞌt ora allpon ñeñth entoꞌtsaꞌyen ñeñth ama entpawoyaye ñamha allowen ñeñth yentyen arr patsro, eꞌñe ñokma poeyexhkatwar. Ñamha allowen ñeñth allpon amhchaꞌtarethetyestsa, ñamha allowen ñeñth allpon ayochreshathetyestsa, ñamha allowen ñeñth allpon amhchaꞌnoxhetyestsa errakmañen, amaꞌt ñamha allowen ñeñth allpon womenk entyestsa, ora allowenet ñeñthet ayexhkatarethet eꞌñe ñokma poeyexhkatwaranet. Eꞌñe ñokpakma ayexhkatarethetyeswawet. 17Ora allpon ñeñth esokmañen eñallpaꞌ ñañapaꞌ eꞌñe ñanom eñall. Ora allpon ñeñth esokmañen eñallpaꞌ ñapaꞌ ña orratyenawet. 18Cristoñapaꞌ yeyoxher#1.18 Ñewa, poꞌñoxh Cristopaꞌ arr atmaꞌntatareth ateth ñerraꞌmrratheꞌ ñeñth yoñ yepen. yephoweñ alloweney ñeñthey parrokmatenaya eꞌñe yameꞌñeñoth ña, tharroꞌmar ñapaꞌ ña yokthapeꞌchateneꞌ eꞌñe kowen alloweney ya ñeñthey eꞌñe poꞌchets phoweney. Ñeñthoꞌmar Cristopaꞌ pomnaren peney alloweney ñeñthey ameꞌñenaya ña. Ñapaꞌ eꞌñe ñanom orrtateneꞌ allochña yapaꞌ korretsayach alloweney ñeñthey eꞌñe poꞌchets phoweney eꞌñe yeparrokmateñoth epay ña. Ñamha ñapaꞌ ñanom tanterrtsa rromoth, ñeñthñapaꞌ ellochña nanak sherberr. Ñeñthpaꞌ tharroꞌmar ateth pha allochñapaꞌ ora ñeñth esokmañen allpon eñall, ñetñapaꞌ Cristochña eꞌñe ñanom nanak kowen entyenet. 19Pompor Parets eꞌñe pokteꞌ enteñ oꞌch eꞌñe kowen chorrateña ora allowen poꞌpartsoña. 20Ñañapaꞌ eꞌñe alla parrokmaten Pomporesho eꞌñe parrokma allowen esokmañen, amaꞌt ñeñth patsoꞌtsaꞌyen, amaꞌt ñeñth entoꞌtsaꞌyen. Allempo ashatarethta Cristo poꞌrras korsocho, ñeñthña eꞌñe aꞌmchechatweꞌña allowen esokmañen.

21Amaꞌt sa awathpaꞌ atarr ellapharoꞌtsaꞌyenes Yomporeshoth. Eꞌñe seꞌmoñeꞌteñoth Yompor seyoxhro sañapaꞌ aña seyexhkatyeseꞌth ñeñth ama kowenayaye. 22Tharraña theꞌña Yomporpaꞌ oꞌ eꞌñe parrokmataterres eꞌñe ñesho. Ñewa, allempo amoeroxhtatarethta Cristo eꞌñe ña poꞌchtso attho rroma, ñeñthpaꞌ atthochña eꞌñe parrokmataterres samha. Oꞌ eꞌñe parrokmataterres atthothña sapaꞌxhoꞌña oꞌ saꞌkowentatarethterra Partsokop, ñamha atthoch amach saꞌthanmarethterro, amach eñalle atthoch sotteñeꞌcharethterra. Theꞌpaꞌ atethkaꞌye enterresña Yompor. 23Ñerraꞌm poꞌñoxh xhokmach sameꞌñera Cristo, ñerraꞌm eꞌñech womenk seperr seyoxher atthochña sapaꞌ amach sepoerrerro. Kowen ñoñets ñeñth oꞌ seꞌmwa alloch yekeshperra ñerraꞌm amach xha saꞌypoꞌñampere ñeñth oꞌ seyemterra Yomporñapaꞌ enterreschaꞌ oꞌ eꞌñe saꞌkowentatarethterra. Añ kowen ñoñets ñeñth oꞌ seꞌmareꞌtwa sa, theꞌñapaꞌ aserrpareꞌtatarethterrach ñamha allowen ñeñth korraꞌyetsa añe patsro. Ñeñthoꞌmarña na ñeñthen Pablon nach sherberrets theꞌñapaꞌ nach serrpareꞌtaterrawet.

Attho Pablo aꞌpothan ñeñth awathotheñ ama eñotpawo

24Theꞌña na eꞌñe nemoeroxhteñoth sokoppaꞌ atarr nokshena. Eꞌñe nemoeroxhteñoth nechtsopaꞌ ñeñthpaꞌ atthoña netsotatennas allpon ñeñth palltetsa atthoch nemoeroxhtaprecha Cristo allowenakop ñeñth ameꞌñenaya ña ñeñth eꞌñe poꞌchets pen Cristo ñeñth eꞌñe aꞌparrokmataten. 25Ñeñthoꞌmarña theꞌpaꞌ nach sherberreꞌ allowen ñeñth ameꞌñenaya Cristo. Ateth llesensenen Parets eꞌñe sokop, atthochña napaꞌ oꞌch eꞌñe naꞌpothwerrñañ ora Yompor poꞌñoñ. 26Añchaꞌ naꞌpotherr ñeñth amaꞌt awathapaꞌ ama eseshayeꞌ eñotayeꞌthe eꞌñe yatañneshapotheñ tharroꞌmar allempopaꞌ ama xhenaꞌ allempoch eñotaterranet Yompor. Tharraña theꞌñapaꞌ eꞌñe eñotaterrey Yompor alloweney ya ñeñthey poeyochreshaꞌ pen Parets. 27Theꞌña Yomporpaꞌ atarr moeneñ oꞌch eñotaterrey ñeñth atarr koxhneshareꞌ ñeñth poꞌkowenña eꞌñe awathotheñpaꞌ ama eseshayeꞌ eñotayeꞌthe. Theꞌña ñeñth poꞌkowenñapaꞌ oꞌ eꞌñe orrtatarethterra añekop amaꞌt ñeñth ama judioneshayaye. Ñeñthña ama eñoteteꞌthe awathpaꞌ, ñeñthñapaꞌ añepaꞌt Cristo ñeñth chorrenaya yeyoxher. Atthoña eꞌñe yeyemteñoth ña yañapaꞌ oꞌch yekowentapretera.

28Ñeñthoꞌmarña Cristopaꞌ xhokmach yaꞌpotheñ. Eꞌñechña kowen yokthapeꞌchatyeñ allowen amaꞌt erraꞌtsena acheñer. Ñamha eꞌñech kowen yeyxhatyeñña allowen amaꞌt erraꞌtsena acheñer atthochña ñetpaꞌxhoꞌña eꞌñech eñotyeñet ñeñth ateth pena Cristo. Atthoña eꞌñe poeyemteñothet Cristopaꞌ oꞌch ameꞌñeñet eꞌñe poktakma. 29Ñeñthoꞌmarña napaꞌ nanak nethorrena ñokop. Eꞌñe poꞌwamenko ñeñth atarr awamenkath nepeneꞌ atthoña napaꞌ xhokma atarr nethorraꞌyena ñokop.

Currently Selected:

Colosenses 1: ame

Highlight

Copy