2 Timoteo 3
3
Ñeñthchaꞌ ateth perra esempoch mellapoterrmocha
1Ñewa, theꞌpaꞌ oꞌch neñotataph poꞌpoñ ñeñthchaꞌ ateth perra esempoch mellapoterrmocha. Allempopaꞌ nanakchaꞌ echarr atthoch yoktheꞌ Cristo. 2Tharroꞌmar allempopaꞌ atethchaꞌ perra acheñeneshaꞌ. Allempo acheñpaꞌ nanakchaꞌ moparrareret, ñamha añach patherr kothapeꞌchenet ñeñth ateth moenenet eꞌñe ñokpoeta. Ñamha allempopaꞌ nanakchaꞌ yeꞌchapretenet kelle. Ñamha allempopaꞌ nanakchaꞌ ommoꞌchenet ñeñth echyenet, atarrchaꞌ kowen entyerret eꞌñe ñañeñeta, poꞌpotantaññapaꞌ amach esoyeꞌ asherben entyereto. Ñamha allempopaꞌ nanakchaꞌ achmhareꞌteret Yompor, ñamha allempopaꞌ oꞌwañchaꞌ ameꞌñyet amaꞌt ñeñth pamoꞌmteꞌ penet, ñamha ñetpaꞌ amach es koshatenaweto amaꞌt koñeꞌtha. Ñamha allempopaꞌ nanakchaꞌ tsenaꞌteret allowen ñeñth anareth Partsokop. 3Ñamha allempopaꞌ oꞌwañchaꞌ eseshaꞌ moerannaꞌterrtsa, ñamha oꞌwañchaꞌ moenet oꞌch amoꞌtstannaꞌterret. Ñamha allempopaꞌ nanakchaꞌ tomaꞌtamphsannaꞌtyerret ñamha allempopaꞌ errothenxhoꞌ moenetpaꞌ atethchaꞌ phatseꞌtyenet, ñamha allempopaꞌ nanakchaꞌ moeroxhtatannaꞌtyerret atthoch nanak koshenet, ñamha nanakchaꞌ tsenaꞌterret ñeñth kowentetsa. 4Ñamha nanakchaꞌ apomatatañterret, ñamha allempopaꞌ amach es yepoer entyerreto, ñamha allempopaꞌ eꞌñech ñañeñeta nanak kowen entetset, ñamha allempopaꞌ ñañeñetach eꞌnenet alloch nanak koshenet, amachña añeyeꞌ eꞌneneto ateth moenen Yompor. 5Ñamha allempopaꞌ amaꞌtchaꞌ ottenetañ ñerraꞌmrratheꞌ ameꞌñenetpaꞌ, tharraña amach poꞌñoxhayeꞌ ameꞌñeneto. Tharroꞌmar ñetpaꞌ amach poꞌñoxhayeꞌ moeneñeto oꞌch xhapanet poeyoxhro ñeñth kowentetsa Yomporekop atthoch womenk phaꞌnmoet poeyoxher eꞌñe poꞌñoxh.
Ñeñth ateth acheñpaꞌ amach pekwaꞌphsatsche. 6Tharroꞌmar ñeñth acheñ atethpaꞌ atthach moeneñ oꞌch shekaꞌyesan acheñeneshaꞌ. Ñatoꞌ oꞌch awanmoet poꞌppawñoꞌmarpaꞌ ñerraꞌm beꞌthoset aꞌnawa pokollopaꞌ añña koyaneshaxhno ñeñth ama es eñotopaꞌ oꞌch attha ameꞌñateñet eꞌñe ñet pokthaphñet. Tharroꞌmar ñeñth koyaneshaxhnopaꞌ nanakchaꞌ yorateñet poꞌchñar. Ñamha ñetpaꞌ añach eꞌnenet paꞌnamen ñeñthchaꞌ koshatenawet. 7Ñeñthoꞌmarña añ koyaneshaxhnopaꞌ paꞌnamenchaꞌ topatyenetañ kothaphñats. Tharraña amaꞌt awathapaꞌ amach errothenoth enterreto ñeñth poꞌñoxh Yompor pokthaphña. 8Yakma ñeñthchaꞌ ateth shekërreꞌ acheñeneshaꞌpaꞌ ñeñthpaꞌ aña moenen oꞌch epatareꞌtan añ kothaphñats ñeñth eꞌñe poꞌñoxh Yompor pokthaphña. Ateth pha ñamha awath Janes epoet Jambres ñeñth moenatseñ oꞌch epatareꞌtan Moisés. Ñeñth yakma ñeñth ateth shekëneꞌ acheñeneshaꞌpaꞌ amach kothapeꞌchenano ñeñth kowentetsa amaꞌt mamesha. Ñetpaꞌ xhach aꞌpoꞌpoñetenet ñeñth ateth yameꞌñena. 9Tharraña ñet pokthaphñetpaꞌ amach allowenakmayeꞌ anetsoꞌmar epoerro tharroꞌmar esempopaꞌ ñatoꞌ allowen acheñeneshaꞌpaꞌ oꞌch eñotwet ñeñth ateth otatseꞌtyenetpaꞌ ñeñthpaꞌ shekëñtsa. Ñatoꞌ atethchaꞌ pha ateth pha awath epsheña yakma ñeñth moenatseñ oꞌch epatareꞌtaneñ Moisés.
Arrpaꞌ all kothapeꞌchatan eꞌñe kowen Timoteo
10Tharraña phapaꞌ ama attheyeꞌ pepeno. Tharroꞌmar phapaꞌ añ phokthaꞌnen ñeñth ateth nepena na. Ñamha phapaꞌ peñotwennan ñeñth ateth neyxhatyen Yomporekop, ñamha ñeñth ateth nokrrena eꞌñe kowen Yomporekop, ñamha attho eꞌñe pathrra nemaꞌyoxhrena ñeñth kowentetsa. Ñamha phapaꞌ peñotweñ ñeñth ateth nanak neyemteña Yompor ñamha attho nanak naꞌwanten allowen ñeñth echarr nentyen, ñamha attho nanak nemorrenteña allowen acheñeneshaꞌ, ñamha attho amaꞌt nemoeroxhteñothpaꞌ xhokma noktheñ Cristo. 11Ñamha peñotweñ attho poeꞌmoñeꞌteñothetanpaꞌ xhokma kothareꞌtneteꞌth attho moeroxhtatyesneteꞌth. Ñamha amaꞌt phapaꞌ peñotweñ ñeñth ateth moeroxhtatyesnet aꞌyo anetso ñeñth paꞌsoꞌcheñ Antioquío, ñamha Iconio, allothpaꞌ ñamha Listro. Tharraña amaꞌt ateth phaꞌyesneteꞌthpaꞌ Yomporñapaꞌ xhokma aꞌkeshphatyesneꞌth alloth. 12Ñewa, yapaꞌ yeñoteñ erraꞌtsenchaꞌ moenats oꞌch kothan eꞌñe kowen Cristo Jesúspaꞌ xhokmach moeroxhtatanet ñeñth eꞌmoñeꞌtenawet. 13Tharraña ñeñth ama kowenayaye acheñpaꞌ alloꞌnach senet phatseꞌtnomoet sosyaꞌtsañ. Ñamha ñeñth attha shekaꞌyetspaꞌ alloꞌnach senet shekannaꞌtatset.
14Tharraña phapaꞌ xhokmach phokthapeꞌch ñeñth ateth ayxhataretheph, ñeñthara ñeñth amaꞌt phapaꞌ oꞌ peñoter ñeñth eꞌñe poꞌñoxh kowen kothaphñats. Tharroꞌmar phapaꞌ peyemtenya ñeñthey peyxhateꞌ awathotheñ. 15Ñamha phapaꞌ eꞌñe cheshotheñ ayxhataretheph Parets poꞌñoñ ñeñthara añ ñoñets ñeñth peñotaterreꞌ attho eꞌñe yameꞌñeñotha Cristo Jesúspaꞌ oꞌch yekeshperra. 16Allowen Yompor poꞌñoñ ñeñth akellkarethpaꞌ eꞌñe Partseshothekma anareth. Ñeñthoꞌmar añ ñoñetspaꞌ nanak sherben ñeñthchaꞌ yeyxhateꞌ ñeñth ateth moenen Yompor, ñamha ñeñthchaꞌ alla yokthapeꞌchaterreꞌ kowen ñerraꞌm esempo es yepanten, ñamha ñeñthchaꞌ yeñotateneꞌ eꞌñe kowen ñeñth ateth poktetsa Yomporekop. 17Allochñapaꞌ atthoch ñeñthey oꞌ poechemer perrey Yomporpaꞌ eꞌñech yeñotwen allowen ñeñth kowentetsa Yomporekop, ñamha atthoch womenk yephaꞌ yeyoxher allowenakop ñeñth kowentetsa Yomporekop.
Currently Selected:
2 Timoteo 3: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
