2 San Pedro 1
1
Attho Pedropaꞌ kellkërranerr carta allowenakop ñeñth ameꞌñetsa
1Masheñneshachaꞌ ñamha noxhaneshachaꞌ allowenes ñeñthes eꞌñe atthekma kowen sameꞌñena ateth yameꞌñena yamha, tharroꞌmar alloweneypaꞌ eꞌñe ñaptha Jesucristo ñeñth Yeyomporer yepen ñeñthara ñeñth Yaꞌkeshphatañer yepen, ñeñthña eꞌñe pokteꞌ es pets. Na Simón Pedronpaꞌ oꞌch alla nekellkërrnaserr poꞌpoñ carta, ñeñthen thorretsa Jesucristokop, ña poellsensaren. 2Eꞌñe newomhchaꞌteñothes sa napaꞌ oꞌch notas: Yomporepaꞌchña atarr sebensareꞌtampeneꞌ; ñepaꞌchña sokshateneꞌña eꞌñe sa seyoxhro allowenes eꞌñe seyemteñoth Yompor ñamha Poechemer Jesús ñeñth Yepartseshar yepen.
Atethchaꞌ yephaꞌyena alloweney ñeñthey eꞌñe kowen ameꞌñaꞌyenaya Cristo
3Eꞌñe yeyemteñoth Yompor ñapaꞌ xhokma apoeney allowen ñeñth allpon yepalltena alloch yokrrena eꞌñe kowen ñokop. Ñamha apoeney atthoch yokthapeꞌcherr ñeñth eꞌñe pokteꞌ enten ña. Ñeñthpaꞌ eꞌñe ña poꞌpartsoteñoth apoeney. Ñapaꞌ añ moenen oꞌch yekowentapretera ña. Ñamha añ atarr moenen oꞌch yorrtatapreter poꞌkowenña. 4Eꞌñe poꞌkowenñoth ñapaꞌ ateth otnerrey ñeñthchaꞌ apoerrey ñeñthchaꞌ nanak kowen yenterr, ñamha ñeñthchaꞌ atarr nanak sherberrets yokop. Añ apoerrey poꞌwamenk atthoch amach aña atarr yemnaꞌyeno ñeñth yentyen arr patsro. Atthochña amach atarr nanak yaꞌsosyateno eꞌñe yañeña. Allochñapaꞌ eꞌñe yeyemteñoth Paretspaꞌ oꞌch yagërrñañ ñeñth eꞌñe ateth pena ña. 5Ñeñthoꞌmarña añ poktetsa, ñanomchaꞌña Cristo yeyemta. Allothpaꞌ ñamha oꞌch yorrtaten attho eꞌñe pokteꞌ es yepen. Allothpaꞌ ñamha añ poktetsa, oꞌch yeñotwa eꞌñe ora ateth moenen Yompor. 6Allothpaꞌ ñamha oꞌch yepoeswanom ñeñth ateth yemnatseꞌtyen ya. Allothpaꞌ ñamha eꞌñech yaꞌwantaꞌwanom allowen ñeñth atarr echarr yentyen, allotheññapaꞌ oꞌch yokthapeꞌch ñeñth poktetsa Partsokop. 7Allothpaꞌ ñamha oꞌch yemorrentannaꞌta, eꞌñech yemoꞌnasheñeshaꞌ yephannena. Allothpaꞌ ñamha eꞌñech yemoerannena.
8Ñerraꞌm atethchaꞌ sepha añexhno ateth ñeñth oꞌ notwaspaꞌ, allempoñapaꞌ alloꞌnach sesen parrokmatats epas Yepartseshar Jesucristo. Allochñapaꞌ amach eꞌñe orrena señotere, añchaꞌña eꞌñe sorrtatyen ñeñth ateth moenen Yompor. Allempoñapaꞌ nanakchaꞌ sesherberr Cristokop. 9Ñerraꞌm ama alloꞌna yeyemoetneño Cristopaꞌ yapaꞌ amach eꞌñe es kowenayeꞌ yeñotweno. Xhach yottena ñerraꞌmrratheꞌ poesheñarr ñeñth ama chemeꞌtetso aꞌyo. Añach chemeꞌten ñeñth allaꞌtsena. Amapaꞌ xhach yottena ñerraꞌmrratheꞌ poesheñarr aporoꞌyeth ñeñth ama entetso, amaꞌt eꞌñe mamesha. Tharroꞌmar ñapaꞌ oꞌ xha poeswerran attho Cristopaꞌ eꞌñe eꞌshowerrñañeñ poꞌchñar. 10Ñeñthoꞌmarña masheñneshachaꞌ ñamha noxhaneshachaꞌ theꞌpaꞌ oꞌch alla noterrserr. Alloꞌnepaꞌch sesen yemoetnomaya Cristo attho ñapaꞌ oꞌ waꞌñerres atthoch sameꞌñeñothpaꞌ oꞌch sekeshperra. Ñerraꞌm atethchaꞌ sephapaꞌ amaꞌt awathapaꞌ amach sepsere, ñamha amach alla sepoerrerro atarr thoñoneth. 11Allochña sapaꞌ sexherrchaꞌ all amhchaꞌtarethtena Yepartseshar Jesucristo ñeñth Yaꞌkeshphatañer yepen. Allñapaꞌ oꞌch agërres eꞌñe poksheñeshokmañen all partsoten. Ña poꞌpartsoñapaꞌ ñeñthpaꞌ amach awañañathterro amaꞌt eꞌñe errponaña.
12Ñeñthoꞌmarña napaꞌ noten, xhokmach neyerpatasa ateth nokthapeꞌchen. Amaꞌt sapaꞌ oꞌ señotwe añexhno, napaꞌ oꞌch alla noterrserr. Amaꞌt oꞌ xhaponasa seyoxhro ñeñth ñoñets poꞌñoxhpaꞌ napaꞌ nemneñ alloꞌnach neyerpatnensa. 13Napaꞌ noten, theꞌpaꞌ orameñ nokrrena eꞌñe pokteꞌ oꞌch neyerpatnomsa atthoch oꞌch sethorroña Yompor poꞌñoñ. 14Napaꞌ neñoteñ oꞌ mamhamenapaꞌ oꞌch nerromoen, tharroꞌmar ateth otneꞌth Yepartseshar Jesucristo. 15Allochñapaꞌ amach nemnatenso oꞌch sepoeswer amaꞌt errponaña. Amaꞌt allempoch oꞌ nerromoenpaꞌ sapaꞌ alloꞌnach seyerpoerra ñeñth ateth oꞌ notwanmas.
Pedropaꞌ eꞌñe entaneꞌth Cristo allempo orrtatyesaneteꞌth poꞌpartsoña
16Ya theꞌpaꞌ oꞌ eꞌñe yeñotatas attho Yepartseshar Jesucristo ña partsotets, ñapaꞌ ñach werrtsa poꞌpocheño. Añ ñoñets poꞌñoxhpaꞌ ama shekëñtsoyaye ñoñets ñeñth oꞌ yotwas. Ñeñthpaꞌ ama yayeꞌ yokthaphña yotenso, ñamha ama awathnaneshañeyaye poeserrpareñ. Ya poꞌñoxhpaꞌ eꞌñekaꞌye allameꞌttsa yeñcheꞌthña Yepartseshar Cristo. Yapaꞌ eꞌñe yentwoñeꞌthña poꞌpartsoña. 17-18Tharroꞌmar yapaꞌ eꞌñe parro alloꞌtseney all aspentho allempo Yompor Parets gatey Poechemer poꞌkowenña. Yapaꞌ allempopaꞌ eꞌñe yeꞌmwaña ñoñets ñeñth yeꞌmorrtoya entoth. Yompor ñeñth nanak partsotets poeꞌntaño, poꞌkowenñopaꞌ ateth kowentatenan Poechemer, ñeñthpaꞌ ateth oten: “Añmapaꞌ ñeñth Nechemer ñeñth nanak nemorrentena, ñapaꞌ ña nanak nokshateneꞌ.” Ñeñthpaꞌ atthoña ayeꞌchoxhtatenan Poechemer.
19Theꞌña ñeñth otyeseꞌth awath ñeñth aꞌmhtaꞌyesayeꞌth Yompor poꞌñoñpaꞌ theꞌña eꞌñe poꞌñoxhpaꞌ oꞌ eꞌñe etsotwerra. Ñeñthoꞌmarña yapaꞌ atthoña yeñoteñ ñapaꞌ eꞌñe poꞌñoxh otyeꞌth poꞌñoñoth. Ñeñthoꞌmarña yokoppaꞌ añ poktetsa oꞌch yameꞌña ñamha ñeñth aꞌmhtaꞌyesayeꞌth awath Yompor poꞌñoñ. Ñeñthña ñoñetspaꞌ aꞌpoetarsampennay yokthaphña ateth ñerraꞌmrratheꞌ lampareñ aꞌpoetareneꞌ chekmeteꞌ. Theꞌña oꞌ wapa Cristo; ñapaꞌ ñeñthchaꞌña aꞌpoetarerreꞌ yamha yeyoxher. Yapaꞌ atarr kowen yenteñ Cristo ateth ñerraꞌm ranto atarremh. 20-21Ñamha señochepaꞌchña ñeñth aꞌmhtaꞌyesayeꞌth awath Yompor poꞌñoñ ñetpaꞌ ama añayeꞌ orrtateteꞌthe ñeñth ateth kothapeꞌcheteꞌth ñet. Attho ñet maꞌyoxhreteꞌth Partsokop, Paretsña Poekamkëñña eñotataweteꞌth atethchaꞌ serrpareꞌtoñet Yompor poꞌñoñ. Ñeñthoꞌmarña señochepaꞌch ama pokteyaye eꞌñe yañeña yokthaphñoth oꞌch yeꞌnaxhatateññañ poꞌñoñ.
Currently Selected:
2 San Pedro 1: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
