2 Corintios 3

Attho Pablopaꞌ ama pallteno oꞌch kellkoñet carta atthoch kowen enteñ acheñeneshaꞌ

1Sapaꞌ xhatheꞌ sotenapañ napaꞌ oꞌ alla neñerrerr eꞌñe kowen, ñatoꞌ nokpatheꞌ, ñatoꞌ xhatheꞌ nommoꞌchena. Tharraña ñeñthpaꞌ ama attheyaye. Amapaꞌ ñatoꞌ sapaꞌ xhatheꞌ sotenapañ añtheꞌ nepalltena carta ñeñthchaꞌ señotateꞌ attho poꞌpoñ anetsoꞌmarneshaꞌpaꞌ eꞌñech kowen entapretennet attho napaꞌ kowen nethorrena Yomporekop. Tharraña napaꞌ ama es nepallteno. Ñewa, ñamha xhatheꞌ sotenapañ añtheꞌ nepalltena carta ñeñthchaꞌ sekellkon sa alloch señotach poꞌpotantañ acheñ attho eꞌñe kowen sentenen na, ateth pena poꞌpsheññexhno ñeñth serrpareꞌtets atthoch kowen enteñ acheñeneshaꞌ eꞌñe ñañeña. 2Tharraña napaꞌ ama nepallteno ñeñth poꞌpoñ carta ñeñthchaꞌ eñotateꞌ poꞌpotantañ acheñeneshaꞌ ñeñth attho nethorrena na Yomporekoppaꞌ ñeñthña atarr sherbets. Tharroꞌmar sapaꞌ saña eꞌñe sherbets ateth ñerraꞌmrratheꞌ necarta nepenes. Tharroꞌmar allempo acheñeneshaꞌ eñotenset sa attho theꞌpaꞌ oꞌ sokthapeꞌcherr kowen Yomporekop, ñeñthchaꞌña eñotatenawet ñeñth attho nethorrena na, ñeñthpaꞌ ñeñthña eꞌñe sherbets Yomporekop. Ñatoꞌ oꞌch netmaꞌntacha ateth: Na necarta ñeñthña eñotatenawet ñeñthpaꞌ all akellkareth eꞌñe neyoxhro ñeñthchaꞌ lleyen allowen acheñeneshaꞌ ñeñthchaꞌña eñotatenawet. 3Ñamha sa attho theꞌpaꞌ sorrtaten ñeñth eꞌñe kowentetsa, acheñeneshaꞌñapaꞌ oꞌch eñotapretaset ñeñthpaꞌ poꞌñoxh Cristo poꞌtarwas peneꞌ. Ñatoꞌ oꞌch netmaꞌntacha ateth: Sapaꞌ ateth sesherben ñerraꞌmrratheꞌ yecarta ñeñthchaꞌ eñotatenawet, ñeñth cartapaꞌ oꞌ kellkaꞌwonay Cristo eꞌñe ña. Añ cartapaꞌ awoꞌt akellkaꞌwarethta awañmoꞌchotheñ allempo yapaꞌ yexhapatonas Yompor poꞌñoñ ñeñth sameꞌñatateꞌ Yompor. Tharraña añ cartapaꞌ ama añoyeꞌ akellkarethto tinto, añña Yompor Poekamkëñoth anarethta, ñeñthara Yompor ñeñth ama arromñatheshayaye. Tharraña añ cartapaꞌ ama arreyeꞌ akellkarethe mapyettallo. Añpaꞌ arrña akellkareth eꞌñe ya yeyoxhro amaꞌt ñeñthey arromñathey.

Attho Yomporpaꞌ aꞌpoktaterrnay eꞌñe etserra

4-5Napaꞌ neñoteñ ama nepallteno poꞌpoñ carta ñeñthchaꞌ eñotatenawet. Saña ñeñthes eꞌñe necarta nepenes. Ama notenso eꞌñe nañeña nowamenkoth es nephaꞌyen. Añña eꞌñe neyemteñoth Cristo napaꞌ nethorrena Pomporekop. Ora allowen es nephaꞌyen Yomporña awamenkath nepeneꞌ. 6Ñeñthara Yompor ñeñth awamenkath yepeneꞌ allochñapaꞌ atthoch yeserrpareꞌterrñañ pokthaphña ñeñth ateth aꞌpoktaterrnay eꞌñe etserra. Añpaꞌ ama attheyaye ateth pha awath Yompor allempo apan Moisés poꞌñoñ ñeñth anarethtatseꞌth ñeñthchaꞌ eꞌñe yetsotwañ eshekchaꞌ aꞌkeshphateney Yompor. Ñeñth ama etsotayeꞌthe, ñokpoetpaꞌ oꞌ anarethtet rromoetchaꞌ, chenkërretchaꞌ. Tharraña ñeñth attho aꞌpoktatwerrnay Yompor etserra, ñeñthpaꞌ attho apoeney Poekamkëñ alloch yokrraꞌwerra, thayotheñ errponowañen.

7Añ ñoñets ñeñth akellkarethtatsa mapyettallo, ñeñth ama etsotenaye, ñokpoetpaꞌ oꞌ anarethtet rromoetchaꞌ, chenkërretchaꞌ. Ñamha awath allempo Yomporpaꞌ apan Moisés poꞌñoñ ateth, eꞌñe poꞌkowenteñoth apan Moisés. Moiséspaꞌ ateth orrta paꞌklloyoth xha poptena, atarr aꞌrrechatañ. Amaꞌt israelneshaꞌpaꞌ ama eshkayeꞌ kowaklleꞌcheto. Tharraña amaꞌt ateth phañpaꞌ akophotheñ mayaꞌwanerr ñeñth attho poptena. 8-9Amaꞌt añ kothaphñatser ñeñthchaꞌ yaꞌchenkaterrayeñpaꞌ tharraña Yomporpaꞌ atarr kowenoth orrtach allempo. Theꞌña eꞌñe ellonethpaꞌ oꞌ alla orrtaterrnayerr ña pokthaphña atthoch eꞌñe pokteꞌ entwerrey. Ñeñthpaꞌ eꞌñe Parets Poekamkëñoth orrtatwerrnay ñeñthoꞌmarña ñapaꞌ ello kowentena nanak. 10Ñeñth ateth popta awath Moisés paꞌklloyoth allempo aph Yompor poꞌñoñ, theꞌña ñeñthpaꞌ oꞌwañ eꞌñeyeꞌ kowenayeꞌ yeñch tharroꞌmar theꞌpaꞌ eñall Cristo poꞌñoñ ñeñth atarr kowen yenten, ello metanenan attho kowenteꞌth Moisés poꞌñoñ. 11Tharroꞌmar ñeñth ateth kowenteꞌth Moisés ñeñthpaꞌ akophotheñ mayaꞌwanerr attho kowentena. Tharraña theꞌpaꞌ attho kowentena Cristo poꞌñoñ ñeñthpaꞌ amach awañañathterro, ñeñthoꞌmarña ñeñthpaꞌ ello metanenan Moisés poꞌkowenña.

Attho Cristo poꞌkowenña ñeñthpaꞌ amach awañañathterro

12Yapaꞌ oꞌ yeñoterrñañ Cristo poꞌkowenña ñeñthpaꞌ amach awañañathterro. Ñeñthoꞌmarña yapaꞌ ama yepenkëñotheyeꞌ yeserrpareꞌteññañe poꞌñoñ. 13Yapaꞌ ama attheyeꞌ yepeno ateth pha awath Moisés. Ñapaꞌ xha wañerr attho popta paꞌklloyothpaꞌ awoꞌt kaꞌmaklleꞌcha allochña israelneshaꞌpaꞌ amach eñcheto paꞌklloyoth oꞌ wañerr attho poptena. 14Israelneshaꞌpaꞌ ama xhapaneto poeyoxhreto atthoch kothapeꞌcherret kowen Yomporekop. Amaꞌt themeꞌttsen ñerraꞌm esempo lleyeññañet ñeñth aꞌpoktat Yompor awath attharetach amach xhapaneto poeyoxhro ñeñth ateth moenen Yompor. Poꞌñoxhpaꞌ añothchaꞌña xhaponaya yeyoxhro ñeñth ateth moenen Yompor eꞌñe yeyemteñoth Poechemer ñeñth Cristo. Israelneshaꞌ ama kowenayeꞌ enteñeto Cristo ñeñthoꞌmar noten ñetpaꞌ themeꞌttsen ateth penet ñerraꞌmrratheꞌ xho kaꞌmaklleꞌchenet. 15Poꞌñoxh amaꞌt themeꞌttsen ñerraꞌm esempo eꞌmhñotenet all lleyeññañet Moisés poꞌñoñ amach es eñoteneto. Xhach ottenet ñerraꞌmrratheꞌ xha es aꞌnpoenawet atthoch amach eñotoñeto Yompor pokthaphña. 16Tharraña amaꞌt poesheñarrotheya ñeñthey erraꞌtseney acheñrey, allempotheñ yagër Yepartseshar Cristo, allempotheñchaꞌña xhaponaya yeyoxhro ñeñth ateth moenen Yompor; Cristopaꞌ ñachña yewaporeꞌtamphseꞌña ñeñth yaꞌnpoenayeñ. 17Ñeñth yoten Parets Poekamkëñ, ñeñthara Yepartseshar Cristo Poekamkëñ. Ñamha atarr kosheñtsoꞌtseney ñerraꞌm esempoch xhaponaya Cristo Poekamkëñ yeyoxhro. Oꞌwañchaꞌ yemoeroxhtameꞌta atthoch poechemer perrey Yompor, eꞌñech yoksheñeshaꞌ yokther Yompor. 18Alloweney ñeñthey ameꞌñenaya Yepartseshar Cristo, ña Poekamkëñpaꞌ ñachña yaꞌpoꞌpoñeterreꞌ, allochñapaꞌ alloꞌnach yesen kowentapretaya Cristo. Yapaꞌ ama attheyayye ñerraꞌmrratheꞌ ñeñth aꞌnataklleꞌchareth atthoch amach enteññañeto Cristo poꞌkowenña. Yapaꞌ eꞌñe yekweñoth Cristo poꞌkowenña, yapaꞌxhoꞌña oꞌch yekowentapreteña yamha, ateth ñerraꞌmrratheꞌ rerep poptetsa ñerraꞌm xho yekwach atsrrethoneth.

Currently Selected:

2 Corintios 3: ame

Highlight

Copy