2 Corintios 2

1Ñewa, amaꞌtchaꞌ nemneñeñ oꞌch alla nexherrerr sesho tharraña napaꞌ awoꞌt alla nokthapeꞌcherr ello neyoxhro, noten amach neto tharroꞌmar ama nemno oꞌch nexhap nellkëñeshaꞌ sesho theꞌt sapaꞌ oꞌtheꞌ alla nellkaterrserr samha. 2Tharroꞌmar noten ñerraꞌm neꞌñotareꞌteñothes na oꞌch alla nellkaterrespaꞌ atthoch nellkaterres sa, sellkëñapaꞌ amach nokshapretaso, tharroꞌmar sapaꞌ sañeña eꞌñe nokshateneꞌ. 3Ñeñthoꞌmarña ama nexherro sesho awaña, aña nekellkonas carta ñeñthchaꞌ sokthapeꞌchaterreꞌ eꞌñe kowen. Allochñapaꞌ ñerraꞌm machayotha nexherr sesho ñerraꞌm oꞌch alla sokthapeꞌcherr kowen, ñeñthchaꞌña atarr nokshapretwerrsa. Allochñapaꞌ amach tama nellkënso tharroꞌmar añ poktetsa sokop xhokmachña eꞌñe sokshaterren. Ñamha neñotenes ñerraꞌm esempo nokshena na sapaꞌxhoꞌña allowenespaꞌ oꞌch eꞌñe soksherra. 4Ñamha allempo nekellkonas añ carta awañapaꞌ eꞌñe nellkëñeshaꞌ nekellkënnas. Ama neñmateno neyoxhro amaꞌt mamesha, eꞌñe ñeñtha nenen neyoxhro. Elloñapaꞌ eꞌñe neyaꞌchpeñeshaꞌ nekellkënnas ñeñth carta. Napaꞌ ama añekpayeꞌ nekellkënnaso carta atthoch nellkatas sa; añekpaña nekellkënnas atthoch sapaꞌ oꞌch señoch atarr nanak nemorrentensa.

Arrpaꞌ all kothapeꞌchatanet atthoch peretnet athparñath

5Ñamha añ acheñer ñeñth athpareꞌtetsa seshopaꞌ ama napthayaya llekatenno na, añña amaꞌt sapaꞌxhoꞌña allowenespaꞌ xhokma llekatenes. Ñewa, tharraña amaꞌt attheñpaꞌ ñatoꞌ oꞌch notas ama allowenakmas ateth petso, theꞌt attha atarr natontaten ñoñets ñeñth ama attheyaye poꞌñoxh. 6Ñamha theꞌpaꞌ oꞌch notas, eꞌñe pokteꞌ attho oꞌ sekoñchatwe ñeñth acheñer, theꞌpaꞌ allowach. Amaꞌt shonteseñ ñeñthes pokteꞌ entenayeñ oꞌch sekoñchatererr ñeñth athparñath, tharraña theꞌpaꞌ ñeñthach. 7Theꞌpaꞌ añña poktetsa oꞌch alla sephretner, allochñapaꞌ atthoch sokshater, theꞌt attha nanak llekëna, poellkëñothpaꞌ oꞌtheꞌ alla kexhpoerran Yompor. 8Ñeñthoꞌmar theꞌpaꞌ notenes añ poktetsa oꞌch sorrtatoñ kowen ñokop atthoch eñoter poꞌñoxhpaꞌ atarr semorrenteña. 9Ñeñthekpaña nokthapeꞌchatas awaña necartoth ñeñthchaꞌ ateth sepeꞌ ñeñth athpareꞌtetsa atthoch netpatenes oꞌch neñotas ñerraꞌm poꞌñoxhtheꞌ eꞌñe sameꞌñena ñeñth poktetsa Yomporekop, amaꞌt errothenoꞌtsensa. 10Ñamha oꞌch noterrserr, ñerraꞌm eseshaꞌ sephretnerr sa, napaꞌxhoꞌña eꞌñech pokteꞌ nenteñ namha aphretnarethterrepaꞌch. Ñeñth xhokma nathpareꞌteneꞌ awaña theꞌña ñapaꞌ oꞌ nephretner, ñeñthpaꞌ eꞌñe sokop. Amaꞌt Cristopaꞌ eꞌñe entenen. 11Ñamha añ eꞌñe poktetsa oꞌch yephretnannena. Allochñapaꞌ amaꞌt oneñethpaꞌ amach alla aꞌpsaterrye Yompor. Tharroꞌmar ñapaꞌ yeñoteñ xhokma eꞌnenan atthoch shekëney.

Attho Pablopaꞌ atarr llekënana corintoꞌmarneshaꞌ allempo ama werraꞌ Tito Corintoth

12Theꞌpaꞌ oꞌch neñotaterrserr ñeñth ateth nepha awaña. Awaña allempo nexherr Troaso, napaꞌ oꞌch neserrpareꞌtatanetañ Cristo poꞌñoñ ñeñth alloch yekeshperrapaꞌ shonteꞌ acheñeneshaꞌ moeneñetañ oꞌch eꞌmhñotoñet Yepartseshar poꞌñoñ, 13tharraña napaꞌ amaꞌt mamesha ama neñmateno neyoxhro tharroꞌmar allpaꞌ ama nentose masheñ Tito. Ñeñthoꞌmar ama naꞌpo all, attha nesoꞌtnerranet, oꞌch nexherr all anetso Macedonia.

Yomporpaꞌ xhokma moñenya allempo es yewenoya

14Yeparasyosoꞌchepaꞌch Yompor tharroꞌmar ñapaꞌ xhokma moñenya allempo es yewenoya. Ñamha eꞌñe yeyemteñoth Poechemer Cristo Jesúspaꞌ xhapaterreychaꞌ kosheñtso. Amaꞌt yapaꞌ oꞌ moenaterrey atthoch yaꞌpotherrñañ poꞌñoñ errapharen, allochñapaꞌ atthoch epaꞌwerra poꞌkowenña errakmañen. Ñatoꞌ oꞌch netmaꞌntacha ateth ñerraꞌmrratheꞌ ñeñth atarr es eñmosathtetsa, xhach epaꞌwa eꞌñe kowen errakmañen poeꞌñmosathteña. 15Tharroꞌmar ñeñthey aꞌpotheneꞌ Cristo, Pomporñapaꞌ eꞌñe ateth enteney ñerraꞌmrratheꞌ ñeñth eñmosathtetsa eꞌñe kowen ñokop, ñeñthchaꞌ epaꞌwerrtsa errakmañen alloꞌtsaꞌyen acheñeneshaꞌ añ patsro. Patantaꞌtetspaꞌ pameꞌñeñothetpaꞌ aꞌkeshphatarethterretchaꞌ, patantaꞌtetsña ñeñthchaꞌ ama ameꞌñerrtsopaꞌ ñetpaꞌ chenkaꞌwerretchaꞌ. 16Acheñeneshaꞌ ñeñthchaꞌ chenkërrtsapaꞌ eꞌñech ateth enteññañet Yompor poꞌñoñ ñeñth yeserrpareꞌten ñerraꞌmrratheꞌ ñeñth amtsañtetsa, añña ñeñtheychaꞌ keshperrtsapaꞌ yañapaꞌ oꞌ yenterrñañ Yompor poꞌñoñ ateth ñerraꞌm es ñeñth ama awañaño alloña yapaꞌ korretsayach. Ñatoꞌ oꞌch netmaꞌntacha ñerraꞌmrratheꞌ ñeñth atarr eñmosath ñeñthchaꞌña yaꞌkrraterreꞌ errponowañen. Eseshaꞌwachñakaꞌ pokteꞌ enterrña Yompor ñeñthchaꞌ serrpareꞌterreꞌ poꞌñoñ. 17Añ pokteꞌ enten Yompor ñeñthchaꞌ serrpareꞌteneꞌ poꞌñoñ ñeñth eꞌñe poeñmañeshokmañen serrpareꞌteneꞌ. Ateth ñerraꞌm ya, tharroꞌmar yapaꞌ ama xhoyeꞌ yetseteno Yompor poꞌñoñ acheñ pokthaphño ñeñth ateth pena shonteꞌ poꞌpotantañ acheñeneshaꞌ. Ñetpaꞌ ateth penet atthoch pokshateñoth acheñeneshaꞌpaꞌ oꞌch es apaꞌyenanet. Añchaꞌña eꞌñe yeñmañeshokmañen yeserrpareꞌteññañ poꞌñoñ ateth llesenseney Yompor. Ñapaꞌ enteney ñeñth ateth yeꞌñorena ñokop eꞌñe yeyemteñoth Poechemer Cristo.

Currently Selected:

2 Corintios 2: ame

Highlight

Copy