1 San Pedro 4
4
Attho eꞌñe yemoeroxhteñothpaꞌ oꞌch womenk yephaꞌ yeyoxher Yomporekop
1Cristo allempo añe patsroꞌtsenpaꞌ ñapaꞌ eꞌñe pokteꞌ enteñ atthoch moeroxhtateñet nanak. Ñeñthoꞌmarña sapaꞌxhoꞌ eꞌñepaꞌchña pokteꞌ senteñ oꞌch semoeroxhta eꞌñe ñokop. Eꞌñe yemoeroxhteñothpaꞌ oꞌch womenk yephaꞌ yeyoxher. Yemoeroxhteñoth yechtsopaꞌ oꞌch yekexhpaꞌwerr ñeñth ama pokteyaye Yomporekop. 2Allochñapaꞌ amach alloꞌna yephaꞌneno ateth moenatyesyeꞌth yechets awath. Yokoppaꞌ añ poktetsa oꞌch yokthapeꞌchen ñeñth ateth moenen Yompor. 3Theꞌñapaꞌ ñeñtheshañach ateth sepha ateth sephaꞌyeseꞌth awathotheñ ñeñth ateth pena theꞌ ñeñth ama ameꞌñetso. Ñetpaꞌ aña paꞌnamen phaꞌyenet ñeñth atarr sosyaꞌtsañexhno ñeñth allowen paꞌnamen moenatseꞌtyeñets sosyaꞌtsañ ñamha posaꞌtarñats ñamha koshatseꞌteñets ñamha orrareꞌteñets ñamha moechatseꞌteñets ñeñth amaꞌt mameshapaꞌ ama pokteyeꞌ enteñe Yompor. Theꞌñapaꞌ ñeñtheshañach ateth sephaꞌ ñeñth semnatseꞌtyen sa. 4Ñeñth peyemteꞌth awath ñeñth epaph phorrareꞌteꞌthpaꞌ theꞌñapaꞌ amach xhapaneto poeyoxhro esoꞌmartheꞌ oꞌwañ phorrareꞌtapretanet. Atthoña ñetpaꞌ moeneñetchaꞌ oꞌch achmhareꞌtaset. 5Tharraña theꞌpaꞌ oꞌch notas, amaꞌt ñeñth ama ameꞌñetso, esempowañenpaꞌ aꞌmethatatwerranetchaꞌ Yompor. Poꞌñoxh ñapaꞌ ñach tsaꞌtaya ñeñth ameꞌñetsa. Ñamha amaꞌt ñeñth ama ameꞌñatsopaꞌxhoꞌ ñach tsaꞌtatwerrawet, ora allowenet, amaꞌt ñeñth korretsa, ñamha amaꞌt ñeñth oꞌ kollaꞌwena. 6Ñeñthoꞌmarña amaꞌt ñeñth arromñathneshaꞌ oꞌ aserrpareꞌtatwarethtet kowen ñoñets. Allochñapaꞌ amaꞌtchaꞌ aꞌkoñchatarethtetañ poꞌchtsothet ateth pena allowen arromñatheneshaꞌ, poekamkëñothetñapaꞌ korraꞌwerretchaꞌ eꞌñe ateth korrena Yompor.
7Theꞌñapaꞌ oꞌ mellapoterrmocha. Ñeñthoꞌmarña añ poktetsa, eꞌñe yeñotateñothpaꞌ oꞌch yemaꞌyochera Yompor. Eꞌñech yetpara es yepen atthothchaꞌ amach yepseñe Yompor maꞌyochaya. 8Añpaꞌ ñeñthña ñanom nanak sherbets: oꞌch yemorrentannaꞌta nanak eꞌñe yeyoxhrokmañen. Yemorrentanneñothpaꞌ oꞌch yephretnannaꞌta attho errothen yephannena. 9Ñamha eꞌñech soksheñeshaꞌ oꞌch sagapannena eꞌñe sepakllo. 10Yompor poemoereñothpaꞌ oꞌ eꞌñe apaꞌyeswas atthoch sethorraꞌyesa eꞌñe ñokop. Theꞌñapaꞌ oꞌch notas, oꞌch seyenpannaꞌta año ñeñth apoenes Yompor. Atthochña sesherbhatyesñañña Yompor poemoereña. 11Ñeñthpaꞌ ateth ñerraꞌm eseshas serrpareꞌtatspaꞌ Yomporepaꞌchña poꞌñoñ seserrpareꞌten. Ñerraꞌm eseshas yenpoeneꞌ poꞌpsheñeñpaꞌ Yomporepaꞌchña poꞌwamenkoth seyenpannena. Allochñapaꞌ yeparrokmateñoth epay Jesucristopaꞌ oꞌch yaꞌyeꞌchoxhtatwerrñañ Yompor. Yomporepaꞌchña ayeꞌchoxhtatwapoꞌ alloweney. Amhchaꞌnaꞌtpawepaꞌch poꞌpartsoña thayotheñ errponowañen. Ñeñthpaꞌ atthepaꞌchña Nompore.
Ñerraꞌm esempo sasareꞌtenyet attho yapaꞌ yekristonaꞌtarterra yañapaꞌ atarrchaꞌ kosheñtsoꞌtseney
12Amach, masheñneshachaꞌ ñamha noxhaneshachaꞌ, seyorenatsto ñerraꞌm waponasa topateñets nanak womenk; tharroꞌmarchaꞌ waponasa oꞌch topatensaꞌ. Amach seyorenatsto ateth sepena ñerraꞌm esempo waponasa ñeñth ama sentare. Atthekma amaꞌt masheñneshaꞌ ñeñthoꞌ ameꞌñaꞌwapaꞌ atthekma oꞌ topatwanet. 13Allempotheñ oꞌ semoeroxhtaprecha Cristo, eꞌñe semoeroxhteñothpaꞌ sokshepaꞌch. Allochñapaꞌ ñerraꞌm esempoch orrterra poꞌkowenñapaꞌ sapaꞌxhoꞌña sokshapreterach eꞌñe kowen. 14Ñerraꞌm xho sasareꞌtenset attho oꞌ secristonaꞌtarterra, sañapaꞌ atarrchaꞌ kosheñtsoꞌtsenes, tharroꞌmar eꞌñe allempotheñ Yompor Poekamkëñ ñeñth kowenñatsotetspaꞌ xhaponasa sesho. Poꞌñoxh ñetpaꞌ Cristoꞌna sasareꞌtenet tharraña sapaꞌ eꞌñe kowen sekowentateññañ Cristo. 15Añña ama koweno oꞌch yemoeroxhta yemtseñoth acheñ, amaꞌt ñamha yeteñoth, amaꞌt ñamha yepeñoth ñeñth ama kowenayaye, amaꞌt ñamha yaꞌmethampeñoth atthochchaꞌ yeꞌmoñeꞌtannaꞌta. Ñerraꞌm atthothña yemoeroxhtapaꞌ ñeñthpaꞌ eꞌñech orrena yemoeroxhta. 16Añña ñerraꞌm añekop yemoeroxhta tharroꞌmar oꞌ yecristonaꞌtarta, amach yepenkatsto. Xhokmach yekowentatoñ Yompor tharroꞌmar oꞌ yanerrñañ paꞌsoꞌcheñ.
17Oꞌ xhapmoch allempoch Yomporpaꞌ akranatwerrey alloweney ya. Yapaꞌ yanomchaꞌ aꞌmetherr ateth enteney amaꞌt ñeñthey poechemereshay oꞌ perrey Yompor. Ñerraꞌm yapaꞌ yanomchaꞌ aꞌmethamperr amaꞌt ñeñthey ameꞌñatsapaꞌ, allempopaꞌ errothenothwachkaꞌ keshperratheꞌ ñeñth nanak athpareꞌteneꞌ kowen ñoñets ñeñth Yompor poꞌñoñ. 18Amaꞌt ñeñthey eꞌñe pokteꞌ es petspaꞌ eꞌñech yemoeroxhenñotha yekeshperra, allempopaꞌ errothenothwachkaꞌ xhapña ñeñth ochñatheneshaꞌ ñeñth atarr athpareꞌteneꞌ Yompor. 19Ñeñthoꞌmarña ñerraꞌm esempo yemoeroxhta eꞌñe Yompor poemneññothpaꞌ allempopaꞌ amach yellkatsto. Añña poktetsa oꞌch alla yeyemtera Yompor eꞌñe yoksheñeshokmañen yeyoxhro, tharroꞌmar ñapaꞌ ña ñeñth yeyexhkateꞌ. Ñapaꞌ ña ñeñth eꞌñe pokteꞌ es pets, ñapaꞌ eꞌñech aꞌpoktatonay. Añchaꞌña alloꞌnepaꞌch yesen kothapeꞌcherreꞌ ñeñth kowentetsa Yomporekop.
Currently Selected:
1 San Pedro 4: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
