1 San Pedro 3
3
Arrpaꞌ all kothapeꞌchatan ñeñth arrollarethneshaꞌ
1-2Sapaꞌxhoꞌña ñeñthes arrollarethes, oꞌch notas samha. Añ poktetsa oꞌch sameꞌñya serrollar. Xhokmach sameꞌñya serrollar amaꞌt serrollarpaꞌ ama ameꞌñenano Yompor poꞌñoñ. Eꞌñe kowen sameꞌñeñoth serrollarpaꞌ amaꞌt ama errothen es soteno ñatoꞌ atthothpaꞌ oꞌtheꞌ ameꞌñerra ñamha serrollar. Ñetpaꞌxhoꞌña oꞌch kothapeꞌcherret eꞌñe kowen ñerraꞌm esempo entennaset ateth eꞌñe kowenareꞌ es sepen. 3Amach eꞌñe pathrra semaꞌyoxhratsto attho sekowentena eꞌñe orrena. Ateth ñerraꞌm sechpaꞌ amach ñeñtha sellkëno oꞌch saññoꞌteñ eꞌñe kowen atthoch enteney yamoꞌtseshaꞌ eꞌñe kowen, tharraña ñeñthpaꞌ eꞌñe orrena. Ñamha amach eꞌñe pathrra semaꞌyoxhratsto atthoch sech alloch sekowenta ateth ñerraꞌm oro, tharraña ñeñthpaꞌxhoꞌña eꞌñe orrena. Amach semaꞌyoxhratsto ñamha atthoch sechorraꞌyesa eꞌñe koxhneshaꞌ. Añ aññoꞌteñets ñeñth yentapretannena eꞌñe yechtsopaꞌ ñeñthpaꞌ eꞌñe orrena orrtateney eꞌñe kowen. 4Añchaꞌña yemaꞌyoxhra oꞌch yekowentena yeyoxhro atthoch Yomporpaꞌ entapretey eꞌñe kowen. Añ kowenteñets yeyoxhro ñeñthpaꞌ ama entpawoyaye tharraña ñeñthpaꞌ amach awañañathterro. Ateth ñerraꞌm moereñets ñeñthpaꞌ eꞌñech kowen entapreteney Yompor. Ñerraꞌm ama atsrreꞌmñatheyayye ñeñthpaꞌxhoꞌña eꞌñech kowen entapreteney Yompor. Ñerraꞌm eꞌñe kowen yokthapeꞌchen, Yomporpaꞌ entapreteney yokthaphña ateth ñerraꞌm ñeñth nanak sherbets, ñamha ñeñth nanak koxhneshaꞌ. 5Ateth phaꞌyeseꞌth awath koyaneshaxhno ñeñth eꞌñe kowenareꞌ es phaꞌyestseꞌth Partsokop. Ñetpaꞌ eꞌñe poeyemteñothet Yomporpaꞌ eꞌñe kowen ameꞌñyeteꞌth poerrollaret. Ñetña poeyoxhretpaꞌ eꞌñe aꞌkowencheteꞌth Yomporekop. 6Ateth peꞌth ñamha awath Sara. Ñapaꞌ eꞌñe kowen ameꞌñaneꞌth poerrollar Abraham. Ñapaꞌ eꞌñe ateth entaneꞌth poerrollar ñerraꞌmrratheꞌ ñeñth pamoꞌmteꞌ pen, nanak ameꞌñyeꞌth. Sapaꞌxhoꞌña theꞌpaꞌ sachorchaꞌ seper Sara ñerraꞌm ama semhchañotha es pokteꞌ sephaꞌyeno samha.
Atthekma kothapeꞌchatan ñamha ñeñth athaporethneshaꞌ
7Atthekmach notas samha ñeñthes athaporethes. Oꞌch semoerya sethapor eꞌñe kowen. Sapaꞌ oꞌch senteñ samha sethapor eꞌñe kowen, tharroꞌmar koyaneshaꞌ ama tama awamenkathe. Añchaꞌña oꞌch sagapwer parro ñeñthchaꞌ apas Yompor. Eꞌñe poemoereñothes sapaꞌ apaschaꞌ allochña sapaꞌ korretsasach soksheñeshokmañen eꞌñe thayotheñ errponañowen. Oꞌch seyxha eꞌñe kowen epas sethapor, atthothchaꞌ Yomporpaꞌ eꞌmhñotas ñerraꞌm esempo semaꞌyochya.
8Theꞌñapaꞌ oꞌch notas allowenes. Añ poktetsa oꞌch sokthapeꞌcherr eꞌñe pathrra ñeñth amoerañtetsa. Ñamha oꞌch sellkapretannaꞌta ñerraꞌm esempo es sellkatyeneꞌ. Ñamha eꞌñech kowen yemorrentannaꞌta alloweney ñeñthey ameꞌñetsa, ñamha eꞌñech kowen yemoerannaꞌta. Oꞌch es yentaprech poꞌpsheñeñ eꞌñe kowen, amachña yañeña eꞌñe kowen entatstatso. 9Ñerraꞌm poꞌpsheñeñ erroth phaspaꞌ sapaꞌ amach setsaꞌtatatsche eso. Ñerraꞌm poꞌpsheñeñ sasareꞌtaspaꞌ sapaꞌ amach sesasareꞌtatsterraneto. Añchaꞌña oꞌch senamoñ Yompor aꞌnachepaꞌ, tharroꞌmar ateth moenen Yompor atethchaꞌ yepha. Allochñapaꞌ ñerraꞌm ateth yephapaꞌ ñapaꞌ oꞌch aꞌnatenya yamha. 10Tharroꞌmar ateth oteney Yompor poꞌñoñ:
Ñerraꞌm yemneñ oꞌch yeyxha eꞌñe kowen, ñamha ñerraꞌm yemneñ oꞌch yoksherrapaꞌ ñeñthpaꞌ añ poktetsa, amach yesasareꞌtatsto, ñamha añ poktetsa, amach yeshkareꞌtatsto.
11Ñerraꞌm yemneñ eꞌñe kowen yoksherra, añ poktetsa oꞌch yeswanem ñeñth ama kowenayeꞌ enteno Yompor. Ñeñth eꞌñe ateth moenen Yomporpaꞌ ñeñthchaꞌña ateth yepha. Ñamha añ poktetsa, oꞌch yeꞌnerr atthoch yentannena eꞌñe kowen epay yamoꞌtseshaꞌ. Theꞌñapaꞌ alloꞌnepaꞌch yesen entannaꞌttsa eꞌñe kowen.
12Yomporñapaꞌ eꞌñech kowampeney ñeñthey eꞌñe pokteꞌ es pets. Ñapaꞌ eꞌmhñoteney allempo es yenamoeñ eꞌñe ñesho. Añña ñeñth petsa ñeñth ama pokteyayepaꞌ Yomporñapaꞌ amach kowenayeꞌ enteñe amaꞌt mamesha.
Ñerraꞌm esempo eꞌñe atthotha moeroxhtatenyet yapaꞌ atarrchaꞌ kosheñtsoꞌtseney
13Ñerraꞌm sapaꞌ xhokma semaꞌyoxhrena ñeñth kowentetsa Yomporekop, allempoñapaꞌ amach eseshaꞌ errothenoth semoeroxhtataye. 14Tharraña ñatoꞌ errothenopaꞌ oꞌch moeroxhtataset amaꞌt añ semaꞌyoxhrena ñeñth kowentetsa Yomporekop. Tharraña ñerraꞌm eꞌñe atthotha moeroxhtatasetpaꞌ sañapaꞌ atarrchaꞌ kosheñtsoꞌtsenes. Amach semhchaꞌtatstaneto ñamha amach sellkatsto. 15Añchaꞌña oꞌch seyemcha Cristo eꞌñe seyoxhrowen. Oꞌch senteñ Cristo atarr kowen Parets ñeñth Yepartseshar yepen. Ñerraꞌm esempo eseshaꞌpaꞌ oꞌch aꞌphthoꞌtas ¿esoꞌmartheꞌña atarr sameꞌñeñaña Cristo? sapaꞌ xhokmoepaꞌchña eꞌñe kowen señoteñña atethchaꞌ sanap eꞌñe kowen. Eꞌñe semoereñoth eꞌñech akopha sanapanet eꞌñe kowen eꞌñe semhchaꞌnaꞌteñothanet. 16Xhokmach eꞌñe señmañeshaꞌ seyoxhro eꞌñech kowenareꞌ es sepen. Allochñapaꞌ ñerraꞌm amaꞌt esempo sasareꞌtenyetpaꞌ ñeñthña attho eꞌñe pokteꞌ es yephaꞌyen Cristokoppaꞌ ñeñthpaꞌ ñeñthchaꞌña penkatawet. 17Añ pokteꞌ amaꞌt yemoeroxhta attho amaꞌt eꞌñe kowenareꞌ es yepen. Ñerraꞌm ateth moenen Yomporpaꞌ pokteꞌ oꞌch yemoeroxhta. Añña ñerraꞌm eꞌñe yoꞌchñarothpaꞌ oꞌch yemoeroxhta, ñeñthpaꞌ orrenach yemoeroxhta.
18Amaꞌt Cristopaꞌxhoꞌña awathpaꞌ atarr moeroxhtacheteꞌth. Ñapaꞌ ña rromats eꞌñe parrocha allowenakpay atthothña tsaꞌtwerrnaya yoꞌchñar. Cristo amaꞌt ña ñeñth eꞌñe pokteꞌ es petspaꞌ atthoña rroma yokop ñeñthey ama pokteyeꞌ es petso. Tharroꞌmar rroma yokop atthothchaꞌ yeparrokmaterr epay Yompor. Ña amaꞌt rroma poꞌchtsothpaꞌ poekamkëññapaꞌ ama rromo. 19Eꞌñe poekamkëñothpaꞌ arr awoꞌ alloꞌtsaꞌyen awathnaneshañ poekamkëñneshaꞌ ñeñth alla ayottamphsareth, ñeñth ama xhaꞌnetso. Ñaña poekamkëñ allñapaꞌ serrpareꞌtatosanet. 20Ñewa, añ poekamkëñ ñeñth awathnaneshañ ñeñth nanak athpareꞌtayeꞌth Yompor poꞌñoñ allempo korreꞌth Noé. Allempopaꞌ Yompor nanak kowameꞌtanetañeꞌth oꞌch ameꞌñyet. Allempotheñ Noépaꞌ yexhkataneꞌth poꞌkompoer, Yomporpaꞌ kowameꞌtaneteꞌth eseshaꞌch ameꞌñatsa. Tharraña ama eseshayeꞌña ameꞌñatso, eꞌñe posoksheña ñeñth ameꞌñatsa. Añ posoksheña ñeñth ameꞌñaya Yomporpaꞌ ñeñthara posoksheña ama eseshaꞌ ñoꞌshaꞌtso, ñetpaꞌ keshpet oñoth. 21Tharroꞌmar yapaꞌxhoꞌña theꞌ ñerraꞌm yapatarethta oñoth Partsokop eꞌñe ateth pena ñerraꞌm awath Noépaꞌ oꞌ keshpha eꞌñe oñoth. Ñeñthoꞌmarña yapaꞌxhoꞌña ñerraꞌm yameꞌñeñoth oꞌ yapatarethta Partsokop eꞌñe oñothpaꞌ yeñoteñ oꞌ yekeshpha. Ñewa, ñeñth apatarethteñetspaꞌ ama añekpayaye oꞌch yapa oño atthoch wañ yepatser. Añchaꞌña ñeñth alloch yekeshpha. Attho yapatarethta Partsokop oꞌch yenamh Yompor etserrataterrnayepaꞌ yokthaphña eꞌñe kowen. Attho yapatarethta Partsokoppaꞌ yeñoteñ oꞌ yekeshpha tharroꞌmar Jesucristo attho tanterra amaꞌt rromwa. 22Allempo tanterra Cristopaꞌ oꞌ awerr poeꞌntaño. Theꞌñapaꞌ alloꞌtsen epoet Pompor eꞌñe poꞌkowenroth, allñapaꞌ all partsoten. Amaꞌt allowen ñeñth Pompor poꞌmhllañotheñnanesharpaꞌ ñetpaꞌxhoꞌña theꞌpaꞌ eꞌñe kowen ameꞌñeñet ñamet. Ñamha amaꞌt allowen ñeñth amhchaꞌtarethetyetsa poeꞌntañopaꞌ ñetpaꞌxhoꞌña ello ameꞌñaꞌweñet ñamet. Amaꞌt allowen ñeñth awamenkathexhnopaꞌxhoꞌña ello ameꞌñaꞌweñet.
Currently Selected:
1 San Pedro 3: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
