1 San Juan 2

Jesucristo ñeñth eꞌñe kowen eñets yokop Yomporesho

1Nechemerneshachaꞌ theꞌ sokoppaꞌ oꞌch nekellkonas atthoch amach alloꞌna sephaꞌneno ñeñth amaꞌt mameshapaꞌ ama pokteyeꞌ enteno Yompor. Tharraña ñerraꞌm eseshaꞌ orrtateneꞌ ñeñth ama kowenayaye, ñerraꞌm oꞌch enamoerr peretneñets, Yomporpaꞌ oꞌch peretner tharroꞌmar eñall yokop ñeñthchaꞌ eñosets Apoesho. Ñeñthñapaꞌ añ Jesucristo ñeñth eꞌñe pokteꞌ es phaꞌyets. 2Ñapaꞌ ña apareth atthoch tsaꞌtwerrnaya yoꞌchñar. Ñeñthpaꞌ ama eꞌñe yapthekpayaye, añekpaꞌnaña alloweney ñeñthey añe patsroꞌtsaꞌyeney.

3Ñerraꞌm eꞌñe poꞌñoxh yameꞌñerrñaña Yompor poꞌñoñ ñeñth ateth oteney allempoñapaꞌ eꞌñech poꞌñoxh yeñoter ñeñth ateth pena ña. 4Ñeñth otets, ñapaꞌ eꞌñoꞌ eñoteñ ateth pena Yompor, ñerraꞌm atthera athpareꞌtenan Yompor poꞌñoñ ñeñth ateth oteney, ñeñthña ateth otetspaꞌ ñapaꞌ atthakaꞌye shekën. Amaꞌt eꞌñe mameshapaꞌ ama xheññañoña Yompor poꞌñoñ poeyoxhro ñeñth eꞌñe poꞌñoxh ateth oteney. 5Tharraña ñerraꞌm eseshaꞌ eꞌñe poꞌñoxh ameꞌñerraya Yompor poꞌñoñ ñeñth ateth oteney, ña poꞌñoxhpaꞌ oꞌ morrenterrana Yompor eꞌñe poeyoxhrokmañen. Ñeñthpaꞌ atthoña yeñoteñ poꞌñoxhpaꞌ oꞌ yeparrokmaterr epay Yompor. 6Ñerraꞌm eseshaꞌ otets, ñapaꞌ eꞌñoꞌ parrokmaten epoet Yompor, ñeñthepñapaꞌ orrtatyesanepaꞌña ñeñth ateth phaꞌyeseꞌth Yompor Poechemer ñeñth Jesucristo.

Cristopaꞌ ña orrtaterreꞌ etserra morrentannaꞌteñets atthochña eꞌñe kowen yemorrentannerra

7Oꞌch masheñneshachaꞌ ñamha noxhaneshachaꞌ notas, ñeñth ateth notenes nekellkoth theꞌ amorrentannaꞌtpawepaꞌch sentannena allowenes ñeñthpaꞌ ama añeyaye ñoñets ñeñth ama seꞌmare. Amaꞌt allempotheñ eꞌñe errteꞌ sameꞌñerrapaꞌ allempotheñ seꞌmoerrña ñeñth ñoñets ñeñthchaꞌ ateth sepha eꞌñe kowen ñeñthara Yompor poꞌñoñ ñeñth eꞌñe errtes eꞌmoeneꞌ allempo. 8Tharraña morrentannaꞌteñets ñeñth ateth nekellkënnas theꞌ ñeñthpaꞌ eꞌñe ateth ñerraꞌmrratheꞌ oꞌ thayoꞌ orrtatonasetña ateth morrentannaꞌteñets, tharroꞌmar Cristo eꞌñe poꞌñoxh orrtatonayña eꞌñe etserra atthoch eꞌñe kowen yemorrentannaꞌterra, ñeñthoꞌmarña sapaꞌxhoꞌña theꞌpaꞌ oꞌ eꞌñe etserra sorrtaterrña samha atthoch semorrentannerra. Morrentannaꞌteñets poꞌñoxhpaꞌ ñeñthña atarr sherbets tharroꞌmar ora allowen ñeñth ama kowenayeꞌ enteno Yompor, ñeñthñapaꞌ alloꞌna sen wañwanmats. Ñeñthpaꞌ eꞌñe ateth pena ñerraꞌmrratheꞌ chekmeteꞌpaꞌ alloꞌna sen metwanmats. Allowen ñeñth eꞌñe poꞌñoxh kowen enten Yompor, ñeñthpaꞌ ateth ñerraꞌmrratheꞌ poetareꞌ, ñeñthña poꞌñoxh oꞌ aꞌpoetarsamperres.

9Ñeñthña otets ñapaꞌxhoꞌña Yomporoꞌ poꞌpoetarenñoꞌtsen tharraña ñerraꞌm orameñ eꞌmoñeꞌtyenan pamoꞌts, ñapaꞌxhoꞌ orameñ chekmetoꞌtsena. 10Tharraña ñeñth eꞌñe poꞌñoxh moerenaya pamoꞌtseshaꞌ, ñeñthñapaꞌ eꞌñe Yompor poꞌpoetarenño yexhena. Allñapaꞌ ama eñalleña ñeñthchaꞌ phaterrayerr ñeñth ama pokteyeꞌ enteno Yompor. 11Ñeñthña eꞌmoñeꞌtyeneꞌ pamoꞌts ñapaꞌ orameñ chekmetoꞌtsen. Ñañapaꞌ ateth pena ñerraꞌmrratheꞌ poesheñarr ñeñth chekmetach chopeñeꞌchyen, ama eñoteñe erreneththeꞌña sen tharroꞌmar chekmeteꞌpaꞌ ñeñtha aꞌnataklleꞌcheneꞌ.

12Nechemerneshachaꞌ sa soꞌchñarpaꞌ oꞌ aphretnaꞌwarethterra Cristeshoth, ñeñthoꞌmarña theꞌpaꞌ ateth nekellkënnas. 13Ñamha theꞌpaꞌ oꞌch notas samha allowenes ñeñthes eꞌñe pomporneshaꞌ penset. Sa theꞌpaꞌ oꞌ señoter Cristo ñeñth eꞌñe awathotheñ eñall amaꞌt eꞌñe allempotheñ ama ayexhkatarethtenaꞌ pats; ñeñthoꞌmarña theꞌpaꞌ ateth nekellkënnas samha. Ñamha theꞌpaꞌ oꞌch notas samha allowenes ñeñthes wepoeshares, sapaꞌ oꞌ eꞌñe sathpareꞌter oneñeth; ñeñthoꞌmarña sokop theꞌpaꞌ ateth nekellkënnas samha.

Ñamha sa nechemerneshachaꞌ theꞌ sapaꞌ oꞌ eꞌñe señoter ateth penaña Yompor Parets; ñeñthoꞌmarña theꞌpaꞌ ateth nekellkënnas eꞌñe sokop. 14Ñamha sa ñeñthes pomporneshaꞌ eꞌñe penset, sa theꞌpaꞌ oꞌ señoter Cristo ñeñth eꞌñe awathotheñ eñall amaꞌt eꞌñe allempotheñ ama ayexhkatarethtenaꞌ pats; ñeñthoꞌmarña theꞌpaꞌ ateth nekellkënnas. Ñamha sa ñeñthes wepoeshares, sapaꞌ atarr awamenkathes tharroꞌmar Yompor poꞌñoñpaꞌ oꞌ eꞌñe xhaponasa seyoxhro ñeñthoꞌmarña sapaꞌ oꞌ atarr sathpareꞌter oneñeth; ñeñthoꞌmarña theꞌpaꞌ ateth nekellkënnas.

15Amachña aña atarr semorrentatsto allowen ñeñth yentyen añe patsro tharroꞌmar ñerraꞌm aña atarr yemorrentena ñeñth añe patsroꞌtsenpaꞌ Yomporña Parets poꞌñoxhpaꞌ amach yemorrenteño, (ñeñthoꞌmarña amach errothenoth xhaponayoña yeyoxhro ñeñth ateth moenen ña). 16Allowen ñeñth eñall añe patsro, ateth ñerraꞌm ñeñth ateth moenatyeney yechets, ñamha ñeñth yeyeꞌchapretyena eꞌñe ya yekweñoth, ñamha ñeñth eꞌñe yemnen ya oꞌch eꞌñe kowen entapretenyet, ñeñthña allowenpaꞌ ama Yomporeshotheyeꞌ weno, ñeñthpaꞌ añe patsroꞌmarnesha pokthaphña. 17Allowen ñeñth yentyen añe patsropaꞌ ñeñthpaꞌ atarr awañaña, ñamha ñeñth yemnatseꞌtyen añe patsro ñeñthpaꞌxhoꞌña atarr awañaña. Tharraña ñeñth ateth petsa ñeñth eꞌñe ateth moenen Yomporpaꞌ ñeñthñapaꞌ amach wañerro amaꞌt errponaña.

Ateth pena kothaphñats ñeñth eꞌñe poꞌñoxh Yompor pokthaphña ñamha ateth pena poꞌpoñ kothaphñats ñeñth shekëñtsa

18Theꞌ nechemerneshachaꞌ oꞌch notas poꞌpoñoneth. Theꞌpaꞌ oꞌ mameshamerra oꞌch wañerr allempochña mellapoterra. Ateth seꞌmyen theꞌ ñeñthpaꞌ allempochña orrterra ñeñthchaꞌ atarr eꞌmoñeꞌterreꞌ Cristo poeyochreshowen. Oꞌ eꞌñe thayotheñ orretyesa shonteꞌ ñeñth xhokma eꞌmoñeꞌteneꞌ Cristo. Ñeñthoꞌmarña theꞌpaꞌ yeñoteñ oꞌ mellapoterrmocha. 19Amaꞌt awañmoꞌcha eꞌñe parrokma yapxhañeꞌth ñetña theꞌpaꞌ oꞌ awanmoet elloneth oꞌ sowanerryet tharroꞌmar poꞌñoxhpaꞌ ama allowenakmayeꞌ yeparrokmaterro. Ñerraꞌm poꞌñoxhchaꞌ allowenakmay yeparrokmaterreñ allempoña ñetpaꞌ alloꞌtsaꞌyenetañatheꞌ ñamet yesho. Tharraña theꞌña ñetpaꞌ oꞌ awanerret elloneth atthoña oꞌ yeñoterranet poꞌñoxhpaꞌ ama allowenakmayeꞌ yeparrokmaterro.

20-21Tharraña theꞌña sapaꞌ Cristoña sechorratenayaña Parets Poekamkëñ. Atthoña allowenes oꞌ eꞌñe señotwer. Sapaꞌ oꞌ eꞌñe señotwerr ñoñets ñeñth poꞌñoxh, ñeñthpaꞌ ama shekëñtsoyaye. Theꞌ sapaꞌ ama eꞌñe sepallteñotheyeꞌ nekellkënnaso ñeñth ateth poktetsa sokop. Tharroꞌmar sapaꞌ señoteñ ñeñth ñoñets shekëñetspaꞌ ama Yomporeshotheyeꞌ weno tharroꞌmar ñeñth Yompor poꞌñoñpaꞌ ñeñthña eꞌñe poꞌñoxh ama shekëñtsoyaye.

22Theꞌña sapaꞌ señochepaꞌch ñeñth atarr nanak ashkañtetsapaꞌ ñeñthkaꞌyeña otets Jesúspaꞌ añoꞌ Cristoyaye ñeñth atarr yekwen ya awathotheñ ñeñthchaꞌ llesenserr Yompor. Ñeñthoꞌmarña ñetpaꞌ xha eꞌmoñeꞌteñetña Cristo, ama xhoyeꞌ ameꞌñeñeto, Pomporeꞌnaña ama ameꞌñeññañeto, xha aꞌnasoteñet. 23Allowen ñeñth aꞌnasotenaya Yompor Poechemer, ñetpaꞌ Pomporeꞌnaña ama agëññañeto. Tharraña allowen ñeñth otets, Jesúspaꞌ Yomporo Poechemer ñeñth Cristotets, ñetñapaꞌ eꞌñe agëññañet Pompor.

24Ñeñthoꞌmarña oꞌch notas, Yompor poꞌkowenña ñeñth seꞌmoerr awañmoꞌchotheñ, theꞌña sa attho oꞌ eꞌñe señoter seyoxhro alloꞌnepaꞌch sesen ameꞌñaꞌnmatsa allochñapaꞌ atthoch eꞌñe kowen separrokmaterr epas Yompor Poechemer ñamha epas Yompor Parets. 25Jesucristopaꞌ ateth otnerrey oꞌch apoerrey eꞌñe poꞌñoxh atthochña yapaꞌ korretsayach yoksheñeshokmañen thayotheñ eꞌñe errponañowen.

26Ñeñth notenes añ nekellkoth ñeñthpaꞌ añekpa nekellkënnas atthoch sapaꞌ eꞌñech señoter allochñapaꞌ atthoch ama saꞌshkarethterro. 27Tharroꞌmar Jesucristo oꞌ chorraterrsa Parets Poekamkëñ, ñeñthoꞌmarña sapaꞌ ama sepallteno oꞌch eseshaꞌ yexhatas tharroꞌmar ñapaꞌ eñotataschaꞌ allowen. Ñamha ñeñthchaꞌ ateth yexhaterres ñapaꞌ eꞌñekaꞌye poꞌñoxh ateth, ñeñthpaꞌ ama shekëñtsoyaye. Ñeñth ateth yexhatenes sapaꞌ alloꞌnepaꞌch sesen parrokmatenaya Cristo.

28Theꞌña nechemerneshachaꞌ alloꞌnepaꞌch sesen parrokmatenaya Cristo allochñapaꞌ ñerraꞌm esempoch werra ñapaꞌ ñachña eꞌñe seyemtapoerra atthoch sapaꞌ amach xha sepenkapoero ñerraꞌm esempoch werra. 29Ñewa, sa theꞌpaꞌ oꞌ eꞌñe señoter Jesucristo ñapaꞌ eꞌñe pokteꞌ es phaꞌyen. Ñeñthoꞌmarña señochepaꞌch ñamha allowen ñeñth eꞌñe pokteꞌ es orrtatyets ñeñthñapaꞌ eꞌñe poꞌñoxh poechemer peñ Yompor.

Currently Selected:

1 San Juan 2: ame

Highlight

Copy