Samz 90
90
Lapwiyè Moziz, pwòfèt Bondyé-a
Lézòm La Pou An Mouman, Mé Bondyé La Pou Tout Tan
1Senyè, sé ou ki ka pwotèkté nou
pou tout tan.
2Dépi avan ou fè sé mòn-an,
èk avan ou fè latè-a èk tout sa ki andidanʼy,
ou té toujou Bondyé èk ou kay toujou Bondyé pou tout tan.
3Ou ka di lézòm pou viwé tounen lapousyè, ou ka fè yo viwé koté yo sòti-a.
4Yon mil lanné pa anyen pou ou, i
menm kon yè ki pasé,
i menm kon yon ti nèditan an lannwit-la.
5Ou ka fè lavi lézòm bout sibitman,
ou ka fè yo pasé menm kon yon wèv,
menm kon zèb ki ka lévé lé bonmaten,
6zèb ki fléwi bèl,
mé tan pou sòlèy kouché i ka fennen èk i ka mò.
7Lè ou an kòlè, sé détwi ou ka détwi nou.
Lè ou faché, nou ka pè.
8Ou ja mété movèzté nou douvanʼw,
jis sé péché-a nou ka fè an séwan-an ou mété koté pou wè.
9Ou ka koupé asou lavi nou afòs ou faché.
Avan nou pwan an ti lisouf, lavi nou ja fini.
10Swasant dis (70) lanné sé tout nou ni pou viv.
Si nou ni bon santé, nou kay wivé katwiven (80),
mé sé épi an pil twaka èk mizè.
Talè lavi nou ka bout èk nou ka fini nèt.
11Kilès ki sa fin konnèt ki sa ou kay fè lè ou faché kon sa?
Kilès ki sa fin konnèt mannyè pou yo pèʼw?
12Fè nou konnèt ki otan kout lavi nou kout,
pou nou sa ni lasajès Bondyé an tjè nou.
13Ki otan tan ankò ou kay wèsté faché, Bondyé Senyè?
Ni mizéwikòd asou nou, sé sèvant ou-a.
14Voyé lanmityé-a ou toujou ni-an asou nou toulé bonmaten,
pou nou sa chanté èk pou ni tjè kontan tout lavi nou.
15Atjwèlman, ban nou menm otan tjè kontan kon soufwans nou té ni
pou tout sé tan-an nou té an mizè-a.
16Kité nou, sé sèvant ou-a, wè gwan twavay ou,
kité désandan nou wè ki otan pouvwa èk klèté ou ni.
17Bondyé Senyè nou, nou ka mandéʼw pou voyé bontéʼw asou nou.
Fè nou pwòspéwé an tout sa nou ka fè.
Wi, fè nou pwòspéwé an tout sa nou ka fè.
Currently Selected:
Samz 90: acfDBL
Highlight
Share
Copy
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.
