Samz 84
84
Pou chèf mizisyen-an
An sam sé désandan Kora-a
Mwen Anvi Alé An Kay Senyè-a
1Pa dé bèl Kay ou bèl, Bondyé Senyè,
ou ki ni tout pouvwa-a!
2Mwen anvi alé lakay ou.
Dézi tjè mwen sé pou wèsté an Kay ou, Bondyé Senyè.
Mwen ka chanté épi tout tjè mwen
afòs Bondyé-a ki vivan-an ban mwen lajwa.
3Jis sé sikwiyé-a ki ka jwenn koté pou yo wèsté la,
èk sé pijon-an ka fè nich
pou yo fè piti yo bò lotèl ou, Bondyé Senyè-a ki ni tout pouvwa-a.
Sé ou ki wa mwen, sé ou ki Bondyé mwen.
4Pa dé bon i bon pou sé moun-an ki ka wèsté an Kay ou-a.
Yo toujou ka chanté pou glowifyé nonʼw.
5Pa dé bon i bon pou sé moun-an ou ka bay fòs-la,
sé moun-an ki ka kontan pou maché lonng lawout-la pou alé Mòn Zayonn-an.
6Kon yo ka pasé an fon sèk-la yo ka kwiyé Baka-a,
i ka vini an plas ki ni an pil sous dlo,
akwèdi pwèmyé lapli-a ka bay an bennédiksyon.
7Sé moun sala ka ni pli kouway kon yo ka maché alé.
Yo ka alé Zayonn pou pwézanté kò yo douvan Bondyé.
8Tann lapwiyè mwen, Bondyé Senyè-a ki ni tout pouvwa-a.
Panché tèt ou èk kouté mwen, Bondyé Jakòb-la.
9Bondyé, gadé wa-a ki ka pwotèkté nou-an.
Sé li ki wa-a ou ja chwazi-a.
10Yon jou an Kay ou
pli mèyè pasé yon mil lézòt jou an lòt koté.
Mwen simyé wèsté an pa lapòt Kay Bondyé-a
pasé pou mwen wèsté an kay sé méchan-an.
11Sé Bondyé Senyè-a ki klèté nou, sé li ki ka pwotèkté nou.
I ka voyé bontéʼy asou nou èk i ka onnowé nou.
Lè an moun ka fè sa ki dwèt,
Bondyé pa ka wifizéʼy anyen ki bon.
12Pa dé bon i bon pou sé moun-an ki mété konfyans yo an ou-a,
Bondyé Senyè-a ki ni tout pouvwa-a!
Currently Selected:
Samz 84: acfDBL
Highlight
Share
Copy
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.
