Samz 42
42
Pou chèf mizisyen-an
An chanté sé désandan Kora-a
Lapwiyè An Nonm Ki Lwen Péyiʼy
1Menm kon an zannimo anvi bwè dlo,
sé menm kon sa lam mwen anviʼw, Bondyé.
2Mwen swèf pou Bondyé,
Bondyé vivan-an.
Ki tan mwen kay sa alé adowé Bondyé lakay li?
3Lé swè kon lajouné,
sé dlo zyé mwen ki ka sèvi mwen manjé.
Lèlmi mwen toujou ka mandé mwen,
“Koté Bondyéʼw-la?”
4Tjè mwen ka fè mwen mal lè mwen chonjé tan avan,
lè mwen té ka alé èk tout sé moun-an an Kay Bondyé-a.
Sé mwen ki té ka douvan lè nou té ka maché alé.
An latilyé moun té ka fè fèt,
nou té ka andjélé, nou té ka chanté pou glowifyé Bondyé.
5Mwen di bay kò mwen, pouki mwen dékouwajé kon sa?
Pouki mwen ka twakasé kon sa?
Mwen kay èspéyé èk konfyans an Bondyé,
èk mwen kay viwé glowifyéʼy,
paski sé li ki ka édé mwen, sé li ki Bondyé mwen.
6Tjè mwen ka fè mwen mal,
sé pou sa mwen ka chonjé bontéʼw.
Mwen la bò Lawivyè Jouden-an,
bò Mòn Hèmonn-an èk Mòn Miza-a.
7Lanmè-a ka woulé,
yon lanm ka kwiyé lòt-la.
Twaka ka kouvè mwen
menm kon lanm ka sòti an lanmè-a.
8Lajouné Bondyé Senyè-a ka moutwé mwen mannyè i toujou enmen mwen,
èk lé swè mwen ka chanté an chanté ba li.
Sa sé an lapwiyè pou Bondyé-a ki ban mwen lavi-a.
9Mwen di Bondyé, kayè mwen-an,
“Pouki ou ja obliyé mwen?
Pouki ou ka kité mwen soufè kon sa
anba sé méchansté sé lèlmi mwen-an?”
10Mwen ka santi zo mwen ka kwazé lè sé lèlmi mwen-an ka motjé mwen
èk chak lè yo ka mandé mwen,
“Koté Bondyéʼw-la?”
11Mwen di bay kò mwen, pouki mwen dékouwajé kon sa?
Pouki mwen ka twakasé kon sa?
Mwen kay èspéyé èk konfyans an Bondyé,
èk mwen kay viwé glowifyéʼy,
paski sé li ki ka édé mwen, sé li ki Bondyé mwen.
Currently Selected:
Samz 42: acfDBL
Highlight
Share
Copy
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.
