Samz 104
104
Glowifyé Bondyé Ki Fè Tout Bagay
1Kité mwen glowifyé Bondyé Senyè-a èk tout lam mwen!
Bondyé Senyè mwen, pa dé gwan pouvwaʼw gwan!
Ou abiyé èk lonnè èk pouvwa,
2èk ou ni klèté anlèʼw menm kon an had.
Ou ouvè syèl-la anho latè-a menm kon an tant,
3èk ou fè kay ou jis pli ho pasé sé nwaj lapli-a.
Ou ka sèvi sé nwaj-la menm kon kawòs ou,
èk van-an ka pòtéʼw alé koté ou vlé.
4Ou ka sèvi van-an kon konmisyonnèʼw,
èk zéklè-a kon sèvant ou.
5Ou mété latè-a doubout fò asou fondasyonʼy,
èk anyen pa sa janmen soukwéʼy.
6Ou mété lanmè-a kouvèʼy menm kon an had,
èk dlo-a té ka kouvè sé mòn-an.
7Lè ou hélé dèyè dlo-a, i pati alé.
Lè i tann vwaʼw kon loway, i mété kouwi.
8Dlo-a filé désann mòn-an alé an fon-an,
i alé an plas-la ou pwépawé ba li-a.
9Ou mété an bòn ba li pouʼy pa sa janmen pasé,
pou anpéchéʼy kouvè latè-a ankò.
10Ou fè sé sous dlo-a koulé désann an sé fon-an,
èk ou fè sé lawivyè-a kouwi désann an fant sé mòn-an.
11Sé an yo bèt mawon ka bwè dlo,
sé adan yo bouwik mawon ka bwè lè yo swèf.
12Sé jibyé-a ka fè nich yo èk yo ka chanté
an sé pyé bwa-a ki bò dlo-a.
13Ou ka wèsté an syèl-la èk ou ka fè lapli tonbé asou sé mòn-an,
ou ka plen latè-a épi bennédiksyonʼw.
14Ou ka fè zèb lévé bay sé bèf-la
èk ou ka fè plan lévé pou moun sa sèvi
pou yo sa planté jaden yo
15èk pou yo sa fè diven pou fè tjè yo djé,
épi lwil doliv pou fè fidji yo kléwé,
èk manjé pou ba yo kouway.
16Sé pyé bwadnò Lèbannonn-an ka jwenn an chay lapli,
yo sé sa Bondyé Senyè-a, sé li menm ki planté yo.
17Sé jibyé-a ka fè nich yo adan,
èk sé kayal-la ni nich yo asou tèt sé pyé onflen-an.
18Sé kabwit mawon-an ka wèsté asou tèt sé mòn-an ki ho-a,
èk sé mannikou-a ka séwé an sé twou kayè-a.
19Ou fè lalin-an pou moutwé ki tan chak mwa ka koumansé,
épi sòlèy-la konnèt ki lè pouʼy kouché.
20Sé ou ki fè nwit-la, èk lè sòlèy kouché,
tout bèt an bwa ka sòti dèwò.
21Sé jenn lyon-an ka gwondé paditan yo ka chaché manjé,
manjé-a Bondyé menm ka ba yo-a.
22Lè sòlèy lévé, yo ka alé
kouché an twou yo.
23Moun ka alé fè twavay yo,
yo ka twavay pou jis lè sòlèy kouché.
24Ou ja fè tèlman gwan twavay, Bondyé Senyè,
sé ou èk tout lasajès ou ki fè yo tout.
Latè-a plen sé bèt-la ou fè-a.
25La ni lanmè-a ki gwan èk fon-an,
la ni bèt nou pa sa menm konté ka viv adanʼy,
gwo kon piti.
26Sé batiman-an ka navidjé anlèʼy, èk bèt-la yo ka kwiyé Léviyatan-an#104:26 Léviyatan pé vlé di népòt gwo bèt ki lanmè-a, ében an dwagon. ka jwé andidanʼy.
Sé ou menm ki fè gwo bèt sala.
27Yo tout ka dépan anlèʼw
pou ba yo manjé lè yo bizwenʼy.
28Ou ka ba yo manjé èk yo ka manjéʼy,
bouden yo ka plen èk bon manjé-a ou ba yo-a.
29Lè ou tounen doʼw anlè yo, yo ka pè,
lè ou pwan lisouf-la ou ba yo-a, yo ka mò
èk yo ka viwé tounen lapousyè.
30Mé lè ou ba yo lisouf, yo ka viv.
Ou ka viwé bay latè-a an fidji nèf.
31Kité pouvwa Bondyé Senyè-a diwé pou tout tan!
Kité Bondyé Senyè-a pwan plézi an tout sa i ja fè.
32I ka gadé latè-a èk latè-a ka koumansé twanblé,
i ka touché mòn-an èk lafimen ka sòti adanʼy.
33Mwen kay chanté bay Bondyé Senyè-a tout lavi mwen.
Tout tan mwen ka viv mwen kay chanté pou glowifyé Bondyé mwen-an.
34Kité chanté-a mwen chanté-a fè Bondyé Senyè-a plézi,
paski sé li ki ka ban mwen tjè kontan.
35Sé pou tout moun ki ka fè péché an latè-a dispawèt,
sé pou sé méchan-an fini nèt.
Kité mwen glowifyé Bondyé Senyè-a èk tout lam mwen.
Kité mwen glowifyé Bondyé Senyè-a.
Currently Selected:
Samz 104: acfDBL
Highlight
Share
Copy
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.
