SAKARAIA 12
12
Ena yaco na gauna era na veivutuni kina na Juta e na vuku ni nodra vakamatei koya na Mesaia, 1-14.
1Na vosa ni parofisai bibi maivei Jiova ka baleti ira na Isireli, sa kaya ko Jiova, o koya sa tevuka yani na lomalagi, ka sa tauyavutaki vuravura, ka sa cakava na yalo ni tamata e lomana. 2Raica, au na lewai Jerusalemi me bilo ni dauveivakamateni vei ira kecega na veimatanitu era tiko vakavolivolita, ena vaka talega kina ko Juta, ni sa buku na druadrua kei Jerusalemi. 3Ia e na gauna ko ya ka'u na lewai Jerusalemi me vatu dauveibitaki vei ira kecega na veimatanitu: ko ira kece era laveta era na mavoa vakaca kina, ia era na soqoni vata ga na lewe i vuravura kecega me ra mai kaba. 4E na siga ko ya, sa kaya ko Jiova, ka'u na vakidroataka na ose kecega; ka yaviti ira era sa vodoka, me ra lialia: ka'u na yadravi ira na Juta, ia ka'u na vakamatabokotaka na nodra ose kece na veimatanitu.
5A ra na dui kaya e lomadra na turaga ni Juta, Sa ra noqu kaukauwa ko ira na kai Jerusalemi e na vuku i Jiova ni lewe vuqa na nodra Kalou. 6E na siga ko ya ka'u na cakava na turaga ni Juta me ra tautauvata kei na miqa bukawaqa e na loma ni buka droka, ka tautauvata kei na cina e waqa tu e na loma ni veivau sila, a ra na kani ira na veimatanitu era tiko volita ki nai matau kei nai mawi: ena qai tawa tale ko Jerusalemi e na kenai tikotiko dina mai Jerusalemi. 7Ia ko Jiova ena vakabula taumada na nodra vale laca na Juta, me kakua ni viavialevu vei ira na Juta nai ukuuku ni mataqali i Tevita kei nai ukuuku ni kai Jerusalemi. 8E na siga ko ya ena vakarurugi ira na kai Jerusalemi ko Jiova; ia ko koya sa malumalumu vei ira e na siga ko ya ena tauvata kei Tevita; ia na mataqali i Tevita ena vaka na Kalou, io, ena vakataki koya na agilose i Jiova ka liutaki ira. 9Ia ena yaco e na siga ko ya, ka'u na segata me'u vakarusa na veimatanitu kecega era sa mai vala kei Jerusalemi. 10Au na sovaraka talega ki na mataqali i Tevita, kei na kai Jerusalemi, na yalo sa tubu kina na loloma kei na vakamamasu: ka ra na vakaraici au era sa coka, ka ra na tagicaki koya, me vaka e dua sa tagicaka na luvena e dua bauga, ka ra na rarawa sara e na vukuna, me vaka e dua sa rarawa sara e na vuku ni nona ulumatua.
11E na siga ko ya ena dua na tagi levu e Jerusalemi, me vaka na tagi mai Etatirimoni e na buca ko Mikitoni. 12Ia era na tagi na lewe ni vanua, na veivuvale yadua vakataki ira; na veivuvale ni mataqali i Tevita vakataki ira, kei na watidra vakataki ira; na veivuvale ni mataqali i Necani vakataki ira, kei na watidra vakataki ira; 13na veivuvale ni mataqali i Livai vakataki ira, kei na watidra vakataki ira; na veivuvale ni mataqali i Semeai vakataki ira, kei na watidra vakataki ira; 14io, na veivuvale kecega sa vo, na veivuvale yadua vakataki ira, kei na watidra vakataki ira.
Currently Selected:
SAKARAIA 12: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific