ROMA 2

Sa tukuna ko koya ni sa tamatai valavala ca ko ira na Jiu, a sa sega ni yaga me ra cakitaka, 1-16. Sa levu na ka sa solia vei ira na Kalou, a ra sa ca tikoga, a sa sega na nodra ulubale, 17-29.

1O koya oqo sa sega kina na nomu ulubale, o iko na tamata yadua sa daulewa: ni ko sa beitaki iko e na nomu lewa na tani; ni ko sai valavala tiko vakakina ko iko sa daulewa. 2Ia eda sa kila sa dina na lewa ni Kalou vei ira era sa kitaka na veika vakaoqo. 3Ia ko iko na tamata, sa lewai ira era sa kitaka na veika vakaoqo, ka sai valavala vakakina, ko sa nanuma beka ko na dro rawa mai na lewa ni Kalou? 4se ko sa beca beka na nona loloma levu, kei na nona vosota vakadede, kei na nona cudru vakamalua; ka ko sa sega ni vakasama ni sa tuberi iko ki na veivutuni na loloma ni Kalou? 5Ia ko iko, me vaka na nomu yalokaukauwa kei na lomamu sa sega ni veivutuni, ko sa binia tikoga vei iko na cudru ki na siga ni cudruvi, ena vakaraitaki kina na lewa dodonu ni Kalou; 6o koya ena sauma na tamata yadua me vaka na nonai valavala: 7na bula tawa-mudu, vei ira era sa gumatua tiko e nai valavala vinaka ka vakasaqara nai ukuuku kei na vakarokoroko kei na tawa mate rawa: 8ia na cudru kei na lesavi vei ira era sa dauveileti, ka talaidredre ki nai vakavuvuli dina, ia ka talairawarawa ki nai vakavuvuli tawa-dodonu; 9na rarawa kei na yaluma, vei ira na tamata kecega sai valavala ca tiko, sa liu vua na Jiu, vei koya talega sa matanitu tani; 10ia nai ukuuku, kei na vakarokoroko, kei na vakacegu, vei ira kecega sai valavala vinaka, sa liu vua na Jiu, vei koya talega sa matanitu tani.

11Ni sa sega ni vinakati ira vakailoa na tamata na Kalou: 12ni na rusa me vaka sa sega na vunau ko ira kecega sai valavala ca ka sega vei ira na vunau: ia ena lewai e na vunau ko ira kecega sai valavala ca ka sa tu vei ira na vunau, 13ni ra sa sega ni dodonu e na mata ni Kalou ko ira era sa rogoca walega na vunau, o ira ga era sa muria na vunau era na vakadonui: 14ni ra sa kitaka vakai ira ga na ka ni vunau ko ira na veimatanitu tani, sa sega vei ira na vunau, era sa qai nodra vunau vakai ira ga, ia sa dina sa sega vei ira na vunau: 15o ira era sa vakatakila sara ni sa volai e na yalodra nai valavala ni vunau, ka ni sa vakadinadina tiko na nodra lewa-eloma talega, ka ra sa dui lewa ni sa cala, se sa dodonu na nodra i valavala 16e na siga ena lesi Jisu Karisito kina na Kalou me lewa na nodra veika e vuni tu na tamata, me vaka na noqu i tukutuku-vinaka.

17Ia kevaka ko sa vakatokai mo Jiu, ka ko sa vakararavi e na vunau, ka sa dokadokai iko e na vuku ni Kalou, 18ka ko sa kila na lomana, ka vinakata na veika sa vinaka sara, ni ko sa vakatavulici mai na vunau; 19o sa vakararavi talega vei iko mo tuberi ira na mataboko, mo nodra rarama era sa tiko e na butobuto, 20mo nodra i vakavuvuli era sa sesewa, mo nodra i vakavuvuli na gone lalai, ni sa nomu e na vunau nai vakatakarakara ni vuku dina; 21ia ko iko, ko sa dauvakatavulica na tani, o sa sega li ni vakatavulici iko? o iko, ko sa dauvunau me kakua na butako, o sa bau butako ko iko? 22o iko, ko sa daukaya me kakua na dauyalewa, o sa bau dauyalewa ko iko? o iko, ko sa daucata na veimatakau, o sa bau butako mai na vale-ni-soro? 23o iko, ko sa dokadokai iko e na vuku ni vunau, o sa bau vakalialiai koya na Kalou ni ko sa talaidredre ki na vunau ko ya? 24Ni sa dauvosavakacacataki na yaca ni Kalou vei ira na veimatanitu e na vukumudou, me vaka sa volai.

25Ni sa dina sa yaga na veicili, kevaka ko sa talairawarawa ki na vunau: ia kevaka ko sa talaidredre ki na vunau, sa yaco kina na nomu cili me tawa cili. 26Ia kevaka e dua sa sega ni cili ka sa muria nai valavala dodonu ni vunau, ena sega li ni wili na nona tawa cili me cili? 27Ia ko koya sa sega ni cili vakayago, ke sa muria na vunau, ena sega li ni lewai iko, o iko sa talaidredre ki na vunau, ka sa tu vei iko nai vola kei na veicili? 28Ni sa sega ni Jiu ko koya sa vakakina vakarairai walega; ia sa sega ni veicili na ka sa rairai walega e na yago: 29ia sa Jiu ko koya sa vakakina eloma; a sa vakayalo na veicili, sa ka ni yalo, ka sa sega ni ka ni vosa walega; o koya sa sega ni doka ko ira na tamata, sa doka ga ko koya na Kalou.

Currently Selected:

ROMA 2: FOV

Highlight

Copy