NA SAME 49
49
Sa sega ni yaga ki na yaloda nai yau kei na lagilagi vakavuravura.
Vua na Domo-ni-sere. A nodra Same na luve i Kora.
1Dou rogoca na ka oqo, na tamata kecega;
Dou vakatu daliga, na kai vuravura kecega:
2Oi kemudou vata na tamata wale, kei na turaga,
Na vutuniyau kei na dravudravua.
3Ena vosataka na vuku na gusuqu;
Ia ena vakanananu na yaloqu ki na ka ni yalomatua.
4Au na vakalakala daligaqu ki na vosa vakatautauvata:
Au na taurivaka na noqu i bole e na api.
5A cava me'u rere kina e na siga ni rarawa,
Ni sa voliti au na nodra caka cala ko ira era lawakitaki au?
6O ira era vakararavi e na nodra kamunaga,
Ka dokai ira e na vuku ni nodra i yau levu;
7Sa sega sara e dua vei ira sa volia rawa na wekana,
Se solia rawa vua na Kalou na kenai voli:
8(Ni sa ka dredre nai voli ni yalodra,
A sa sega ni rawa ka tawa mudu:)
9Ka me bula tikoga ko koya,
Ka sega ni vuca rawa.
10Ni sa kunea ko koya era mate ga na tamata vuku,
Ka sa rusa vata talega na lialia kei na tamata sese sara,
Ka laiva na nodra i yau vei ira na tani.
11A lomadra dina, ni na tu ga na nodra veivale ka sega ni mudu,
Kei na nodra i tikotiko e nai tabatamata kecega;
Era sa vakayacana na nodra tiki ni vanua e na yacadra ga.
12Ia na tamata sa vakarokorokotaki sa sega ni tiko dei:
Sa vaka ga na manumanu sa rusa.
13Oqo na nodra i valavala na lialia:
Ia sa vinakata ga na nodra vosa ko ira na nodra kawa. Sela.
14Era sa lesi ki nai bulubulu me vaka na sipi;
Ena vakani ira ko mate;
Ena veitalia vei ira e na mataka ko ira na yalododonu:
Ena malai talega na nodra kaukauwa e nai bulubulu; me sega kina na kenai tikotiko.
15Ia na Kalou ena vakabula na yaloqu mai na kaukauwa ni bulubulu:
Ni na kauti au ko koya. Sela.
16Kakua ni ko rere ni sa vutuniyau mai e dua,
Ni sa levu mai nai ukuuku ni nona vale;
17Ni na sega ni kauta yani e dua na ka ni sa mate ko koya:
Ena sega ni muri koya sobu na nona totoka.
18Ni sa vosavakavinakataki koya ni sa bula tiko:
Ni ra na vakacaucautaki iko na tamata, ni ko sa caka vinaka vei iko:
19Ena lako na yalona ki nai tabatamata ni nona qase;
Era na sega sara ni kunea tale na rarama.
20A tamata sa vakarokorokotaki, ka sega ni yalomatua,
Sa vaka ga na manumanu era sa rusa ga.
Currently Selected:
NA SAME 49: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
