NA SAME 42
42
A masu ni tamata sa vakacacani e na vuku ni valavala dodonu.
Vua na Domo-ni-sere. A Masikili, a nodra na luve i Kora.
1Me vaka sa tagica na wai drodro na me kila,
Sa vakakina na yaloqu ni sa tagici kemuni na Kalou.
2Sa viagunu vua na Kalou na yaloqu, io vua na Kalou bula:
Au na rairai ninaica e na mata ni Kalou?
3A qau kakana tiko na wai ni mataqu e na siga kei na bogi,
Ni ra kaya tikoga vei au, Evei na nomu Kalou?
4Ni'u sa nanuma na ka oqo, sa luvu na yaloqu e lomaqu:
Ni'u a lako vata kei ira na le vuqa, au a lako vata kei ira ki na vale ni Kalou,
E na domo ni reki kei na vakavinavinaka, kei ira na le vuqa era ia na so levu tabu.
5Na yaloqu, o sa bibi lako e na vuku ni cava?
Se na vuku ni cava ko sa nuiqawaqawa e lomaqu?
Mo nuitaka na Kalou, ni'u na vakavinavinaka tale vua,
Ni sa noqu vu ni bula na matana.
6Noqu Kalou, sa bibi lako na yaloqu e lomaqu:
O koya oqo ka'u na nanumi kemuni kina e na vanua mai Joritani
Kei na nodra na kai Erimoni, mai na ulu-ni-vanua ko Maisa.
7Sa kaciva na wasa liwa na wasa liwa ni sa kere na nomuni savu:
Sa sevi au na nomuni biau sese kece kei na nomuni biau tubu kecega.
8Ia ena lewa ga ko Jiova na nona yalololoma me yaco mai kei na siga,
Ia e na bogi ena tu ga vei au na nona sere,
Kei na noqu masu vua na Kalou ni noqu bula.
9Au na kaya vua na Kalou na noqu uluvatu, O ni sa guilecavi au e na vuku ni cava?
A cava ka'u sa tagi voli kina ka ni ra sa vakasaurarataki au na meca?
10Sa vaka nai seleiwau e na suiqu, na nodra vakasewasewani au na noqu meca;
Ni ra tarogi au e na veisiga, Evei na nomu Kalou?
11Na yaloqu, o sa bibi lako e na vuku ni cava?
O sa nuiqawaqawa e lomaqu e na vuku ni cava?
Mo nuitaka na Kalou; ni'u na vakavinavinaka tale vua,
Na vu ni bula ni mataqu kei na noqu Kalou.
Currently Selected:
NA SAME 42: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
