NA SAME 37
37
A tamata caka dodonu ena vinaka ga; ena ca na tamata i valavala ca.
A Same i Tevita.
1Kakua ni ko rarawa e na vukudra nai valavala ca,
Se vuvutaki ira na daucaka ca.
2Ni ra na tamusuki kusarawa me vaka na co,
Me vaka na co drokadroka era na malai yani.
3Vakararavi vei Jiova, ka caka vinaka;
O na qai tiko ga e na vanua, ka vakani e na ka vakaidina.
4Ia mo rekitaki Jiova;
Ena solia vei iko ko koya na ka sa gadreva na yalomu.
5Laiva na nomu sala vei Jiova;
Vakararavi talega vua, ka na vakayacora ko koya.
6Ia ena vakaraitaka ko koya na nomu yalododonu me vaka na rarama,
Kei na ka ko sa lewai kina me vaka na siga levu.
7Vakarorogo vei Jiova, ka waraki koya tiko:
Kakua ni vakararawataki iko e na vuku i koya sa tamata yaco tiko,
E na vuku ni tamata sa vakayacora tiko na nonai naki ca.
8Kakua so ni cudru, biuta ga na daulesavi;
Kakua ni vakararawataki iko mo cala kina.
9Ni na muduki tani na daucaka ca;
Ia ko ira sa dauwaraki Jiova, era na taukena na vanua.
10Malua mada vakalailai, ena qai takali na tamata ca;
Io, ko na vakananuma na nona yasana, ia sa na yali kina ko koya.
11Ia ko ira na yalomalumalumu era na taukena na vanua;
Ka na daumarau tiko e na veivakacegui vakaidina.
12A tamata ca sa dauvereta na tamata dodonu,
Ka vakasequruquru vua.
13Ena dredrevaki koya na Turaga:
Ni sa raica sa toro mai na nona siga.
14Era sa ucuna nai seleiwau na tamata ca, ka kaloca na nodra dakai titi,
Me ra vakabalei ira na dravudravua kei na luveniyali, Ka me ra vakamatei ira nai valavala dodonu.
15Ena suaka dina na yalodra na nodra i seleiwau,
Ena musulaki talega na nodra dakai titi.
16Sa yaga vakalevu na ka lailai sa nona na tamata dodonu,
Ka yaga vakalailai nai yau sa nodra na tamata ca era le vuqa.
17Ni na musulaki na taba ni tamata ca:
Ia ko Jiova sa totaka na tamata dodonu.
18Sa kila tiko ko Jiova na nodra siga na yalododonu:
Ia na nodra i votavota ena sega ni oti rawa.
19Era na sega ni madua e na gauna ca:
Era na mamau e na gauna ni dausiga.
20Era na rusa na tamata ca,
Ia ko ira na meca i Jiova era na vaka na uro ni lami:
Era na vakaseavutaki; me vaka na kubou era na seavu yani.
21Sa daukerekere na tamata ca, ka sa sega ni sauma tale:
Ia na tamata dodonu sa yalololoma, ka daulomasoli.
22Era na taukena na vanua ko ira sa vakalougatataki mai vua;
Ia ko ira sa vakarusai mai vua ena muduki tani.
23Sa vakataudeitaka ko Jiova nai lakolako ni tamata vinaka:
Ka sa rekitaka na nona sala ko koya.
24Kevaka sa bale, ena sega ni vakabalei vakadua;
Ni sa tokoni koya cake ko Jiova e na ligana.
25Au a gone, ka'u sa qai qase mai;
Ia ka'u a sega ni raica na yalododonu ni sa biu laivi,
Se na nona kawa ni ra sa vosai kedra madrai.
26Sa yalololoma tiko ko koya, a sa dausoli tiko;
Ka sa kalougata na nona kawa.
27Biuta laivi na ka ca, ka caka vinaka;
Ka tiko dei ga ka sega ni mudu.
28Ni sa vinakata na ka dodonu ko Jiova,
Ka sa sega ni biuti ira na nona tamata era yalosavasava;
Era sa maroroi ka sega ni mudu:
Ia na nodra kawa na tamata ca ena muduki tani.
29Era na taukena na vanua ko ira na yalododonu, Ka tiko kina ka sega ni mudu.
30Sa vosataka na vuku na gusuna na yalododonu,
Ka sa vosataka na ka dodonu na yamena.
31Sa tiko e lomana na vunau ni nona Kalou;
Ena sega ni tidara e dua nai cavucavu ni yavana.
32Sa dauyadravi koya na yalododonu na tamata ca,
Ka sa dausegata me vakamatea.
33Ena sega ni biuti koya ki na ligana ko Jiova,
Se vakacalai koya ni sa lewai.
34Waraki Jiova, ka muria na nona sala,
Ena qai laveti iko cake mo taukena na vanua:
Ni ra sa muduki tani na tamata ca. Ko na raica.
35Au a raica e dua na tamata ca ni sa kaukauwa sara,
A sa tete na tabana me vaka na kau drokadroka sa tei e na kena qele dina.
36Ia ka'u sa qai lako tani tale, ka raica, sa yali:
Ia ka'u a vakasaqarai koya, ka sa sega ni kune.
37Vakasamataka na tamata yalododonu, ka raica na daucaka dodonu:
Ni sa kenai otioti ni tamata ko ya na vakacegu.
38Ia ko ira na dautalaidredre era na vakarusai vata:
Ka sa kedrai otioti na tamata ca me ra muduki laivi.
39Sa ka maivei Jiova na nodra vakabulai na yalododonu:
A nodra kaukauwa ko koya e na gauna rarawa.
40Ena vukei ira talega ko Jiova, ka vakabulai ira:
Ena vakabulai ira maivei ira na tamata ca, ka na maroroi ira,
Ni ra sa vakararavi vua.
Currently Selected:
NA SAME 37: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
