NA SAME 33
33
E dodonu me da vakavinavinaka vua na Kalou e na vuku ni nona loloma, kei na nona kaukauwa, kei na nona lewa; me da vakararavi talega vua.
1Dou rekitaki Jiova, koi kemudou sa yalododonu;
Ni sa kilikili kei ira na yalodina na vakavinavinaka.
2Vakavinavinaka vei Jiova e na api;
Sere vua e na soliteri e tini na kena wa.
3Seretaka vua na sere vou;
Qiriqiri vakavinaka ka me rogo levu.
4Ni sa dodonu na vosa i Jiova;
Sa dinadina kecega na nona cakacaka.
5Sa vinakata ko koya nai valavala dodonu kei na lewa dodonu;
Sa roboti vuravura na loloma i Jiova.
6Sa caka na lomalagi e na vosa i Jiova;
Kei na lewena kecega e nai cegu ni gusuna.
7Sa binia vata ko koya na wai ni wasa liwa mei binibini;
Sa maroroya na wai titobu e na lololo.
8Me rerevaki Jiova ko vuravura kecega;
Me rerevaki koya ko ira kece sa tiko e vuravura.
9Ni sa kaya ko Koya, ka sa yaco;
Sa vakarota ko Koya, ka sa tu dei.
10Sa vukica ko Jiova na nodra bose na veimatanitu me ka wale;
Sa cakava na nodra vakanananu na tamata me sega ni yaga.
11Ena tu ga ka sega ni mudu na bose i Jiova,
Kei na nanuma ni yalona ki na veitabatamata kecega.
12Sa kalougata na matanitu sa nodra Kalou ko Jiova;
Kei na mataqali sa digitaka ko koya me nonai votavota.
13Sa rai sobu mai lomalagi ko Jiova;
Sa raici ira kecega na luve ni tamata.
14Mai na tikina sa tiko kina ko koya sa vakararai
Vei ira kecega era sa tiko e vuravura.
15Sa cakava kecega na yalodra ko koya;
Sa vakananuma kecega na nodra i valavala.
16Sa sega e dua na tui sa bula e na vuku ni mataivalu levu;
Sa sega na qaqa me vakabulai e na nona kaukauwa levu.
17A ka wale na ose me bula kina;
Sa na sega ni vakabula e dua e na nona kaukauwa levu.
18Raica, na mata i Jiova sa wanonovi ira era sa rerevaki koya,
Ko ira era sa nuitaka na nona loloma;
19Me vakabula na yalodra mai na mate,
Me maroroya na nodra bula e na dausiga.
20Sa waraki Jiova na yaloda;
A nodai vukevuke kei na nodai sasabai ko koya.
21Ni na rekitaki koya na yaloda,
Ni da sa vakararavi e na yacana tabu.
22I Jiova, me tu ga vei keimami na nomuni loloma,
Me vaka ni keimami sa nuinui vei kemuni.
Currently Selected:
NA SAME 33: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
