MARIKA 9

Sa matalia na yago i Jisu, 210. A sa tukuni Joni vei ira na nona tisaipeli, 1113. Sa vakabula e dua na tamata ka curumi koya e dua na tevoro, 1429. Sa qai tukuna na nona mate, kei na nona tucake-take, a sa vakavulici ira na nona tisaipeli me ra yalomalumalumu, ka me ra lomani ira kecega era sa lotu, 3050.

1Sa kaya talega vei ira ko koya, Au sa kaya vakaidina vei kemudou, Sa tu eke eso, era na sega sara ni mate, era na raica mada na matanitu ni Kalou ni sa yaco vakaukauwa mai.

2Sa bogi ono, sa qai kauti Pita, kei Jemesa, kei Joni, ko Jisu, a sa kauti iratou vakatikitiki ki na dua na ulu-ni-vanua cecere, ko iratou vakai iratou ga; a sa matalia na yagona e matadratou. 3A sa lumilumisa mai na nonai sulu, sa vulavula sara me vaka na uca-vulavula; sa sega na dausavai sulu e vuravura e vakavulavulataka rawa me vakakina. 4A sa rairai vei iratou ko Ilaija kei Mosese: a ratou sa veivosaki kei Jisu. 5A sa vosa ko Pita, ka kaya vei Jisu, Vakavuvuli, sa vinaka na nodatou tiko eke; ia me keitou tara mada na vale vakacevaceva e tolu: e dua me nomuni, ka dua me nei Mosese, ka dua me nei Ilaija. 6Ni sa sega ni kila na ka me kaya; ni ratou sa rere vakalevu. 7A sa dua na o sa vakarurugi iratou: a sa dua na vosa sa lako mai na o, sa kaya, Oqo na noqu Gone ni toko: dou rogoci koya. 8A ratou sa veiraiyaki vakasauri, a sa sega na tamata tani eratou sa kunea, ko Jisu duaduaga.

9Ia ni ratou sa lako sobu tiko mai na ulu-ni-vanua, sa vakarota ko koya vei iratou me ratou kakua ni tukuna vua e dua na ka eratou a raica, ka malua me tu cake tale mai na mate na Luve ni tamata. 10A ratou sa vunia na vosa ko ya me tu ga vei iratou, a ratou sa veitarogi, se cava beka na tu cake tale mai na mate.

11A ratou sa tarogi koya, ka kaya, Era kaya e na cava ko ira na vunivola ni sa dodonu me lako mada mai ko Ilaija? 12A sa vosa ko koya, ka kaya vei iratou, Sa lako mada dina mai ko Ilaija, me vukica na ka kece me vinaka tale; ia ka vakaevei na ka sa volai kina na Luve ni tamata, ni sa dodonu me vosota ko koya na ka e vuqa, ka me vakalialiai? 13Ia kau sa kaya vei kemudou, Sa tadu dina mai ko Ilaija, a ra sa kitaka vua na ka kecega era sa vinakata, me vaka na ka sa volai e na vukuna.

14Ia ni sa yaco ko koya vei iratou na tisaipeli, sa raica era sa lewe vuqa sara sa voliti iratou, kei na vunivola eso era sa veileti kei iratou. 15Ia ko ira kece na lewe vuqa, ni ra sa raici koya, era sa kurabui sara, a ra sa cici mai ka veikidavaki kaya. 16A sa tarogi ira na vunivola ko koya, A cava dou veileti kina kei iratou? 17Ka dua vei ira na lewe vuqa sa vosa, ka kaya, Vakavuvuli, au sa kauta mai vei kemuni na luvequ-tagane, sa curumi koya e dua na yalo galu; 18ia e na yasana kecega sa tauva kina, sa waburaka: a sa qai busebuse kasivi ko koya, ka vakasequruquru bati, ka ciba yani: ia kau a vosa vei iratou na nomu tisaipeli me ratou vakaseva tani; a ratou sa sega ni rawata. 19Sa qai vosa ko koya, ka kaya, Ai tabatamata sega ni vakabauta! a cava na kena dede meu tiko kei kemudou? a cava na kena dede meu vosoti kemudou? kauti koya mai vei au. 20A ra sa kauta mai vei koya: ia ni sa raici koya ko koya, sa bitabitalaka sara na yalo; a sa bale ki na soso ko koya, ka vakatatoqitoqi ka tuburaki vuso.

21A sa taroga na tamana ko koya, Sa vakaevei na kena dede ni sa tauvi koya na ka oqo? A sa kaya, Ni sa gone ga: 22a sa biuti koya vakavuqa ki na bukawaqa, ki na wai talega, me vakamatea; ia kevaka ko ni sa rawata e dua na ka, mo ni lomani keirau mai, ka vukei keirau. 23Sa qai kaya vua ko Jisu, Kevaka ko sa vakabauta rawa, sa rawarawa na ka kecega vua sa vakabauta. 24Sa qai tabalaka vakasauri na domona na tama ni gone, ka kaya, ia ka vakawai na matana, Kemuni na Turaga, au sa vakabauta; vukea na noqu tawa-vakabauta. 25Ia ni sa raica ko Jisu era sa cici vata mai na lewe vuqa, sa vunauca na yalo velavela, ka kaya vua, Na yalo galu ka didivara, au sa vakarota vei iko, mo lako tani mai vua, ka mo kakua ni curuma tale. 26A sa qoqolou, ka bitabitalaka vakalevu, a sa qai lako tani; a sa vaka e dua sa mate ko koya; a ra sa kaya kina e lewe vuqa, Sa mate ko koya. 27A sa taura na ligana ko Jisu, ka vakaduria cake; a sa qai tu cake mai.

28Ia ni sa curu ki vale ko koya, sa tarogi koya lo ko ira na nona tisaipeli, E na vuku ni cava keitou sa sega ni vakasevi koya tani rawa kina? 29A sa kaya vei ira ko koya, O ira vakaoqo era sa sega ni vakasevi tani wale, sa rawa ga e na daumasu.

30A ra sa lako tani maikeri, ka lako voli e Kalili; a sa sega ni vinakata ko koya me dua na tamata me kila. 31Ni sa vakavulici ira na nona tisaipeli ko koya, ka kaya vei ira, Sa voleka na nona soli yani na Luve ni tamata ki na ligadra na tamata, ka ra na vakamatea; ia ni sa vakamatei, ena qai tu cake tale mai e nai katolu ni siga. 32A ra sa sega ni kila nai balebale ni vosa ko ya, a ra sa rere ni tarogi koya.

33Era sa qai yaco ki Kapenaumi; ia ni sa curu ki vale sa tarogi ira, A cava dou sa veileti kina e na gau-ni-sala? 34A ra sa vagagalu ga: ni ra a veileti vakai ira e na gau-ni-sala, se ko cei sa levu cake vei ira. 35A sa tiko sobu ko koya, ka kacivi ira na lewe tinikarua, ka kaya vei ira, Kevaka e dua sa via liu, ena muri sara, ka na qaravi kemudou talega. 36A sa kauta e dua na gone lailai, ka vakatura e na kedra maliwa: ia ni sa keveta, sa kaya vei ira, 37O koya yadua ena vinakata e dua na gone lailai vakaoqo e na vuku ni yacaqu, sa vinakati au; ia ko koya yadua sa vinakati au, sa sega ni vinakati au ga, sa vinakati koya talega sa talai au mai.

38Sa qai vosa vua ko Joni, ka kaya, Vakavuvuli, keitou a raica e dua sa vakaseva tani na tevoro eso e na yacamuni, ia ka sega ni muri keda ko koya: ka keitou sa tarova, ni sa sega ni muri keda. 39A sa kaya ko Jisu, Kakua ni tarova, ni sa sega e dua sa cakava e dua na cakacaka-mana e na yacaqu, me qai vosacataki au rawa. 40Ni sa nodai to ko koya sa sega ni noda meca. 41Ia ko koya yadua ena solia vei kemudou e dua na bilo wai mo dou gunuva, ni dou sai tokani i Karisito, au sa kaya vakaidina vei kemudou, ena sega ni yali vei koya na kenai sau. 42Ia ko koya yadua ena vakacala e dua vei ira na lalai oqo era sa vakabauti au, sa vinaka cake vua kevaka sa vakarubeci e domona e dua na vatu i qaqi, ka qai biu ki loma ni wasaliwa.

43Ia kevaka sa vakacalai iko na ligamu, muduka tani: sa vinaka vei iko mo curu ki na bula ka liga dua, ka ca me rua na ligamu ka mo lako ki eli, ki na bukawaqa e sega ni bokoci rawa: 44sa sega ni mate kina na nodra baca, a sa sega ni bokoci kina na bukawaqa. 45Ia kevaka sa vakacalai iko na yavamu, muduka tani: sa vinaka vei iko mo curu ki na bula ka yava dua, ka ca me rua na yavamu ka mo biu ki eli, ki na bukawaqa e sega ni bokoci rawa: 46sa sega ni mate kina na nodra baca, a sa sega ni bokoci kina na bukawaqa. 47Ia kevaka sa vakacalai iko na matamu, vecuka tani: sa vinaka vei iko mo curu ki na matanitu ni Kalou ka dua bauga na matamu, ka ca me rua na matamu ka mo biu ki eli sa waqa kina na buka: 48sa sega ni mate kina na nodra baca, a sa sega ni bokoci kina na bukawaqa.

49Ni na vakamasimataki ko koya yadua e na bukawaqa, ka na vakamasimataki nai madrali kece e na masima. 50A ka vinaka na masima: ia kevaka sa takali mai na masima na kena tuituina, ena vakatuituinataki tale e na cava? Me tu ga e na lomamudou na masima, dou veilomani talega vakai kemudou.

Currently Selected:

MARIKA 9: FOV

Highlight

Copy