MARIKA 7

Sa vunauci ira na tisaipeli i Jisu ko ira na Farisi, a sa vunauci ira na Farisi ko Jisu, 113. A veika era ca dina kina na tamata, 1423. Sa vakabula e dua na goneyalewa ko Jisu, 2430. Sa vakabula e dua sa didivara, ka kaka, 3137.

1Sa qai soqoni vata vua ko ira na Farisi, kei na vunivola eso, era sa lako mai Jerusalemi. 2Ia ni ra sa raica na nona tisaipeli eso era kana ni sa dukadukali na ligadra, ka ni sa sega ni vuluvulu mada, era sa vakaucacataka. 3Ia ko ira na Farisi, kei ira kecega na kai Jutia, era sa sega ni kana ni ra sa sega ni vuluvulu vakavinaka mada, ni ra sa vakabauta na nodrai vakavuvuli na qase. 4Ia ni ra sa tale mai na veivoli, era sa vuluvulu mada, a ra sa qai kana. A sa vuqa tale na ka tani era sa vakabauta me ra muria, na dere bilo ni gunu, kei na bilo i vakarau, kei na bilo parasa, kei nai tikotiko. 5Sa qai tarogi koya ko ira na Farisi, kei ira na vunivola, Ena cava era sa sega ni muria na nodrai vakavuvuli na qase ko ira na nomu tisaipeli, ni ra sa kana ka sega mada ni vuluvulu?

6A sa vosa ko koya, ka kaya vei ira, Sa tukuni kemudou vinaka eliu ko Aisea, koi kemudou na dauveivakaisini, me vaka sa volai, Ko ira na tamata oqo, era sa vakarokorokotaki au e na belenigusudra, Ia na yalodra sa yawa tani vei au; 7A sa sega ni yaga na nodra masuti au, Ni ra sa vakatavuvulitaka na vunau ni tamata mei vakavuvuli. 8Ni dou sa biuta tani na vunau ni Kalou, ka vakabauta nai vakavuvuli ni tamata.

9A sa kaya vei ira ko koya, Sa dina sara ni dou biuta na vunau ni Kalou, mo dou vakabauta na nomudoui vakavuvuli. 10Ni sa kaya ko Mosese, Vakarokoroko vei rau na tamamu kei na tinamu; ia, Ko koya sa vosavakacacataka na tamana se na tinana, me sa vakamatei. 11Ia dou sa kaya, Kevaka sa dua na tamata ena kaya vei tamana se tinana, Sa Koripani a kenai balebale, Sa tabu me nei koya na Kalou na noqu ka sa yaga vei iko; 12dou sa qai tarova me kakua ni cakava e dua na ka me yaga vua na tamana se na tinana: 13dou sa vakatawayagataka kina na vunau ni Kalou e na nomudoui vakavuvuli dou sa dauvakatavulica: a sa vuqa na ka vakaoqo dou sa kitaka.

14Ia ni sa kacivi ira kecega mai na lewe vuqa ko koya, sa kaya vei ira, Dou rogoci au koi kemudou kecega, ka mo dou kila: 15Sa sega na ka e taudaku ni tamata, ni sa curuma sa vakadukadukalitaka rawa; ia na veika sa curu yani mai vua, oqori ga sa vakadukadukalitaka na tamata. 16Kevaka e dua na tamata sa vakadaligana me rogoca, me mani rogoca sara.

17Ia ni sa laivi ira na lewe vuqa ko koya, ka curu ki vale, sa tarogi koya ko ira na nona tisaipeli e na vuku ni vosa vakatautauvata. 18A sa kaya vei ira ko koya, Oi kemudou talega, dou sa sega ni kila rawa oqo, ne? Dou sa sega beka ni kila, na ka kecega etaudaku sa curuma na tamata, sa sega ni vakadukadukalitaka rawa; 19ni sa sega ni curu dina ki na yalona, ki ketena walega, a sa qai lako tani ki nai benubenu, a sa caka kina me savasava na kakana kecega? 20Sa kaya talega ko koya, A ka sa curu yani mai na tamata, oqori ga sa vakadukadukalitaka na tamata. 21Ni sa curu yani mai loma, mai na yalodra na tamata, na nanuma ca, na dauyalewa, na daudara, na daulaba, 22na daubutako, na daukocokoco, nai valavala ca, na dauveivakaisini, na daugagano, na mata ca, na vosa vakacaca, na viavialevu, na lialia: 23a ka ca kecega oqo sa curu yani mai loma, a sa vakadukadukalitaka na tamata.

24Sa qai cavu tu ko koya, ka lako tani maikeri vaka ki na veiyasana i Taia kei Saitoni, a sa curu ki na dua na vale, ka sega ni vinakata me dua na tamata me kila: ia sa sega ni vuni rawa ko koya. 25Ni sa dua na yalewa ka curuma na luvena sa goneyalewa e dua na yalo velavela, sa rogoca na kenai tukutuku, a sa lako mai ka cuva ki na yavana: 26a yalewa mai na dua na matanitu tani, a yalewa ni Sairo-finisia; a sa masuti koya me vakaseva tani na tevoro mai na luvena-yalewa. 27A sa kaya vua ko Jisu, Me ra mamau mada ko ira na gone; ni sa sega ni vinaka me kau na kedra na gone, ka biuta vei ira na koli. 28A sa vosa na yalewa, ka kaya vua, E dina ga, Turaga; ia ko ira na koli e ruku ni tepeli era kania na meme ni kedra na gone. 29Sa qai kaya vua ko koya, E na vuku ni vosa oqo, mo lako ga; sa lako tani mai na luvemu-yalewa na tevoro. 30Ia ni sa yaco ki nona vale, sa kunea ni sa lako tani na tevoro, a sa davo e nai mocemoce na luvena-yalewa.

31A sa lesu tale ko koya mai na veiyasana i Taia kei Saitoni, a sa lako e loma ni vanua vaka-Tikapoli, ki na wai mai Kalili. 32A ra sa kauta mai vei koya e dua sa didivara, a sa kaka; a ra sa masuti koya me tabaka e na ligana. 33A sa kauti koya vakatikitiki maivei ira na lewe vuqa, a sa daramaka na nonai qaqalo ki na daligana ruarua ni tamata, ka kasivi, ka tara na yamena; 34sa qai ta cake ki lomalagi, ka vutugu, ka kaya vua, Efaca, a kenai balebale, Mo rogo mada. 35A sa qai rogo na daligana ruarua, a sa sereki na wa ni yamena, ka sa vosa macala mai.

36Sa qai vakarota vei ira ko koya, me ra kakua ni tukuna vua e dua na tamata: ia ni sa vakarota vakalevu vei ira ko koya, era sa dautukuna vakalevu sara kina; 37ka sa kurabui vakalevu sara ko ira, ka kaya, Sa cakava vakavinaka na ka kecega ko koya; sa kitaki ira na didivara me ra rogo, kei ira talega na galu me ra vosa.

Currently Selected:

MARIKA 7: FOV

Highlight

Copy