MARIKA 3

Sa vakabula ko Jisu e dua na tamata sa malai na ligana, kei ira e le vuqa sa tauvi-mate, 112. Sa digitaki ira nai apositolo, 1319. Eratou sa kaya na wekana ni sa lialia ko koya, 20,21. Sa vosa ko Jisu vei ira era sa beitaki koya e na nona vakasevi ira na tevoro, 2230. Sa tukuni ira era sa wekana dina, 3135.

1A sa curu tale ko koya ki na vale ni lotu; a sa tiko kina e dua na tamata sa malai na ligana. 2A ra sa vakaraici koya, se na vakabulai koya e na siga ni vakacecegu, se segai; me ra qai beitaki koya. 3Sa qai kaya ko koya vua na tamata sa malai na ligana, Tu cake mai. 4A sa tarogi ira, Sa tara beka me caka na ka vinaka e na siga ni vakacecegu, se me caka na ka ca? me ia na veivakabulai, se na veivakamatei? A ra sa galu ga. 5Ia ni sa rai voli vakacudrucudru vei ira ko koya, ni sa rarawa na lomana e na vuku ni kaukauwa ni yalodra, sa kaya vua na tamata, Dodoka mai na ligamu. A sa dodoka yani: a sa vakabulai na ligana ka yaco me vaka na ligana kadua. 6A ra sa lako yani na Farisi, ka bosei koya sara ko ira vata kei ira nai tokani i Eroti, se ra na vakamatei koya vakaevei.

7A sa lako tani ko Jisu vaka ki wai kei ira vata kaya na nona tisaipeli: a ra sa lewe vuqa sara sa muri koya mai Kalili, kei Jutia, 8mai Jerusalemi talega, kei Itumia, kei na tai kadua ni Joritani; ko ira talega e na veiyasana i Taia kei Saitoni, era lewe vuqa sara, ni ra sa rogoca na levu ni veika sa cakava ko koya, era sa lako mai vei koya. 9A sa kaya ko koya vei ira na nona tisaipeli, me toka e dua na waqa lailai ko koya e na vukudra na lewe vuqa, de ra drigiti koya. 10Ni ra sa lewe vuqa sa vakabula ko koya; a ra sa drigiti koya kina me ra tarai koya, ko ira kecega era sa tauvi-mate. 11O ira talega na yalo velavela, ni ra sa raici koya, era sa cuva sobu e matana, a ra sa qoqolou, ka kaya, O iko na Luve ni Kalou. 12A sa vakarota matua vei ira ko koya, me ra kakua ni tukuni koya.

13A sa cabe ki na ulu-ni-vanua, ka kacivi ira mai sa digitaka: a ra sa lako mai vua. 14A ra sa lewe tinikarua sa lesia ko koya, me ra tiko vata kaya, ka me vakatalai ira ko koya me ra vunau, 15me tu talega vei ira na kaukauwa me ra vakasevi ira na tevoro: 16A sa vakayacani Saimoni ko koya mei Pita: 17kei Jemesa na luve i Sepete, kei Joni na taci i Jemesa, a sa vakayacani rau ko koya mei Poanaji, e kenai balebale, A luve ni kurukuru: 18kei Adriu, kei Filipi, kei Pacolomiu, kei Maciu, kei Tomasi, kei Jemesa na luve i Alifio, kei Cateo, kei Saimoni e dua vei ira sa vakatokai Na gumatua, 19kei Jutasa Isikarioti, ko koya sa soli koya yani. A sa curu ko koya ki na dua na vale. 20A ra sa lewe vuqa sa soqoni vata tale, a ra sa sega kina ni kania rawa na kedra. 21Ia ni ratou sa rogoca ko iratou na wekana, eratou sa lako mai me ratou tauri koya: ni ratou sa kaya, Sa lialia ko koya.

22Ia ko ira na vunivola ka lako sobu mai Jerusalemi, era sa kaya, Sa tiko vua ko Pielisipupi, a sa vakasevi ira na tevoro e na kaukauwa ni nodra turaga na tevoro.

23A sa kacivi ira mai ko koya, ka kaya vei ira e na vosa vakatautauvata, E rawata vakaevei ko Setani me vakasevi Setani? 24Ia kevaka sa dua na matanitu sa veisei vakai koya, ena sega ni tu dei rawa na matanitu ko ya: 25ia kevaka sa dua na vale sa veisei vakai koya, ena sega ni tu dei rawa na vale ko ya. 26Ia kevaka sa ia ko Setani me veivala vakai koya, ka veisei, ena sega ni tu dei rawa, ena oti ga. 27Sa sega na tamata me curuma rawa na vale ni qaqa, ka kovea na nonai yaya, kevaka sa sega mada ni vesuka na qaqa, ena qai kovea emuri na nonai yau. 28Au sa kaya vakaidina vei kemudou, Sa rawa me bokoci laivi na nodrai valavala ca kecega na luve ni tamata, kei na nodra vosa ca kecega era sa vosavakacacataka kina na Kalou: 29ia ko koya sa vosavakacacataka na Yalo Tabu ena sega tikoga ni bokoci na nonai valavala ca, ia sa tu vua na nona cala ka tawa mudu: 30ni ra kaya, Sa dua na yalo velavela sa tu vua.

31Sa qai lako mai ko iratou na tinana, kei na tacina, a ratou sa tu etautuba, ka talaki vua me lako mai. 32Ia era sa lewe vuqa sa tiko vakavolivolita; ka ra sa kaya vua, Raica, na tinamu kei iratou na tacimu eratou sa tu etautuba, eratou mai qarai iko. 33A sa vosa vei ira, ka kaya, Ko cei na tinaqu se ko iratou na taciqu? 34A sa vakaraici ira era sa tiko vakavolivoliti koya, ka kaya, Raica na tinaqu kei ira na taciqu! 35ko koya yadua ena muria na loma ni Kalou, sai koya oqo na taciqu, se na ganequ, se na tinaqu.

Currently Selected:

MARIKA 3: FOV

Highlight

Copy