LUKE 5

Eso na cakacaka-mana sa cakava ko Jisu, 1—26. Sa kacivi Maciu na daukumuna nai vakacavacava me nonai talatala, 27—32. Sa vakavulici ira na tamata, 33—39.

1Ia ni sa drigiti koya ko ira na tamata me ra rogoca na vosa ni Kalou, sa tu ko koya e na bati ni drano mai Kenisareti, 2a sa raica e rua na waqa sa noka e na drano; ia eratou sa lako tani kina na gonedau, a sa vuya na lawa. 3A sa vodoka e dua na waqa, a nei Saimoni, a sa kerea me toro yani vakalailai ki wai. A sa tiko sobu ko koya e na waqa, ka vakavulici ira na lewe vuqa.

4Ia ni sa tinia na nona vosa ko koya, sa kaya vei Saimoni, Sudra yani ki wai titobu, ka dou viritaka sobu na nomudou lawa me rawa mai eso. 5A sa vosa ko Saimoni, ka kaya vua, Na Turaga, keitou sa ia tiko e na bogi ka sigavaka, ka keitou sa sega ni rawata e dua na ka; ia e na vuku ni nomuni vosa, ka’u na viritaka sobu na lawa. 6Ia ni ratou sa kitaka vakakina, sa ka levu sara na ika eratou sa kovuta: a sa bote kina na nodratou lawa. 7A ratou sa yalovi iratou na nodratoui tokani eratou sa tiko e na waqa kadua, me ratou mai vukei iratou. A ratou sa lako mai, a ratou sa vakasinaita ruarua na waqa, a rau sa voleka ni luvu. 8Ia ni sa raica ko Saimoni Pita, sa cuva sobu ki na duru i Jisu, ka kaya, Mo ni lako tani vei au, na Turaga; ni’u sa tamata ca. 9Ni sa kurabui ko koya, kei ira kecega era sa tiko vata kaya, e na vuku ni qele ni ika era sa rawata: 10a sa vaka talega kina ko Jemesa kei Joni, koi rau na luve i Sepete, eratou sa veitokani kei Saimoni. A sa kaya vei Saimoni ko Jisu, Kakua ni rere; e na veisiga maimuri ko na rawai ira na tamata. 11Ia ni ratou sa kauta ruarua na waqa ki vanua, eratou sa biuta na ka kecega, ka muri koya.

12Ia ni sa tiko e na dua na koro ko koya, raica, sa dua na tamata sa roboti koya na vukavuka: ia ni sa raici Jisu, sa cuva vakatoboicu, ka masuta, ka kaya, Kemuni na Turaga, kevaka ko ni sa vinakata, ko ni sa vakasavasavataki au rawa. 13A sa dodoka na ligana ko koya, ka tarai koya, ka kaya, Au sa vinakata: mo savasava mai. A sa takali sara vua na vukavuka. 14A sa vakarota vua ko koya me kakua ni tukuna vua e dua: ia mo laki vakaraitaki iko vua na bete, ka vakacabora na nomui vakasavasavataki, me vaka na vosa i Mosese, mei vakadinadina vei ira. 15Ia na kenai rogorogo sa kuruvaki vakalevu sara kina; a ra sa lewe vuqa sara era sa soqoni vata mai me ra vakarogoca, me ra sa vakabulai talega mai na nodra malumalumu.

16A sa lako tani yani ko koya ki veikau, ka masu.

17Ia sa dua na siga, sa vakatavuvuli tiko ko koya, ka sa tiko voleka kina eso na Farisi kei na vu-ni-vunau, era sa lako mai na koro lalai kecega mai Kalili, kei Jutia, mai Jerusalemi talega: a sa tu vua na kaukauwa ni Turaga me vakabulai ira. 18Ka raica, eso na tamata eratou sa kauta mai e nai mocemoce e dua na tamata sa tauvi-paralasi; a ratou sa vakatovolea me ratou kauta ki loma, me ratou vakadavora e na mata i koya. 19Ia ni ratou sa sega ni kauti koya rawa ki loma e na vukudra na lewe vuqa, eratou sa cabe cake ki dela ni vale, ka tukuca sobu e na macawa ni tibitibi e nai mocemoce ki na kedra maliwa e na matai Jisu. 20Ia ni sa raica na nodratou vakabauta ko koya, sa kaya vua, Ko iko, sa bokoci na nomui valavala ca. 21A ra sa vakatekivu ko ira na vunivola kei ira na Farisi me ra veinanuyaka, ka kaya, Ko cei oqo sa vosa vakacacataka na Kalou? ko cei tale sa bokoca rawa nai valavala ca, na Kalou duaduaga? 22Ia ni sa kila ko Jisu na nodra veinanuyaka, sa vosa, ka kaya vei ira, A cava dou sa veinanuyaka e na lomamudou? 23a cava vei rau e rawarawa cake, me kaya, Sa bokoci na nomu i valavala ca; se me kaya, Mo tu cake, ka lako voli? 24ia mo dou kila kina ni sa rawata na Luve ni tamata e vuravura me bokoca nai valavala ca, (sa qai kaya ko koya vua sa tauvi-paralasi,) Au sa kaya vei iko, Mo tu cake, ka kauta na nomui mocemoce, ka lako ki na nomu vale. 25A sa tu cake sara ko koya e matadra, a sa kauta na ka sa davo kina, ka lako ki na nona vale, ka vakarokorokotaka na Kalou.

26A ra sa kurabui kecega, a ra sa vakarokorokotaka na Kalou; a sa kani ira na rere, ka kaya, Eda sa kunea edaidai na veika e veivakurabuitaki sara.

27Sa oti na veika oqo, sa lako yani ko koya, a sa raica e dua sa kumuna nai vakacavacava, ko Livai na yacana, sa tiko e na vale ni vakacavacava: a sa kaya vua, Muri au. 28A sa biuta na ka kecega ko koya, ka cavu tu, ka muri koya.

29A sa cakava vua e dua na magiti levu ko Livai e nona vale: a ra sa lewe vuqa na kumuna nai vakacavacava kei ira tale eso era sa tiko vata kei ira me ra kana. 30Ia ko ira na nodra vunivola kei ira na Farisi era sa vosa vakatani vei ira na nona tisaipeli, ka kaya, A cava dou sa kana vata ka gunu vata kina kei ira sa kumuna nai vakacavacava kei ira na tamatai valavala ca? 31A sa vosa ko Jisu, ka kaya vei ira, Sa sega ni yaga na vuniwai vei ira sa bula vinaka; vei ira ga era sa tauvi-mate: 32au sa sega ni lako mai me’u kacivi ira na yalododonu, me ra veivutuni, ko ira ga nai valavala ca.

33A ra sa kaya vua, A cava sa lolo vakavuqa tiko kina ka daumasu ko ira na tisaipeli i Joni, kei na nodra tisaipeli talega na Farisi: ia na nomuni era sa kana ka gunu? 34A sa kaya vei ira ko koya, Dou sa lewai ira rawa li na weka ni tagane sa qai vakawati me lolo, ni sa tiko vata kei ira na tagane sa qai vakawati? 35Ia ena yaco mai na siga, ena kau tani kina vei ira na tagane sa qai vakawati; era na qai lolo e na gauna ko ya.

36A sa vosataka talega vei ira e dua na vosa vakatautauvata: Sa sega na tamata sa cula vata na tiki ni sulu vou ki nai sulu madra; de sa dresuka na tikina vou, a sa sega ni veikabi vata na tikina vou sa cula kaya nai sulu madra. 37A sa sega na tamata sa vakataloca na waini vou ki na tavaya kuli-ni-manumanu madra; de sa vakacabotetaka na tavaya na waini vou a sa dave yani, ka sa ca talega na tavaya. 38Ia ka vinaka me vakataloci na waini vou ki na tavaya vou, a sa maroroi ruarua kina. 39Sa sega talega na tamata, ni sa gunuva oti na waini makawa, me qai vinakata na waini vou; ni sa kaya, E vinaka vei rau na ka makawa.

Currently Selected:

LUKE 5: FOV

Highlight

Copy