LUKE 16

A vosa vakatautauvata ni dau-ni-yau tawa dodonu, 1—13. Sa vunauci ira na Farisi ko Jisu, 14—18. Sa tukuna na tamata vutuniyau kei Lasarusa, 19—31.

1A sa kaya talega ko koya vei ira na nona tisaipeli, Sa dua na tamata vutuniyau, sa dua na nona dau-ni-yau, a sa beitaki vua ni sa vakayalia tiko na nonai yau. 2A sa kaciva ko koya, ka kaya vua, A cava oqo ka’u sa rogoca vei iko? tukuna mai na nomu cakacaka vaka dau-ni-yau; ni sa dredre mo dau-ni-yau tiko. 3Sa qai vakananuma e lomana na dau-ni-yau, A cava me’u kitaka, ni sa kauta tani vei au na noqu turaga na cakacaka vaka dau-ni-yau? Au sa sega ni rawata na cuki were; au sa madua ni kerekere. 4Au sa qai kila na ka me’u kitaka, me ra kauti au kina na tamata eso ki na nodra veivale, ni’u sa sivo mai na cakacaka vaka dau-ni-yau. 5Sa qai kacivi ira kecega na tamata era sa sega ni sauma na nodra dinau vua na nona turaga, a sa tarogi koya sa liu mai, E vica mada na nomu dinau vua na noqu turaga? 6A sa kaya ko koya, E dua na drau nai vakarau waiwai. A sa kaya vua, Taura na nomui vola, ka tiko sobu sara, ka vola me limasagavulu. 7Sa qai taroga tale e dua, E vica na nomu dinau? A sa kaya, E dua na drau nai vakarau sila. A sa kaya vua, Taura na nomui vola, ka vola me walusagavulu. 8A sa doka na dau-ni-yau tawa dodonu na turaga, e na vuku ni sai valavala vakavuku; ni ra sa vuku vakalevu na gone ni vuravura e na ka sa baleti ira, a ra sa vuku vakalailai ga na gone ni rarama.

9Ia ka’u sa kaya vei kemudou, Mo dou cakava eso me wekamudou e nai yau e sega ni dina; me ra na kauti kemudou kina ni dou na mate ki na veitikotiko e sega ni oti rawa. 10O koya sa dina e na ka lailai, ena dina talega e na ka levu; ia ko koya sa sega ni dodonu e na ka lailai, ena sega talega ni dodonu e na ka levu. 11Ia kevaka dou a sega ni dina e nai yau sa sega ni dodonu, ko cei ena vakararavi vei kemudou e na vuku ni yau sa dina? 12Ia kevaka dou sa sega ni dina e nai yau sa nona na tani, ko cei ena solia vei kemudou na ka sa nomudou? 13Sa sega e dua na tamata sa qarava rawa e lewe rua na turaga; ni na cata e dua, ka lomani koya kadua: se na kabita e dua, ka beci koya kadua. Dou sa sega ni qarava rawa na Kalou kei nai yau.

14Ia na Farisi, era sa daulomana nai lavo, ni ra sa rogoca na ka kecega oqo, era sa vakalialiai koya.

15A sa kaya vei ira ko koya, Oi kemudou dou sa vakadonui kemudou e matadra na tamata; ia sa kila na lomamudou na Kalou: ni sa ca sara e na mata ni Kalou na ka e vinaka sara vei ira na tamata. 16Sa yacova na gauna i Joni na vunau kei ira na parofita: mai na gauna ko ya sa vunautaki na matanitu ni Kalou, a ra sa gu sara me ra curu kina ko ira na tamata kecega. 17Ka sa rawarawa me takali laivi ko lomalagi kei vuravura, ka dredre me lutu wale e dua na tiki ni vunau sa lailai sara.

18O koya yadua sa biuta na watina, ka laki vakawati kei na dua tani, sa dauyalewa; ia ko koya erau veiwatini kaya sa biuta na watina, sa dauyalewa.

19Sa dua na tamata vutuniyau, sa vakaisulu e nai sulu lokaloka kei na lineni matailalai, a sa daumarau vakalevu e na veisiga kecega: 20ka sa dua na tamata dravudravua, ko Lasarusa na yacana, sa vakadavori e na mata ni nona vale, sa robota na yagona na vidikoso, 21a sa garova me vakani e na meme ni kakana sa lutu mai na tepeli ni tamata vutuniyau: sa lako talega mai na koli ka dramica na nona vidikoso. 22Ia sa mate ko koya sa dravudravua, ka ra sa qai kauti koya ko ira na agilose ki na lomasere i Eparaama. Sa mate talega ko koya sa vutuniyau, ka sa bulu; 23a sa ta cake mai etesi, ni sa vakararawataki tu, a sa raici Eparaama vakayawa, kei Lasarusa e lomaserena. 24A sa kaci, ka kaya, I tamaqu Eparaama, lomani au mai, ka talai Lasarusa, me tonisua na vuso ni nonai qaqalo e na wai, me mai vakabatabatataka na yamequ; ni’u sa vakararawataki e na yameyame ni buka oqo. 25A sa kaya ko Eparaama, Na luvequ, nanuma ni ko a rawata na nomu veika vinaka ni ko a bula tiko, sa vaka talega kina ko Lasarusa na veika ca; ia edaidai sa qai vakacegui eke ko koya, ia ko iko, ko sa vakararawataki; 26oqo talega sa viritoka e na keda maliwa e dua na keli titobu sara; ia ko ira sa via lako tani eke vei kemudou, era sa sega ni rawata; ia ko ira sa tiko maikeri, era sa sega ni lako rawa mai kivei keimami. 27Sa qai kaya ko koya, Au masuti iko kina, tamaqu, mo talai koya ki na vale nei tamaqu: 28ni ratou sa lewe lima keitou sa veituakani; me laki vakasalataki iratou, de ratou lako talega mai ki na tikina rarawa oqo. 29Sa kaya vua ko Eparaama, Sa tu ga vei iratou ko Mosese kei ira na parofita; me ratou rogoci ira. 30A sa kaya ko koya, E segai, tamaqu Eparaama; ia kevaka e dua vei ira na mate sa lako vei iratou, eratou na qai veivutuni. 31Sa qai kaya vua ko koya, Kevaka era sa sega ni rogoci Mosese kei ira na parofita, era na sega ni vakarogoca, kevaka sa tu cake e dua mai na mate.

Currently Selected:

LUKE 16: FOV

Highlight

Copy