JONI 11

Sa vakaturi Lasarusa cake tale mai na mate ko Jisu, 144. Era sa lewe vuqa na kai Jutia sa vakabauta, 45,46. Sa bosei Jisu ko ira na bete levu kei ira na Farisi, ka sa vunitaki koya ko Jisu, 4754. Era sa vakasaqarai koya me vakamatea, 5557.

1Ia sa dua na tamata sa tauvi-mate, ko Lasarusa, na kai Pecani, a nodrau koro ko Meri kei Marica na tuakana. 2Ia ko Meri oqo sa lumuta na Turaga e na waiwai, ka solota na yavana e na drau ni uluna, a sa tauvi-mate na ganena ko Lasarusa. 3Oqo sa talaki kina vei koya koi rau na ganena, ka kaya, Kemuni na Turaga, raica, ko koya ko sa lomana sa tauvi-mate.

4Ia ni sa rogoca ko Jisu, sa kaya, Ena sega ni ciba e na mate oqo ko koya, ia ena vakarokorokotaki kina na Kalou, ena vakarokorokotaki talega kina na Luve ni Kalou.

5A sa daulomani Marica ko Jisu, kei tacina, kei Lasarusa. 6Ni sa qai rogoca ko koya ni sa tauvi-mate, sa tiko bogi rua tale e na tikina ko ya. 7Sa oti oqo sa qai kaya vei ira na tisaipeli, Me da lako tale ki Jutia. 8Sa kaya vua ko ira na tisaipeli, Vakavuvuli, era a via vakaviriki iko edaidai walega e na vatu ko ira na kai Jutia; ia ko sa baci lako tale ki na tikina ko ya? 9Sa kaya ko Jisu, Sa sega li ni tinikarua na aua e na dua na siga? kevaka sa lako e dua e na siga, sa sega ni tarabe ko koya, ni sa raica na rarama kei vuravura oqo: 10ia kevaka sa lako e dua e na bogi, sa tarabe ko koya ni sa sega ni tu vua na rarama.

11Sa vosataka na ka oqo ko koya: ia ka oti sa qai kaya vei ira, Sa moce na wekada ko Lasarusa; ia kau sa lako meu vakayadrati koya. 12Sa qai kaya ko ira na nona tisaipeli, Kemuni na Turaga, kevaka sa moce ga ko koya, ena bula. 13Ia sa vosataka na nona mate ko Jisu: ka ra sa nanuma sa vosataka ko koya na vakacegu ni moce. 14Sa qai tukuna vakamacala vei ira ko Jisu, Sa mate ko Lasarusa: 15ia kau sa reki e na vukumudou niu a sega ni tiko kina, mo dou vakabauta; ia me da lako ga vua.

16Sa qai kaya ko Tomasi, o koya sa vakatokai ko Titimo, vei ira na nonai caba na tisaipeli, Me da lako talega, me da mate vata kaya.

17Ni sa lako mai ko Jisu, sa qai kila ni sa koto bogi va ko koya e nai bulubulu.

18A sa voleka ki Jerusalemi ko Pecani, a kena yawa e rua beka na maili. 19Ia sa lewe vuqa na kai Jutia era a lako mai kivei Marica kei Meri, me ra vakacegui rau e na vuku ni ganedrau. 20Ni sa qai rogoca ko Marica sa lako mai ko Jisu, sa laki tavaki koya: ia sa tiko ga e vale ko Meri.

21Sa qai kaya vei Jisu ko Marica, Kemuni na Turaga, kevaka ko ni a tiko eke, sa sega ni ciba na ganequ: 22ia kau sa kila ena solia vei kemuni edaidai na Kalou na ka kecega ko ni sa kerea vua na Kalou. 23Sa kaya vua ko Jisu, Ena tu cake tale na ganemu. 24Sa kaya vua ko Marica, Au sa kila ena tu cake tale ko koya e na siga maimuri era na tu cake tale kina na mate. 25Sa kaya vua ko Jisu, Oi au na vu ni tucake-tale, kei na vu-ni-bula: ko koya sa vakabauti au, kevaka sa mate, ena bula ga: 26ia ko koya yadua sa bula ka vakabauti au, ena sega sara ni mate. Ko sa vakadinata na ka oqo, se segai? 27Sa kaya vua ko koya, Io, na Turaga: au sa vakadinata ni sa Karisito koi kemuni, na Luve ni Kalou, ko koya sa dodonu me lako mai ki vuravura.

28Ia ni sa vosa vakaoqo ko koya, sa lako yani, ka kaciva lo na tacina ko Meri, ka kaya, Sa lako mai nai Vakavuvuli, a sa tarogi iko. 29Ni sa qai rogoca ko koya, sa cavu tu sara, ka lako yani vua. 30(A sa bera ni curu ki na koro ko Jisu, sa tiko ga e na vanua erau sa veitata kina kei Marica.) 31Ko ira na kai Jutia era sa tiko vata kei Meri e vale, ka vakacegui koya, ni ra sa raica sa tu cake sara ko koya, ka lako yani, era sa muri koya, ni ra nanuma, Sa lako ki nai bulubulu ko koya me tagi maikea.

32Ni sa qai yaco ko Meri ki na vanua sa tiko kina ko Jisu, ka raici koya, sa cuva sobu ki na yavana, ka kaya vua, Kemuni na Turaga, kevaka ko ni a tiko eke, sa sega ni ciba na ganequ. 33Ni sa qai raica ko Jisu na nona tagi, kei na nodra tagi na kai Jutia era sa lako vata kaya mai, sa vutugu ko koya e na yalona, a sa rarawa na lomana, 34ka kaya, Evei na vanua dou a buluti koya kina? Era sa kaya vua, Turaga, ni lako mai mo ni raica. 35Sa tagi ko Jisu. 36Era sa qai kaya na kai Jutia, Raica na kena levu ni nona loloma vei koya! 37Ia eso vei ira sa kaya, Sa sega beka ni rawata ko koya oqo, ko koya sa basuka na mata ni mataboko, me lewa talega me kakua ni mate na tamata oqo?

38Sa qai vutugu tale e na yalona ko Jisu, ka lako mai ki nai bulubulu. Ia sa dua na qara-vatu, ka sa kenai sogo e dua na vatu. 39Sa kaya ko Jisu, Dou kauta tani na vatu. Sa kaya vua ko Marica, a gane i koya sa mate, Kemuni na Turaga, sa na bona ko koya: ni sa qai bogi va na nona mate. 40Sa kaya vua ko Jisu, Au a sega li ni kaya vei iko, ni ko na raica na kaukauwa ni Kalou, kevaka ko sa vakabauta? 41Era sa qai kauta tani na vatu. A sa ta cake ko Jisu, ka kaya, Na Tamaqu, au sa vakavinavinaka vei iko ni ko a rogoci au mai: 42ia kau sa kila ni ko sa rogoci au tikoga ia kau sa vosa e na vukudra na tamata sa tiko eke, me ra vakadinata ni ko sa talai au mai. 43Ia ni sa vosa oti vakaoqo, sa kaci e na domo levu, Lasarusa, lako mai. 44Ia ko koya ka mate sa lako mai, ka viviraki tu na ligana kei na yavana e nai sole ni mate: ka viviraki na uluna e na dua nai tavoi. Sa kaya vei ira ko Jisu, Dou sereki koya, ka laiva me lako.

45A ra sa lewe vuqa vei ira na kai Jutia sa lako mai vei Meri, ni ra sa raica na ka sa kitaka ko Jisu, era sa vakabauti koya. 46Ia ko ira eso sa lako yani vei ira na Farisi, ka tukuna vei ira na ka sa cakava ko Jisu.

47Sa qai soqoni vata ko ira na bete levu kei ira na Farisi me ra bosea, a ra sa kaya, A cava mada me da kitaka? ni sa cakava na cakacaka-mana e vuqa na tamata oqo. 48Kevaka eda sa weletaki koya vakaoqo, era na vakabauti koya na tamata kecega: era na qai lako mai na kai Roma, ka kovea na noda koro kei na noda matanitu. 49A sa dua vei ira, ko Kaiafa, ko koya sa bete levu e na yabaki ko ya, sa kaya vei ira, Dou sa sega ni kila e dua na ka, 50se vakananuma ni sa yaga vei keda me mate e dua na tamata e na vukudra na tamata, ka me kakua ni rusa na matanitu taucoko. 51A sa sega ni vosataka na ka oqo ko koya vakataki koya: ia ni sa bete levu e na yabaki ko ya, sa parofisai ko koya ni na mate ko Jisu e na vuku ni matanitu ko ya; 52ka segai e na vuku ni matanitu duaduaga ko ya, me vakasoqoni ira vata talega na luve ni Kalou era sa duiveiseyaki me ra dua bau.

53Mai na siga ko ya era sa qai bosei koya me ra vakamatea. 54O koya oqo sa sega kina ni lako votu tiko ko Jisu e na kedra maliwa na kai Jutia; a sa lako yani maikea ki na vanua sa voleka ki na veikau, ki na dua na koro na yacana ko Ifireimi, a sa tiko kina kei ira na nona tisaipeli.

55A sa voleka na nodra solevu ni lako-sivia na kai Jutia: a ra sa lewe vuqa sa lako cake ki Jerusalemi, mai vanua, ni sa bera na solevu ni lako-sivia, me ra vakasavasavataki ira. 56A ra sa qai vakasaqarai Jisu, ka veivosaki vakai ira ga, ni ra sa tu e na vale ni soro, A cava dou vakananuma? ena lako mai ko koya ki na solevu se segai? 57Ia sa vakarota ko ira na bete levu kei ira na Farisi, kevaka e dua sa kila na vanua sa tiko kina ko koya, me tukuna mai, me ra qai tauri koya.

Currently Selected:

JONI 11: FOV

Highlight

Copy