JEREMAIA 37
37
Sa lako yani nai valu ni kai Kalitia ni ra rogoca sa lako mai nai valu mai Ijipita, ka sa qai talaki ko Setekaia ki vei Jeremaia me masulaka na lewe ni vanua, 1-5. Sa parofisaitaka ko Jeremaia na nodra lako tale mai nai valu ni kai Kalitia, me kabai Jerusalemi, ka rawa, 6-10. Ni sa dro ko Jeremaia, sa tauri, ka yaviti, ka vakacurumi ki na vale ni veivesu, 11-15. Sa vakadinadina vei Setekaia ni na vakabobulataki koya ko tui Papiloni, 16,17. Ni sa vakamamasu ko Jeremaia vua na tui, sa vakarorogo vua e na ka eso e masuta, 18-21.
1A sa buli me tui ko Setekaia na luve i Josaia nai sosomi kei Konaia na luve i Jioiakimi, ko koya ka lesia ko Nepukanesa me tui e na vanua ko Juta. 2Ia ko koya, kei ira na nona tamata, kei ira na lewe ni vanua, era sa sega ni vakarorogo ki na vosa i Jiova, sa vosataka ko Jeremaia na parofita.
3Ia ko Setekaia na tui sa talai Jiukali na luve i Selemaia kei Sefanaia na luve i Meesea na bete vei Jeremaia na parofita, me kaya, Mo masulaki keda mada vei Jiova na noda Kalou. 4Ia ko Jeremaia sa veicuruyaki tiko vei ira na tamata: ni ra sa sega ni vakacurumi koya ki na vale ni veivesu. 5Ia sa qai lako tu mai Ijipita nai valu i Fero: ia ni ra sa rogoca na kenai tukutuku ko ira na kai Kalitia era buku druadrua ni koro mai Jerusalemi era sa cavu tu ka lako tani e Jerusalemi.
6Sa qai yaco vei Jeremaia na parofita, na vosa i Jiova, ka vaka, 7Sa kaya vakaoqo ko Jiova, na Kalou ni Isireli; Dou vosa vakaoqo vei tui Juta, ko koya ka talai kemudou vei au me mai tarogi au; Raica, nai valu i Fero ka lako mai me vukei kemudou, ena lako tale ki Ijipita ki na nodra vanua. 8A ra na lesu tale mai na kai Kalitia, ka veivala kei na koro oqo, ka rawa, ka vakama e na bukawaqa. 9Sa kaya vakaoqo ko Jiova; Dou kakua ni vakacalai kemudou, ka kaya, Era na lako tani vakaidina vei keda ko ira na kai Kalitia: ni ra na sega ni lako tani. 10Ia kevaka dou sa yaviti ira nai valu kecega ni kai Kalitia era veivala kei kemudou, me vo ga ko ira na vuetaki, ke ra na dui tu cake ga na tamata yadua mai na nona vale laca ka vakama na koro oqo e na bukawaqa.
11A sa yaco, ni sa lako tani nai valu ni kai Kalitia mai Jerusalemi e na vuku ni valu i Fero, 12sa qai lako tani e Jerusalemi ko Jeremaia me lako ki na vanua ko Penijamini, me takali tani ko koya maivei ira na tamata. 13Ia ni sa yaco ko koya ki na matamata-ni-koro i Penijamini, sa tiko maikea e dua na kapiteni ni valu sa vakatawa, na yacana ko Irija, na luve i Selemaia, na luve i Enanaia; a sa tauri Jeremaia na parofita, ka kaya, Ko sa vuki vei ira na kai Kalitia. 14A sa kaya ko Jeremaia, Sa lasu; au sa sega ni vuki vei ira na kai Kalitia. Ia sa sega ni vakadinati koya: ka sa tauri Jeremaia ko Irija, ka kauti koya vei ira na turaga. 15A ra sa cudru vei Jeremaia ko ira na turaga, ka yaviti koya, ka biuti koya ki na vale ni veivesu e na vale i Jonacani na vunivola: ni ra sa lesia na vale ko ya me vale ni veivesu.
16Ia ni sa biu ko Jeremaia ki na vale sa keli, kei na kena veiqara, ka sa tiko kina ko Jeremaia ka bogi vuqa: 17sa qai talaki ko Setekaia na tui, ka kauti koya tani maikina: a sa tarogi koya lo ko koya na tui e na nona vale, ka vaka, Sa dua li na vosa maivei Jiova? Ka sa kaya ko Jeremaia, Sa dua: ka sa vaka, Ko na soli ki na liga i tui Papiloni. 18A sa baci kaya tale ko Jeremaia vei Setekaia na tui, A cava na ka ka'u sa cala kina vei kemuni, se vei ira na nomuni tamata turaga se vei ira na tamata oqo, ni dou sa biuti au ki na vale ni veivesu? 19Ia sa evei na nomudou parofita era sa ia na parofisai vei kemudou, ka kaya, Ena sega ni lako mai na tui Papiloni me vala kei kemudou, kei na vanua oqo? 20Ia oqo mo ni rogoca mada, noqu turaga na tui: me vakabau mada na noqu vakamamasu; ka mo ni kakua ni vakasukai au tale ki na vale i Jonacani na vunivola, de'u mate kina. 21Sa qai kaya ko Setekaia na tui me ra kauti Jeremaia ki na lomanibai ni vale ni veivesu, ka solia vua e dua nai buli madrai e na veisiga mai na nodra tiki ni koro na dauvavimadrai, ka me oti sara mada na madrai e na koro. Ka sa tiko ga ko Jeremaia e na lomanibai ni vale ni veivesu.
Currently Selected:
JEREMAIA 37: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
