JEREMAIA 22
22
Na Kalou, sa vakarota vei tui Juta kei ira na nona tamata, me ra veivutuni, 1-9. Na ka ca sa lewai me yacovi Salumi, 10-12; kei Jioiakimi, 13-19; kei Konaia, 20-30.
1Sa kaya vakaoqo ko Jiova; Mo lako sobu ki na vale i tui Juta, ka vosataka maikina na vosa oqo, 2ka kaya, Dou rogoca na vosa i Jiova, ko iko na tui Juta, ka tiko e nai tikotiko i Tevita, ko iko, kei ira na nomu tamata turaga, kei ira na nomu tamata era sa daucuru mai ki na matamata-ni-koro oqo: 3Sa kaya vakaoqo ko Jiova; Dou ia na lewa kei nai valavala dodonu, ka vakabulai koya sa vakacacani mai na liga i koya sa vakacacana: ia dou kakua ni vakararawataki ira na vulagi, kei na luveniyali; kei na yada, ka kakua ni dou vakadavea e na yasana oqo na dra sa sega ni cala. 4Ia kevaka dou sa vakabauta sara na vosa oqo, ena qai curu mai ki na matamata-ni-koro oqo ko ira na tui era sa tiko e nai tikotiko i Tevita, ka sa vodo e na qiqi-vakaturaga kei na ose, ko koya, kei ira na nona tamata turaga, kei na nona tamata. 5Ia kevaka dou na sega ni rogoca na vosa oqo, ka'u sa cavuti au ni'u sa bubului, sa kaya ko Jiova, ni na rusa ga na vale oqo.
6Ni sa kaya vakaoqo ko Jiova ki na vale i tui Juta; Ko iko ko sa vakataki Kiliati na ulu i Lepanoni vei au: ia ka'u na lewai iko mo veikau ga, ka mo veikoro sa sega ni tawa. 7Ia ka'u na lesia eso na kemu dauvakacaca, era sa dui vakaiyaragi: ka ra na taya sobu na nomu sitari vinaka, ka biuta ki na bukawaqa. 8A ra na lako sivita na koro oqo ko ira na lewe ni veivanua e vuqa, ka ra na dui veikayaka ki na kai nona, E na vuku ni cava sa cakacaka kina vakaoqo ko Jiova ki na koro levu oqo? 9Era na qai kaya, Ni ra sa biuta na veiyalayalati i Jiova na nodra Kalou, ka soro vei ira na kalou tani, ka qaravi ira.
10Dou kakua ni tagicaki koya sa mate, se yasovaka: ia dou tagicaki koya sa lako tani yani: ni na sega ni lesu tale mai, se raica na vanua ka sucu kina ko koya. 11Ni sa kaya vakaoqo ko Jiova e na vuku i Salumi na luve i Josaia na tui Juta, ko koya sa lewa mei sosomi kei Josaia na tamana, o koya sa lako tani e na yasana oqo; Ena sega ni lako tale mai ki ke ko koya: 12ni na mate ga e na yasana era sa kauti koya vakabobula kina, ia ena sega ni kunea tale na vanua oqo.
13Ena ca ko koya sa tara na nona vale e nai valavala e sega ni dodonu, kei na nonai taba loma ni vale e cake e na caka cala; ka sa sega ni sauma na cakacaka ni kai nona, ka sa sega ni solia vua nai voli ni nona cakacaka; 14ka sa kaya, Au na tara e dua na noqu vale levu, kei nai taba loma ni vale e cake lelevu, ka sa taya na kena katuba; ka sa botana e cake e na sitari, ka boroi e nai qumu. 15Ko na lewa tiko beka e na vuku ni ko sa viribaiti iko e na sitari? a tamamu, sa sega beka ni kana ka gunu, ka cakava na lewa kei na cakacaka dodonu, ka sa qai vinaka kina ko koya? 16Sa ia na veilewai e na vukudrau na malumalumu kei na dravudravua; ka sa qai vinaka kina ko koya: sa vakaoqo na kilai au, se segai? sa kaya ko Jiova. 17Ia na matamu kei na lomamu sa goleva ga na nomu kocokoco, kei na vakadave dra sa sega ni cala, kei na veivakasaurarataki, kei nai valavala kaukauwa, mo cakava.
18O koya oqo sa kaya kina ko Jiova e na vuku i Jioiakimi na luve i Josaia na tui Juta; Eratou na sega ni tagicaki koya, ka kaya, Ulei na tuakaqu! se, Ulei na ganequ! era na sega ni yasovaki koya, ka kaya, Ulei turaga! se, Ulei na nonai ukuuku! 19Ena buluti ga vaka na asa, ni sa yarataki ka biu ki taudaku ni matamata-ni-koro ko Jerusalemi.
20Mo cabe cake ki Lepanoni, ka tagi; ka tabalaka na domomu mai Pasani, ka tagi mai Aparimi: ni ra sa vakarusai ko ira kecega era a lomani iko. 21Au a vosa vei iko ni ko sa tiko vinaka; ia ko sa kaya, Au na sega ni rogoca. Sa vakaoqo na nomu i valavala ni ko sa gone ka yacova na siga oqo, ni ko sa sega ni rogoca na domoqu. 22A cagi ena kani ira na nomu i vakatawa kecega; ia ko ira sa lomani iko era na la'ki vakabobulataki: ko na qai madua dina ka taqaya e na vuku ni nomu ca kecega. 23Ko iko ka tiko mai Lepanoni, ka cakava na nomu i sova e na sitari, ko na ka lomani dina sara ni sa yacovi iko na rarawa, na yaluma me vaka na yalewa sa taratara!
24 Me vaka na dina ni noqu bula, sa kaya ko Jiova, ke sa mama ni taba e na ligaqu i matau, ko Konaia na luve i Jioiakimi na tui Juta, ke'u sa na cavuti iko tani; 25ia ka'u na soli iko ki na ligadra era sa segata me ra vakamatei iko, ki na ligadra talega ko sa rerevaka, io ki na liga i Nepukatiresa na tui Papiloni, kei na ligadra na kai Kalitia. 26Ia ka'u na biuti iko tani, kei na tinamu ka vakasucumi iko, ki na dua na vanua tani drau a sega ni sucu kina; ia drau na mate ga maikea. 27Ia erau na sega ni lesu yani ki na vanua era sa domona tiko. 28Sa dua beka na matakau beci ka cataki na tamata oqo ko Konaia? se dua na bilo sa sega ni vinakati? a cava era sa biu tani kina ko koya kei na nona kawa, ka vakasevi ki na vanua eratou sa sega ni kila?
29Ko iko, Na vanua, na vanua, na vanua, mo rogoca na vosa i Jiova. 30Sa kaya vakaoqo ko Jiova, Dou vola na tamata oqo me kua na luvena, me tamata sa sega ni yaco e na nona gauna: ni na sega ni yaco e dua na tamata e na nona kawa, me tiko e nai tikotiko i Tevita, ka lewa tale mai Juta.
Currently Selected:
JEREMAIA 22: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
