JEREMAIA 18
18
Me vaka sa veitaliataka na tete na dautuli bilo, sa veitalia vakakina ko Jiova ki na veimatanitu, 1-10. Era na cudruvi ko ira na Juta ni ra sa vuki tani vakalialia, 11-17. Sa masulaki koya ko Jeremaia vua na Kalou ni ra sa vakacacani koya ko ira na Juta, 18-23.
1A vosa ka yaco vei Jeremaia maivei Jiova, ka vaka,
2Mo tu cake, ka lako sobu ki na nona vale na dautuli bilo, ia ka'u na tukuna vei iko maikea na noqu vosa. 3Au a qai lako sobu ki na nona vale na dautuli bilo, ka raica, sa ia tiko e dua na cakacaka e na kenai tutu-wiri. 4A sa cataki na bilo tete sa cakava tiko, e na liga i koya na dautuli bilo: ka sa baci cakava tale me bilo tani, me vaka sa vinaka vua na dautuli bilo me cakava. 5Sa qai yaco vei au na vosa i Jiova, ka vaka,
6Me'u sega beka ni veitalia vei kemudou, na mataqali i Isireli, me vakataki koya na dautuli bilo oqo? sa kaya ko Jiova, Raica, me vaka na tete e na liga i koya na dautuli bilo, sa vakakina koi kemudou e na ligaqu, na mataqali i Isireli. 7A tiki-ni-siga ka'u na vosa e na vuku ni dua na vanua, se dua na matanitu, me'u cavuta, ka basuka, ka vakarusa; 8kevaka ena lesu na vanua ko ya mai na nodra ca, ka'u a lewa me ra ca kina, ka'u na qai veivutunitaka na ca ka'u a nanuma me'u cakava vei ira. 9Ia na tiki-ni-siga ka'u na vosa e na vuku ni dua na vanua, se dua na matanitu, me'u tara, ka tea; 10kevaka ena caka ca e mataqu, me sega ni vakarorogo ki domoqu, ka'u na qai veivutunitaka na vinaka, ka'u a kaya me'u cakava me ra vinaka kina.
11Ia oqo, mo vosa vei ira na Juta, kei na lewe i Jerusalemi, ka kaya, Sa kaya vakaoqo ko Jiova; Raica, au sa tulia na ca kivei kemudou, ia ka'u sa vakananuma e dua na lewa e na vukumudou: dou dui lesu mada mai na nomudou i tovo ca, ka vakavinakataka na nomudou i tovo kei na nomudou i valavala. 12A ra sa kaya, Sa sega sara ni rawa: keimami na muria ga na neimami lewa, ia na nanuma ni lomaimami ca keimami na dui cakava.
13O koya oqo sa kaya kina ko Jiova; Dou tarotaroga mada vei ira na veimatanitu, se ko cei sa rogoca na ka vakaoqo: sa dua na ka rerevaki sara sa cakava ko koya na goneyalewa ni Isireli. 14E dua li me vakalaiva na uca-vulavula ni Lepanoni me kenai sosomi na wai mai na uluvatu ni vanua? se me biu beka na wai liliwa sa drodro tu me kenai sosomi na wai ni dua na tikina tani? 15ka ni ra sa guilecavi au na noqu tamata, ia era sa vakama kina na ka boi vinaka ki na ka lasu, ka ra sa vakatarabetaki ira e na nodra sala, ka sa biu ga nai lakolako makawa, me ra lako vakatikitiki e na sala sa sega ni buluti; 16me ra vakavuna na kena vakalalataki na nodra vanua, ka me vakasiusiutaki ka sega ni mudu; ko ira kece era lako voli yani era na kidacalataka, ka kurea na uludra. 17Ka'u na vakatolosevi ira e na mata ni meca me vaka e na cagi mai na tu-i-cake; ka'u na vakanadakui ira e na siga ni nodra rarawa ka sega ni vakanamata vei ira.
18Era sa qai kaya, Me da mai bukia na vere kei Jeremaia; ni sa sega ni yali na vunau mai vua na bete, se nai vakavuvuli mai vua na vuku, se na vosa mai vua na parofita. Me da mai vakacataki koya e na yameda, ia me da kakua ni vakarorogo ki na dua na nona vosa.
19Ni golevi au mai, Jiova, ka rogoca na domodra era veileti kei au. 20Me saumi beka na vinaka e na ca? ka ni ra kelia nai keli me'u mate kina. Mo ni nanuma ni'u a tu e matamuni me vosa vinaka e na vukudra, ka me'u saumaka tani na nomuni cudru mai vei ira. 21O koya mo ni solia kina na luvedra me ra viakana, ka vakadavea na kedra dra e na kaukauwa ni seleiwau; ia me yali vei ira na watidra na luvedra, ka me ra yada talega; ka me ra vakamatei na nodra tagane; ia na nodra cauravou, me ra mate e nai seleiwau e nai valu. 22Me rogo mai na nodra veivale na tagi, ni kemuni sa vakauta nai valu me sikiti ira: ni ra sa kelia nai keli me rawai au; ia era sa vunia nai cori me tacori kina na yavaqu. 23Io koi kemuni, Jiova, ko ni sa kila kece na nodra veretaki au me'u mate: mo ni kakua ni buluta na nodra caka cala, ia na nodra i valavala ca mo ni kakua ni bokoca tani mai na matamuni, ia me ra vakabalei sobu ga e matamuni; mo ni vakayacora vei ira e na gauna ni nomuni cudru.
Currently Selected:
JEREMAIA 18: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
