IPERIU 2

Sa vakatakila ko koya ni sa vinaka me da vakabauta sara na ka sa vakatakila ko Jisu, ni sa turaga na lotu, a sa mate me bula na tamata kecega, 1-18.

1O koya oqo, e dodonu me da vakananuma vakalevu sara kina na ka eda a rogoca, de dua na siga e yali kina vei keda. 2Ia kevaka ka vakadinadinataki na vosa era a tukuna ko ira na agilose, ka sa saumi vakadodonu nai valavala ca kei na talaidredre kecega; 3eda na bula vakaevei koi keda, kevaka eda sa vakaweleweletaka na bula levu oqo; o koya sa vakatekivuna na Turaga me tukuna, ka vakadinadinataka mai kivei keda ko ira era a rogoca; 4ni sa vakadinadina tiko vei ira na Kalou, e nai vakatakilakila eso kei na ka e veivakurabuitaki eso kei na cakacaka mana e vuqa, kei nai votavota ni Yalo Tabu, me vaka na lomana?

5Ni sa sega ni solia ko koya vei ira na agilose me ra lewa na vuravura ena muri mai, o koya keitou sa vosataka. 6A sa vakatakila e dua e na dua na tikina, ka kaya, A cava na tamata, mo nanumi koya kina? Se na luve ni tamata, mo dautalevi koya kina? 7O sa buli koya me uasivi sobu vakalailai ga vei ira na agilose: O sa vakaisalataka e nai ukuuku kei na vakarokoroko, Ka lesia me lewa na cakacaka ni ligamu: 8O sa vakamalumalumutaka na ka kecega me tu e ruku ni yavana. Ia ni sa vakamalumalumutaka vua na ka kece me lewa kina, sa sega ni vo e dua na ka me sega ni vakamalumalumutaki vua. Ia eda sa sega ni raica edaidai ni sa vakamalumalumutaki vua na ka kecega me lewa kina. 9Ia eda sa raici Jisu ga, sa caka me uasivi sobu vakalailai ga vei ira na agilose, sa qai vakaisalataki e nai ukuuku kei na vakarokoroko, e na vuku ni sa vosota oti na mate; me sa mate ko koya e na vuku ni tamata kecega, me vaka na loloma ni Kalou. 10Ni sa kilikili kei koya, sai taukei ni ka kecega, ka sa vakavuna na ka kecega, ni sa vakauta na luvena e lewe vuqa ki na vanua vakaiukuuku, me vakarautaki koya e na dauvosota me sa nodra vu ni bula.

11Ni sa dua bauga na Tamadra, ko koya sa vakasavasavataka kei ira era sa vakasavasavataki: ia e na vuku ni ka oqo sa sega kina ni madua ko koya me vakatokai ira me ra tacina; 12ni sa kaya, Au na tukuna na yacamuni vei ira na taciqu; E na kedra maliwa nai soqosoqo lewe ni lotu ka'u na vakarokorokotaki kemuni e na sere. 13Sa kaya tale, Au na vakararavi vei koya. Sa kaya talega, Raici au, kei ira na gone sa solia mai vei au na Kalou. 14Ia ni sa lewe vata ka dra vata ko ira na gone, sa yaco talega ko koya me vakakina; me vakamalumalumutaki koya kina sa lewa na mate, o koya na tevoro, e na vuku ni mate; 15me sereki ira talega era vaka na bobula e na nodra bula voli taucoko ni ra sa rerevaka na mate. 16Ni sa sega sara ni mai vukei ira na agilose ko koya; sa mai vukei ira ga na kawa i Eparaama. 17O koya oqo sa kilikili kina kei koya, me yaco me vakataki ira na wekana e na ka kecega, me bete levu yalovinaka ka lomadina e na veika ni Kalou, me sorovaka na nodra i valavala ca na tamata. 18Ni sa vosota na ka ca ko koya, ni sa dauveretaki, sa qai rawata kina me vukei ira era sa dauveretaki.

Currently Selected:

IPERIU 2: FOV

Highlight

Copy