NAI VAKATEKIVU 6
6
Ai valavala ca ni kai vuravura, sa kaya na Kalou me vakarusai ira, 1-8. Sa vakasalataki ko Noa, me taya e dua na waqa me bula kina, 9-22.
1A sa yaco, ni ra sa tubu na tamata me ra lewe vuqa mai e dela i vuravura, a sa sucu na luvedra yalewa, 2sa qai raici ira na nodra goneyalewa na tamata ko ira na luve ni Kalou ni ra sa matavinaka; a ra sa la'ki vakawati kei ira kecega oqo era sa vinakata.
3A sa kaya ko Jiova, A noqu Yalo Tabu ena sega ni veileti tiko kei na tamata me sa sega ni mudu, ka ni sa vakalewe talega ko koya: ia na nona gauna ena dua tale na drau ka ruasagavulu na yabaki.
4A sa tiko e vuravura e na gauna ko ya eso na tamata yagolevu sara; emuri, era sa qai veiyacovi kei ira na nodra goneyalewa na tamata ko ira na luve ni Kalou, a ra sa vakasucu, ia na luvedra oqo era sa yaco me ra tamata kaukauwa, a ra sa tamata rogo eliu.
5A sa raica ko Jiova ni sa ka levu nai valavala ca ni tamata e vuravura, io sa ca walega e na veisiga kecega nai naki kecega kei na nanuma ni lomana. 6A sa veivutuni ko Jiova ni sa bulia na tamata e vuravura, a sa rarawa kina na lomana. 7A sa kaya ko Jiova, Au na vakarusa mai na vuravura na tamata ka'u sa bulia; io na tamata kei na manumanu e yavai va, kei na ka sa qasi voli, kei na manumanu vuka; ni'u sa veivutuni ni'u sa buli ira. 8Ia ko Noa sa kune loloma e na mata i Jiova.
9Oqo nai tukutuku kei Noa: a tamata yalododonu ko Noa, ka sega ni cala e na nonai tabatamata, a rau a daulako vata kei na Kalou ko Noa. 10A sa sucu na luve i Noa e le tolu na tagane, ko Semi, ko Ame, kei Jefeca. 11A sa ka vakasisila ko vuravura e na mata ni Kalou, a sa sinai e nai valavala kaukauwa ko vuravura. 12A sa raici vuravura na Kalou, ka raica, sa vakasisila; ni sa ka vakasisila na nodra i valavala na tamata kecega e vuravura.
13A sa kaya vei Noa na Kalou, Sa rairai mai ki vei au nai otioti ni tamata kecega; ni ra sa vakasinaiti vuravura e nai valavala kaukauwa; ka raica, ka'u na vakarusai ira vata kei vuravura. 14Mo taya e dua na nomu waqa e na kau kofera: mo cakava me so na loqi e na waqa, ka boroya eloma, e taudaku talega, e na drega. 15Ia mo cakava vakaoqo: A kena balavu ni waqa e tolu na drau na kiupiti, a kena raraba e limasagavulu na kiupiti, a kena cecere e tolusagavulu na kiupiti. 16Mo cakava e dua na katuba e na waqa, ka vakaotia me dua na kiupiti na kena raraba ki cake; ia na katuba ni waqa mo cakava e na yasa ni waqa: ia mo cakava na loma ni waqa me taba tolu. 17Ka raica, koi au, ka'u sa kauta mai e dua na waluvu ki vuravura, me vakawabokotaka na ka kecega e ruku i lomalagi sa tu kina nai cegu ni bula; ia ena mate na ka kecega sa tiko e vuravura. 18Ia ka'u na vakataudeitaka vei iko na noqu veiyalayalati: ko na vodo ki na waqa; ko iko, kei na luvemu tagane, kei na watimu, kei na watidratou na luvemu. 19Ka rua na manumanu e na mataqali manumanu kecega e na ka kecega sa bula, mo vakavodoka ki loma ni waqa, ka mo vakabulai ira vata kei iko; me dua na ka tagane ka dua na ka yalewa: 20a manumanu vuka me vaka na kedra mataqali, kei na manumanu e yavai va me vaka na kedra mataqali; a ka kecega sa qasi voli e vuravura me vaka na kedra mataqali; sa yarua e na mataqali kecega era na curu kivei iko mo vakabulai ira. 21Ia mo kauta vata eso e na kakana kecega sa daukani, ia mo kumuna vata vei iko; ia ena kemu kakana kei na kedra talega.
22A sa cakava ko Noa me vaka na ka kecega sa vakarota vua na Kalou, io, sa cakava vakakina.
Currently Selected:
NAI VAKATEKIVU 6: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
