NAI VAKATEKIVU 35

Sa lako ki Peceli ko Jekope me soro, 1-7. Sa mate ko Tepora, 8. Sa vosavakalougatataki Jekope tale ko Jiova, 9-15. Sa mate ko Repeka, 16-20. Ko ira na luve i Jekope, 23-26. Sa mate ko Aisake, 27-29.

1A sa kaya vei Jekope na Kalou, Cavu tu, ka mo lako cake ki Peceli, ka tiko maikea: ka cakava maikea e dua nai cabocabo-ni-soro vua na Kalou, ko koya ka rairai vei iko ni ko a drotaka na mata i Iso na tuakamu. 2A sa kaya ko Jekope vei ira na nona lewe-ni-vale, kei ira kecega era tiko kaya, Dou biuta tani na kalou ni kai tani sa tiko kei kemudou, dou savasava talega, ka vakaisulu e nai sulu tani: 3ia tou yavala mada, tou lako cake ki Peceli; ka'u na cakava maikea e dua nai cabocabo-ni-soro vua na Kalou, ko koya ka rogoci au e na siga ka'u a rarawa kina, ka tiko kei au e na sala ka'u a lako kina. 4A ra sa solia vei Jekope na kalou kecega ni kai tani sa tu e ligadra, kei na sau sa tu e daligadra; a sa vunia ko Jekope e ruku ni oki ka tu mai Sikemi. 5A ra sa lako tu yani: a sa kania na veikoro sa voliti ira na rere vua na Kalou, a ra sega kina ni vakasavi ira na luve i Jekope.

6A sa lako mai ko Jekope ki Lusa, mai na vanua ko Kenani, [ko ya ko Peceli,] ko koya kei ira kece na tamata era tiko vata kaya. 7A sa cakava kina e dua nai cabocabo-ni-soro, ka vakayacana na yasana ko ya ko Eli-Peceli: ni sa rairai vua maikea na Kalou, ni sa dro tani ko koya mai vua na tuakana.

8A sa ciba ko Tepora nai mei i Repeka, a sa bulu ki ra, ki cake ko Peceli, e na ruku ni dua na oki: a sa vakatokai na yacana ko Aloni-pakuci.

9A sa rairai tale na Kalou kivei Jekope, ni sa lako mai Petani-erama, a sa vosavakalougatataki koya. 10A sa kaya vua na Kalou, Ko Jekope na yacamu; ia ena sega ni vakatokai tiko na yacamu ko Jekope, ko Isireli ga na yacamu: a sa vakatoka na yacana ko Isireli. 11Sa kaya talega vua na Kalou, Koi au na Kalou Kaukauwa: mo tubu, ka mo lewe vuqa mai; e dua na matanitu, io na matanitu e vuqa, ena tubu maivei iko, ka na lako mai na tolomu na turaga lelevu; 12a vanua talega ka'u a solia vei Eparaama kei Aisake, au na solia vei iko; vei ira talega na nomu kawa, ka'u na solia na vanua ko ya.

13A sa lako cake maivua na Kalou, mai na tikina ka vosa kina vua. 14A sa vakaduria na duru ko Jekope e na tikina ka vosa kina vua ko koya, io na duru vatu: a sa livia ki delana nai madrali liviraki, sa livia talega ki delana na waiwai: 15a sa vakatoka ko Jekope na yaca ni yasana ka vosa kina vua na Kalou ko Peceli.

16A ra sa lako tu yani mai Peceli; a ra sa bera tiko ni yaco ki Efiraca: a sa vakasucu ko Rejeli, a sa rarawa vakalevu ni vakasucu. 17Ia ni sa taratara tiko ka rarawa vakalevu, sa kaya vua ko koya na vu-ni-kalou, Kakua ni rere; ena dua tale na luvemu tagane oqo. 18A sa yaco ni sa lako na yalona, [ka ni sa ciba ko koya,] sa vakayacani koya ko Peni-oni: ia ko tamana sa vakatokai koya ko Penijamini. 19A sa ciba ko Rejeli, a sa bulu e na sala ki Efiraca, [ko ya ko Pecileema]. 20A sa vakaduria e dua na duru ko Jekope, e na nonai bulubulu: ko ya na duru ni bulubulu i Rejeli, ka yacova na gauna oqo.

21A sa lako tu yani ko Isireli, ka sa sivia na vale cecere mai Eteri ka birika kina na nona vale laca.

22A sa yaco ni sa tiko ko Isireli e na vanua ko ya, sa lako ko Rupeni ka moceri Pila na watina lailai i tamana: a sa rogoca ko Isireli. Ia ko ira na luve i Jekope era tagane sa le tinikarua: 23Na luve i Lia; ko Rupeni, na ulumatua i Jekope, kei Simioni, kei Livai, kei Juta, kei Isakari, kei Sepuloni: 24ia na luve i Rejeli; ko Josefa, kei Penijamini: 25kei na luve i Pila, na vada i Rejeli; ko Tani, kei Nafitalai: 26kei na luve i Silipa, na vada i Lia; ko Kata, kei Aseri: ko ira oqo na luve i Jekope sa sucu mai Petani-erama.

27A sa lako mai ko Jekope kivei Aisake na tamana mai Mamire, ki na koro i Aripa, [ko ya ko Epironi,] ka dautiko vulagi kina ko Eparaama kei Aisake. 28Ia na gauna i Aisake e dua na drau ka walusagavulu na yabaki. 29A sa ciba ko Aisake, ka mate yani, a sa toki yani kivei ira na kai nona, ni sa qase ka vuqa na nona yabaki: a rau sa buluti koya na luvena ko Iso kei Jekope.

Currently Selected:

NAI VAKATEKIVU 35: FOV

Highlight

Copy