NAI VAKATEKIVU 24
24
Sa tala e dua ko Eparaama me qara e dua me wati i Aisake, 1-11. Sa masu na tamata me yaco na ka sa talai kina, 12-14. A sa yaco, 15-60. Sa lako kei na tamata ko Repeka, a sa yaco me wati i Aisake, 61-67.
1A sa qase mai ko Eparaama, sa vuqa na nona yabaki: a sa dauvakalougatataki Eparaama ko Jiova e na ka kecega. 2A sa kaya ko Eparaama vua na nona kai matana o koya sa qase e nona vale, ko koya ka lewa na nona ka kecega, Mo daramaka mada na ligamu ki ruku ni sagaqu; 3ia ka'u na vakabubuluitaki iko mo bubului mada vei Jiova, ko koya na Kalou ni lomalagi, kei na Kalou ni vuravura, ka mo kakua kina ni kauta e dua me watina na luvequ maivei ira na goneyalewa ni Kenani, ko ira ka'u tiko e na kedra maliwa: 4ia mo lako ki na noqu vanua, vei ira na wekaqu, ka kauta maikina e dua me watina na luvequ ko Aisake.
5A sa kaya vua na tamata ko ya, Ia de sa na sega ni via muri au mai ki na vanua oqo na yalewa: me'u kauta tale vakaidina beka na luvemu ki na vanua ko a lako maikina?
6A sa kaya vua ko Eparaama, Mo qarauni iko mo kakua ni kauta tale ki kea na luvequ. 7Ko Jiova, ko koya na Kalou ni lomalagi, ko koya ka kauti au tani mai na vale nei tamaqu, kei na nodra vanua na wekaqu, ia ko koya ka vosa vei au, ka bubului vei au, ka kaya, Au na solia na vanua oqo vei ira na nomu kawa; ko koya ena tala na nona agilose me liutaki iko; ia ko na kauta maikina e dua me watina na luvequ. 8Ia kevaka sa na sega ni via muri iko mai na yalewa, ko na sega ni cala e na vuku ni nomu bubului vei au: ia mo kakua ga ni kauta tale ki kea na luvequ. 9A sa daramaka na ligana na tamata ki ruku ni saga i Eparaama na nona turaga, a sa bubului vua e na vuku ni ka ko ya.
10Ia na tamata ko ya ka kauta e tini na kameli maivei ira na kameli ni nona turaga, a sa lako; ni sa lewa ko koya nai yau kecega ni nona turaga; a sa ia, ka lako ki Mesopotemia, ki na koro i Neori. 11A sa lewa na nona kameli me ra tekiduru sobu e nai bili ni koro, mai na dua nai keli wai, ni sa yakavi mai, io e na gauna era sa daulako yani kina na yalewa me taki wai.
12A sa kaya, Kemuni Jiova, na Kalou i Eparaama na noqu turaga, au masuti kemuni, mo ni vakayacora, na ka ka'u sa talai kina e na siga oqo, ka caka vakayalololoma vei Eparaama na noqu turaga: 13raica, au sa wavu tu mai nai keli wai; a ra na lako mai na nodra goneyalewa na lewe ni koro me taki wai: 14ia me yaco, na goneyalewa ka'u na kaya vua, Mo tauca sobu mada na nomu saqa, me'u gunu; ka sa na kaya ko koya, Mo gunu, ka'u na vagunuvi ira talega na nomu kameli: me sai koya mada ko ni sa lesia me nona na nomuni tamata ko Aisake; ia ka'u na kila kina ni kemuni sa caka vakayalololoma vua na noqu turaga.
15A sa yaco, ni sa vosa tiko koya, raica, sa lako mai, a sa colata tu na nona saqa, ko Repeka, na luve i Pecueli, o koya na luve i Milika, na wati i Neori, na tuakai Eparaama. 16A sa matavinaka sara na goneyalewa oqo, a goneyalewa dina, sa sega na tagane erau veiyacovi kaya; a sa lako sobu ki nai keli-wai, ka vakasinaita na nona saqa, ka cabe tale mai. 17A sa cici na tamata me la'ki tavaki koya, a sa kaya, Mo vagunuvi au mada vakalailai e na wai mai na nomu saqa ne? 18A sa kaya ko koya, Ni gunu saka ga, noqu turaga: a sa vakusarawa ni tauca sobu ki na ligana na nona saqa, ka vagunuvi koya. 19Ia ni sa vagunuvi koya oti, sa kaya, Au na taki vei ira talega na nomu kameli, ka me ra mamau mada. 20A sa vakusarawa ko koya, ka sova maca na nona saqa ki loma ni gunugunu ni manumanu, ka cici tale ki nai keli-wai me taki, a sa taki vei ira kecega na nona kameli. 21A sa kurabuitaki koya na tamata, ka tiko lo, ka me kila se sa vakayacora na ka sa talai koya kina ko Jiova, se segai.
22Ia ni ra sa gunu oti na kameli, sa taura na tamata e dua na sau koula, na kena bibi e dua na afa sikeli, ka rua na qato ni ligana, e tini na sikeli koula na kedrau bibi: 23a sa kaya, A luve i cei ko iko? mo tukuna mada mai vei au. Sa dua beka na tikina e na vale nei tamamu me keitou moce kina, se segai? 24A sa kaya vua, Koi au na luve i Pecueli, ko koya na luvedrau ko Milika kei Neori. 25Sa kaya talega vua, Sa levu vei keitou na co ni sila, kei na kedra na manumanu, kei na tikina mo dou moce kina. 26A sa cuva na tamata, ka vakarokoroko vei Jiova: 27A sa kaya, Me vakavinavinakataki ko Jiova na Kalou ni noqu turaga ko Eparaama, ko koya sa vakayacora tiko na nona loloma kei na nona vosa dina vua na noqu turaga: koi au, ni'u a lako tu e na sala, sa tuberi au ko Jiova ki na nodra vale na wekana na noqu turaga.
28A sa cici yani na goneyalewa, ka tukuna vei ira na lewe-ni-vale i tinana na ka oqo. 29A sa dua na gane i Repeka, na yacana ko Lepani: a sa cici yani vua na tamata ko Lepani, ki nai keli-wai. 30Ia ni sa kunea na sau, kei na qato e na liga i ganena, ka rogoca na vosa i Repeka na ganena, ni sa kaya, Sa vosa vakaoqo vei au na tamata; sa qai lako ko koya vua na tamata; ka raica, sa tu vata kei na kameli mai nai keli-wai. 31A sa kaya ko koya, Mo ni curu mai koi kemuni sa kalougata vei Jiova; a cava ko ni sa tu kina e tautuba? ni'u sa vakarautaka oti na vale, kei na tikina me nodra na kameli. 32A sa curu ki vale na tamata; a sa luvata nai vodovodo ni kameli, a sa solia na co ni sila kei na kedra na kameli, kei na wai me vui kina na yavana, kei na yavadratou na tamata eratou tiko kaya. 33A sa tau e matana na kakana: ka sa kaya ko koya, Au na sega ni kana, au na tukuna mada na ka ka'u sa talai mai kina. A sa kaya ko Lepani, Mo tukuna mada.
34A sa kaya ko koya, Koi au na tamata nei Eparaama: 35a sa vakalougatataka vakalevu na noqu turaga ko Jiova, a sa tubu me turaga yaco: a sa solia vua na qele ni sipi eso, kei na qele ni pulumokau eso, kei na siliva, kei na koula, kei na tamata, kei na vada, kei na kameli, kei na asa: 36ia ko Sera, na watina na noqu turaga, sa vakasucuma e dua na luvena tagane na noqu turaga ni sa qase mai: a sa solia vua na nona ka kecega. 37A sa vakabubuluitaki au na noqu turaga, ka sa kaya, Mo kakua ni kauta vua na luvequ e dua me watina maivei ira na goneyalewa ni kai Kenani, a nodra vanua ka'u sa tiko kina: 38ia mo lako ga vei ira na noqu mataqali, ki na vale nei tamaqu, ka kauta mai e dua me watina na luvequ. 39Ka'u a mani vaka vua na noqu turaga, De sa sega ni via muri au na yalewa. 40A sa kaya vei au ko koya, Ko Jiova, ko koya ka'u sa daubula voli e matana, ena tala na nona agilose kei iko, ka vakayacora na ka ko sa talai kina; ia ko na kauta mai e dua me watina na luvequ, mai na noqu mataqali, kei na vale nei tamaqu: 41ia ko na qai sega ni cala e na vuku ni nomu bubului vei au, ni ko sa yaco vei ira na noqu mataqali; ia kevaka era sa sega ni solia e dua vei iko, ko na qai sega ni cala e na nomu bubului vei au. 42Ia ka'u a lako mai edaidai ki nai keli-wai, ka'u a qai kaya, I Jiova, na Kalou ni noqu turaga ko Eparaama, kevaka ko ni sa vakayacora na ka ka'u sa talai mai kina: 43raica, au sa tu mada mai nai keli-wai; ia me yaco, na goneyalewa ka sa lako mai me taki, ka'u sa kaya vua, Mo vagunuvi au mada vakalailai e na wai mai na nomu saqa; 44ka sa kaya vei au ko koya, Mo gunu mada ko iko, ka'u na vagunuva talega na nomu kameli; me sai koya ga na yalewa sa lesia ko Jiova me nona na luve ni noqu turaga. 45Ni'u sa sega ni vosa oti e lomaqu, raica, sa lako mai ko Repeka, ka colata tu na nona saqa; a sa lako sobu ki nai keli-wai, ka taki mai: ka'u a qai kaya vua, Mo vagunuvi au mada. 46A sa kusarawa ko koya, ka tauca sobu na nona saqa a sa kaya, Mo gunu; ka'u na vagunuva talega na nomu kameli. Au a qai gunu, a sa vagunuva talega na kameli ko koya. 47Au a qai taroga, ka vaka, A luve i cei ko iko? A sa kaya, Koi au na luve i Pecueli, ko koya ka luve i Neori, kei Milika: au a qai daramaka na sau ki na ucuna, kei na qato ki na ligana. 48Au a qai cuva, ka vakarokoroko vei Jiova, ka vakavinavinaka vei Jiova, na Kalou i Eparaama na noqu turaga, ko koya ka tuberi au e na sala dodonu, me'u kauta na luvena yalewa na tuakana na noqu turaga me wati ni luvena. 49Ia oqo, kevaka dou sa via caka vakayalololoma ka dina vua na noqu turaga, dou tukuna vei au: ia kevaka e segai, dou tukuna vei au; ka me'u gole kina ki nai matau, se ki nai mawi.
50Erau a qai vosa ko Lepani kei Pecueli, ka kaya, A ka oqo sa vakayacora ko Jiova; e dredre ni keitou vosataka vei iko na ka ca se na ka vinaka: 51Raica, sa tiko ko Repeka; mo kauta, ka lako, me watina na luve ni nomu turaga, me vaka sa kaya ko Jiova. 52Ia ni sa rogoca na nodrau vosa na tamata nei Eparaama, sa cuva ki na qele vei Jiova. 53Ia na tamata ko ya sa tara mai na ka sa caka e na siliva, kei na ka sa caka e na koula, kei nai sulu, ka solia kivei Repeka: sa solia talega na ka talei vua na ganena kei na tinana.
54A ratou a kana ka gunu, ko koya kei na tamata eratou tiko kaya, ka moce: a ratou sa tu cake e na mataka, a sa kaya ko koya, Mo dou talai au mada vua na noqu turaga. 55A rau sa kaya ko ganena kei tinana, Me tiko bogi vica mada vei keitou na goneyalewa, ke bogi tini walega; me qai lako ko koya. 56A sa kaya vei iratou ko koya, Dou kakua ni tarovi au, ni sa vakayacora ko Jiova na ka ka'u sa talai kina; dou talai au mada me'u lako vua na noqu turaga. 57A ratou sa kaya, Keitou na kacivi koya mada na goneyalewa, ka tarogi koya. 58A ratou a kacivi Repeka, ka kaya vua, Ko na lako kei na tamata oqo, se segai? A sa kaya ko koya, Au na lako. 59A ratou sa qai talai Repeka na wekadratou, kei na nonai mei, kei koya na tamata nei Eparaama, kei iratou na nona tamata. 60A ratou sa vosavakalougatataki Repeka, ka kaya vua, Ko iko sa wekai i keitou, me ra oba vakaudolu na nomu kawa, ia me ra rawa na matamata-ni-koro ni nodra meca ko ira na nomu kawa.
61A sa cavu tu ko Repeka, kei iratou na nona goneyalewa a ratou sa vodoka na kameli, ka muria na tamata: a sa kauti Repeka na tamata, ka lako yani. 62Ia ko Aisake sa lako mai na sala sa lako ki nai keli-wai ko Leai-roi; ni sa tiko mai na vanua ki na ceva. 63A sa lako yani ko Aisake ki na veiwere e na yakavi me vakanananu: a sa ta cake, ka rai yani, ka raica, sa lako mai na kameli. 64A sa ta cake ko Repeka, ia ni sa kunei Aisake sa qai sobu mai na kameli. 65Ni sa taroga oti ko koya vua na tamata, Ko cei na tamata ko ya sa lako mai e na veiwere me mai tavaki kedatou? A sa kaya na tamata, Ko ya na noqu turaga: a sa qai taura ko koya na pulou ni matana, ka puloutaki koya. 66A sa tukuna vei Aisake na tamata na ka kecega ka cakava ko koya. 67A sa kauti Repeka ko Aisake ki na vale laca i Sera na tinana, a sa qai yaco me watina; a sa lomani koya: a sa vakacegui ko Aisake ni sa mate ko tinana.
Currently Selected:
NAI VAKATEKIVU 24: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
