NAI VAKATEKIVU 21

Sa sucu ko Aisake, 1-8. Sa vakatalai tani ko Eka kei Isimeli, a sa voleka ni mate e na viagunu, a sa vakaraitaki na wai, 9-21. Sa ia na veiyalayalati kei Eparaama ko Apimeleki, 22-34.

1A sa talevi Sera ko Jiova me vaka ka kaya eliu, a sa cakacaka vei Sera ko Jiova me vaka na nona vosa. 2A sa kunekune ko Sera, ka vakasucuma vei Eparaama e dua na luvena tagane ni sa qase mai ko koya, e na gauna ka loku, ka sa vosa kina vua na Kalou. 3Ia ko Eparaama sa vakayacana na luvena ko Aisake o koya ka vakasucuma ko Sera. 4A sa cilivi Aisake na luvena ko Eparaama, ni sa qai bogi walu, me vaka ka vakarota vua na Kalou. 5A sa dua na drau na yabaki i Eparaama, ni sa sucu na luvena ko Aisake. 6A sa kaya ko Sera, Sa vakadredretaki au na Kalou; era na dredre vata kei au ko ira kece era na rogoca. 7Sa kaya talega ko koya, Ko cei me kaya vei Eparaama eliu, ena vakasucuma na gone ko Sera? ni'u sa vakasucuma e dua na luvena tagane ni sa qase mai ko koya.

8A sa tubu na gone, ka sa kali: a sa cakava e dua na magiti levu ko Eparaama e na siga ka kali kina ko Aisake.

9Ia ko Sera sa raica na luvedrau ko Eka na yalewa ni Ijipita, kei Eparaama, ni sa veivakalialiai tiko. 10A sa kaya kina vei Eparaama ko koya, Mo vakatala yani na yalewa bobula oqo kei na luvena: ni na sega ni taukei vata na luvena na yalewa bobula oqo kei na luvequ ko Aisake. 11A sa ka ni rarawa sara vei Eparaama na ka oqo, ka e na vuku ni luvena. 12A sa kaya vei Eparaama na Kalou, Me kakua ni ka ca vei iko e na vuku ni gone, e na vuku talega ni nomu yalewa bobula: na ka kecega sa kaya vei iko ko Sera, mo vakayacora; ni na vakatokai me nomu na kawa i Aisake ga: 13ia ko koya talega na luvena na yalewa bobula ka'u na vakatubura me matanitu, ni sa nomu kawa. 14A sa sou e na mataka ko Eparaama, ka kauta na kakana, kei na saqa wai, ka solia vei Eka, ka viritaka ki na usouso ni domona, kei na gone, ka vakatala yani: a sa lako yani ko koya, a sa lako sese voli mai na loma ni vanua mai Pieri-sepa.

15A sa maca na saqa, a sa biuta na gone ko koya ki na dua na ruku ni kau: 16a sa la'ki tiko me donuya, sa vakabeka na kena yawa sa vanataki e dua na gasau: ni sa kaya ko koya, Me'u kakua ni raica ni ciba na gone. A sa tiko donuya, a sa tabalaka na domona, ka tagi. 17A sa rogoca na domo ni gone na Kalou; a sa kaci vei Eka na agilose ni Kalou mai lomalagi, a sa kaya vua, A cava sa manati iko, Eka? kakua ni rere; ni sa rogoca na Kalou na domo ni gone e na tikina sa koto kina: 18mo tu cake, mo keveta cake na gone, ka taura e ligamu; ni'u na vakamatanitulevutaki koya. 19A sa vakamatamatuataki koya na Kalou, a sa kunea e dua nai keli wai; a sa lako ko koya, ka vakasinaita na saqa e na wai, ka vagunuva na gone. 20A sa tiko kei na gone na Kalou; a sa tubu ko koya, ka tiko mai na loma ni vanua, ka yaco me tamata dauvanavana. 21A sa tiko mai na lekutu mai Perana: a sa kauta vua ko tinana e dua me watina mai na vanua ko Ijipita.

22Ia e na gauna ko ya, erau a vosa vei Eparaama ko Apimeleki, kei Fikoli na kapiteni ni nonai valu, ka rau kaya, Sa tiko vata kei iko na Kalou e na ka kecega ko sa cakava: 23o koya mo bubului eke vua na Kalou ni ko na sega ni valavala vakailasu vei au, se vua na luvequ, se vua na makubuqu: mo kitaka ga vei au, ki na vanua talega ko sa tiko vulagi kina, me vaka na loloma ka'u sa kitaka vei iko. 24A sa kaya ko Eparaama, Au na bubului vakakina. 25A sa vunauci Apimeleki ko Eparaama e na vuku ni keli wai, era kovea na tamata nei Apimeleki. 26A sa kaya ko Apimeleki, Au sa sega ni kila se ko cei sa kitaka na ka oqo: ia ko iko talega ko a sega ni mai tukuna vei au, ia ka'u a sega talega ni rogoca eliu au kila edaidai ga. 27A sa kauta na sipi kei na pulumokau ko Eparaama, ka solia vei Apimeleki; a rau a veiyalayalati koi rau. 28A sa kauta e vitu na lami yalewa ko Eparaama me tu vakai iratou. 29A sa kaya vei Eparaama ko Apimeleki, Sa vakaevei na lami yalewa e vitu oqo, ko sa kauta me tu vakai iratou? 30A sa kaya, Mo kauta mada vei au na lami yalewa e vitu, me noqu i vakadinadina, ni ka'u sa kelia nai keli-wai oqo. 31O koya sa vakatokai kina na tikina ko ya ko Pieri-sepa; ni rau a bubului ruarua. 32A rau sa ia na veiyalayalati mai Pieri-sepa: sa qai cavu tu ko Apimeleki, kei Fikoli na kapiteni ni nonai valu, a rau a lesu tale ki na vanua ko Filisitia. 33A sa tea mai Pieri-sepa e dua na kau ko Eparaama, ka masuta maikina na yaca i Jiova, na Kalou e Sega ni mudu. 34A sa vuqa na siga sa tiko kina ko Eparaama e na vanua ko Filisitia.

Currently Selected:

NAI VAKATEKIVU 21: FOV

Highlight

Copy