NAI VAKATEKIVU 15

Sa rairai vei Eparama ko Jiova, ka yalataka vua na kawa levu, 1-5. A sa vakabauta na Kalou ko Eparama, 6. Sa ia na veiyalayalati kaya ko Jiova, me nona ko Kenani, 7-21.

1Sa oti na ka oqori sa vosa vei Eparama ko Jiova e na rai votu, ka kaya, Mo kakua ni rere, Eparama: koi au na nomu i sasabai, ia na kemui sau ena ka levu sara. 2A sa kaya ko Eparama, kemuni na Turaga ko Jiova, a cava na ka ko ni na solia vei au, ni'u na mate ka sa sega na luvequ, ia ko koya sa na vakatawa na noqu vale ko Eliesa ko koya na kai Tamasiko? 3Sa kaya talega ko Eparama, Raica, ko ni sa sega ni solia vei au na kawa: ka sa na taukena emuri na noqu ka e dua sa sucu wale e noqu vale. 4Ka raica, sa yaco vua na vosa i Jiova, ka kaya, Ena sega ni taukena emuri na nomu ka ko koya oqo; ia ko koya ga ko sa na vakatubura ena taukena na nomu ka. 5A sa kauti koya ki tautuba, ka kaya, Mo raici lomalagi mada, ka wilika na kalokalo kevaka ko sa wilika rawa. A sa kaya vua, Sa na vakakina na nomu kawa.

6A sa vakabauti Jiova ko koya; a sa wilika vua ko koya me nonai valavala dodonu.

7A sa kaya vua, koi au ko Jiova, ko koya ka kauti iko tani mai Uri mai Kalitia, ka me'u solia vei iko na vanua oqo mo taukena. 8A sa kaya ko koya, Kemuni na Turaga ko Jiova, me'u kila vakacava ni'u na taukena? 9A sa kaya vua, Mo kauta me noqu e dua na luve ni pulumokau yalewa sa tolu na kena yabaki, ka dua na me yalewa sa tolu na kena yabaki, ka dua na sipi tagane sa tolu na kena yabaki, ka dua na soqe, ka dua na luve ni ruve. 10A sa kauta na ka kecega oqo ko koya, ka wasea rua, a sa virikotora e dua na tikina vaka, ka dua na tikina vaka, me veidonui: ia ka sa sega ni wasea na manumanu vuka. 11Ia ni sa vuka sobu mai na manumanu kila me kania na yagodra sa mate, sa vakasava ko Eparama. 12Ia ni sa dromu sobu na mata-ni-siga, sa biti Eparama e dua na moce bibi: ka raica, sa yacovi koya e dua na butobuto loaloa e rerevaki sara. 13A sa kaya ko koya vei Eparama, Mo kila vakaidina ni na tiko vulagi na nomu kawa e na vanua sa sega ni nodra, ka ra na vakabobulataki ira, ia era na vakararawataki ira, ka va na drau na yabaki: 14ia na matanitu talega era na qarava ka'u na lewa: sa oti, era na qai lako tani mai, ka na levu na nodra i yau: 15ia ko iko, ko na lako e na vakacegu vei ira na tamamu; ko na buluti ni ko sa qase sara mai: 16ia e na kenai kava ni tabatamata era na lesu tale mai ki ke; ni sa sega ni sinai edaidai na nodra i valavala ca na luve i Amori. 17Ia ni sa dromu na mata-ni-siga a sa butobuto, raica, sa dua na miqa sa kubou tu, ka dua na cina sa caudre tiko sa lako e na maliwa ni tiki ni manumanu ko ya.

18E na siga ko ya sa ia na veiyalayalati kei Eparama ko Jiova, a sa kaya, Au sa solia na vanua oqo vei ira na nomu kawa, mai na uciwai ni Ijipita ka yacova na uciwai levu, na uciwai ko Uferetisi: 19ko ira na Kenaiti, kei na Kenisaiti, kei na Katimonaiti, 20kei na Itaiti, kei na Perisaiti, kei na luve i Refei, 21kei na Amoraiti, kei na kai Kenani, kei na Kakesaiti, kei na Jepusaiti.

Currently Selected:

NAI VAKATEKIVU 15: FOV

Highlight

Copy