NAI VAKATEKIVU 11

Sa vosa vata ko vuravura, 1,2. Era segata me ra tara e dua na vale cecere: sa vakataqayataka na vosa ko Jiova, 3-9. A kawa i Semi, 10-26. A kawa i Tira, kei na nona lako ki Karana, 27-32.

1A sa gusu vata ko vuravura taucoko, a sa dua vata ga na kena vosa. 2A sa yaco, ni ra a lako vaka ki na tu-i-cake, era kunea e dua na buca mai na vanua ko Saina; a ra sa tiko kina.

3A ra sa veikayaka vakataki ira, Tou ia mada, tou cakava na vatu-buli, ka tavuna vakavinaka. Ka sai sosomi ni vatu na vatu-buli, ka sai sosomi ni lase na qele dregadregata. 4A ra kaya, Tou ia mada, tou tara e dua na noda koro, ka dua na vale cecere, me yacovi lomalagi na delana; tou cakava me rogo kina na yacada, de sa da dui vakasevi yani e dela i vuravura taucoko. 5A sa lako sobu ko Jiova me raica na koro kei na vale cecere, era tara na tamata. 6A sa kaya ko Jiova, Raica, sa dua vata ga ko ira na tamata, a sa dua vata ga na vosa vei ira kecega; a ra sa vakatekivu ni kitaka na ka oqo: ia ena qai sega e dua na ka me tarovi ira e na ka era nakita: 7tou ia mada, tou lako sobu, ka vakasesea na nodra vosa, me ra kakua kina ni veikilaki vosa. 8A sa dui vakasevi ira maikina ko Jiova, ki dela i vuravura taucoko: a ra sa cegu ni tara tiko na koro. 9O koya sa vakatokai kina na yacana ko Pepeli; ni sa vakasesea maikea na vosa ni vuravura taucoko ko Jiova: a sa dui vakasevi ira maikina ko Jiova, ki dela i vuravura taucoko.

10Oqo na kawa i Semi: Sa dua na drau na yabaki i Semi, a sa qai sucu na luvena ko Afakisati, ni sa oti na waluvu ka yabaki rua: 11a sa bula tiko ko Semi, ni sa sucu ko Afakisati, ka lima na drau na yabaki, a sa sucu eso tale na luvena tagane kei na luvena yalewa. 12A sa bula ko Afakisati ka tolusagavulu ka lima na yabaki, a sa qai sucu ko Sela na luvena: 13a sa bula tiko ko Afakisati, ni sa sucu ko Sela, ka va na drau ka tolu na yabaki, a sa sucu eso tale na luvena tagane kei na luvena yalewa. 14A sa bula ko Sela ka tolusagavulu na yabaki, a sa qai sucu na luvena ko Iperi: 15a sa bula tiko ko Sela ni sa sucu ko Iperi, ka va na drau ka tolu na yabaki, a sa sucu eso tale na luvena tagane kei na luvena yalewa. 16A sa bula ko Iperi ka tolusagavulu ka va na yabaki, a sa qai sucu ko Peleki na luvena: 17a sa bula tiko ko Iperi, ni sa sucu ko Peleki, ka va na drau ka tolusagavulu na yabaki, a sa sucu eso tale na luvena tagane kei na luvena yalewa. 18A sa bula ko Peleki ka yabaki tolusagavulu, sa qai sucu ko Riu na luvena: 19a sa bula tiko ko Peleki, ni sa sucu ko Riu, ka rua na drau ka ciwa na yabaki, a sa sucu eso tale na luvena tagane kei na luvena yalewa. 20A sa bula ko Riu ka tolusagavulu ka rua na yabaki, a sa qai sucu ko Seruke na luvena: 21a sa bula tiko ko Riu, ni sa sucu ko Seruke, ka rua na drau ka vitu na yabaki, a sa sucu eso tale na luvena tagane kei na luvena yalewa. 22A sa bula ko Seruke ka tolusagavulu na yabaki, a sa qai sucu ko Neori na luvena: 23a sa bula tiko ko Seruke, ni sa sucu ko Neori, ka rua na drau na yabaki, a sa sucu eso tale na luvena tagane kei na luvena yalewa. 24A sa bula ko Neori ka ruasagavulu ka ciwa na yabaki, a sa qai sucu ko Tira na luvena: 25a sa bula tiko ko Neori, ni sa sucu ko Tira, ka yabaki e dua na drau ka tinikaciwa, a sa sucu eso tale na luvena tagane kei na luvena yalewa. 26A sa bula ko Tira ka vitusagavulu na yabaki, a sa qai sucu ko iratou na luvena ko Eparama, kei Neori, kei Erani.

27A sa vakaoqo na kawa i Tira: Sa sucu na luve i Tira ko Eparama, ko Neori, kei Erani; a sa sucu ko Loti na luve i Erani. 28A sa mate ko Erani e na mata i tamana ko Tira, e na vanua ka sucu kina, io mai Uri mai Kalitia. 29A rau a qai vakawati ko Eparama kei Neori, a yaca ni wati i Eparama ko Serai: ia na yaca ni wati i Neori ko Milika, na luve i Erani, ko koya na tama i Milika, kei Isika. 30A sa yava ko Serai; sa sega na luvena. 31A sa kauti Eparama na luvena ko Tira, kei Loti na luve i Erani, na makubuna, kei Serai na vugona, a wati i Eparama na luvena; a ratou a lako tani vata mai Uri mai Kalitia, ka me ratou lako ki na vanua ko Kenani: a ratou a yaco ki Karana, a ratou a tiko kina. 32Ia na yabaki i Tira sa rua na drau ka mani lima na yabaki: a sa ciba ko Tira mai Karana.

Currently Selected:

NAI VAKATEKIVU 11: FOV

Highlight

Copy