EFESO 5

Sa vakarota vei ira ko koya me ra dauloloma, 1,2; me ra biuta kece sara na nodra i valavala makawa, me tu ga vei ira na vua ni Yalo Tabu, 314. Me ra yalomatua ka sinai e na Yalo Tabu, 1521. Me ra veilomani dina na veiwatini, 2233.

1O koya oqo mo dou qai vakadamurimuria na Kalou, me vakataki ira na gone ni toko; 2ka dou ia tikoga nai valavala ni loloma, me vaka sa loloma talega na Karisito vei kemudou, a sa soli koya e na vukuda mei madrali kai soro vua na Kalou me ka boi vinaka.

3Ia na dauyalewa, kei na ka kecega sa velavela, kei na daukocokoco, me kakua ni cavuti e na kemudou maliwa, me vaka sa kilikili kei ira era sa lotu; 4me kakua talega na ka vakasisila, se na veivosaki lialia, se na veiwali, a ka oqori sa sega ni kilikili: me ia ga na vakavinavinaka. 5Ni dou sa kila na ka oqo, ena sega sara na nonai votavota e na matanitu nei Karisito kei na Kalou, e dua na daudara, se dua sa velavela, se dua na daukocokoco, ni sa dauqarava na kalou lasu ko koya oqo. 6Me kakua ni vakacalai kemudou e dua e na vosa walega: ni sa veika oqo sa yaco kina na cudru ni Kalou kivei ira sa dautalaidredre. 7O koya mo dou qai kakua ni malele vata kei ira. 8Ni dou a butobuto eliu, ia dou sa qai rarama e na Turaga; mo dou ia tiko nai valavala ni gone ni rarama: 9(ni sa vua ni rarama nai valavala vinaka kecega kei nai valavala dodonu kei na ka dina:) 10ni dou vakatovolea na ka sa vinaka vua na Turaga. 11Ia dou kakua ni malele vata kei ira sa dauia nai valavala butobuto sa sega ni yaga, ka dou vunauca ga. 12Ni sa ka e veivakamaduataki me vosataki na veika era sa daukitaka vuni. 13Ia na ka kecega oqori ni sa vunauci sa vakavotui e na rarama; ni sa rarama na ka kecega sa vakavotui. 14O koya oqo sa kaya kina ko koya, O iko sa moce mo yadra mai, ka tu cake mai na mate, ena qai vakararamataki iko na Karisito.

15O koya mo dou qai raici kemudou vinaka, mo dou i valavala vakayalomatua, mo dou kakua ni vakataki ira na lialia, mo dou vakataki ira ga na vuku, 16mo dou volia me nomudou na gauna, ni sa ca na veisiga oqo. 17O koya mo dou qai kakua ni sesewa, mo dou kila ga na loma ni Turaga. 18Ia dou kakua ni mateni e na waini, ni sa ia kina na ka vakasisila; dou vakasinaiti ga e na Yalo Tabu; 19ka dou veivosaki vakai kemudou e na same kei na sere kei na meke vakayalo, ka dou seretaka na sere e laga vinaka e na yalomudou vua na Turaga: 20ka dou vakavinavinaka tiko e na vuku ni ka kecega vua na Kalou kei na Tamada e na yaca ni noda Turaga ko Jisu Karisito; 21ka dou dui veivakamalumalumutaki kemudou vakai kemudou e na rere vei Karisito.

22Oi kemudou na yalewa vakawati, mo dou dui vakamalumalumutaki kemudou vua na watimudou, me vaka vei koya na Turaga.

23Ni sa ulu ni watina na tagane, me vaka sa ulu ni soqosoqo lewe ni lotu na Karisito, ia nai Vakabula talega ni yago ko koya. 24Ia me vaka sa malumalumu nai soqosoqo lewe ni lotu vei Karisito, me ra vaka talega kina na yalewa vei ira na watidra e na ka kecega.

25Oi kemudou na tagane vakawati, lomani ira na watimudou, me vaka sa lomana nai soqosoqo lewe ni lotu na Karisito, a sa soli koya e na vukuna; 26me vakasavasavataka ka derea ni sa vuya e na wai kei na vosa, 27me vakarairaitaka kina vei koya mei soqosoqo lewe ni lotu e serau sara, me kakua ni tauvi-duka, se sasalukiluki, se dua na ka e vakakina; me savasava ka sega na tikina e ca. 28E kilikili kei ira na tagane me ra lomani ira vakakina na watidra, me vaka na yagodra dina. O koya sa lomana na watina sa lomani koya vakai koya. 29Ni sa sega e dua sa cata na yagona dina; ia sa vakania ka maroroya, me vaka sa ia talega ko Karisito ki nai soqosoqo lewe ni lotu: 30ni da sa tiki ni yagona. 31Na ka oqo ena biuta kina na tagane na tamana kei na tinana, a rau na dua vata kei na watina, a rau na lewe dua bauga. 32Sa ka levu na ka vuni oqo: ia kau sa vosataki Karisito kei nai soqosoqo lewe ni lotu. 33Ia mo dou dui lomana yadua na watina me vakataki koya; ia na yalewa, me vakarokorokotaka na watina.

Currently Selected:

EFESO 5: FOV

Highlight

Copy