CAKACAKA 18

Sa lako ki Korinica ko Paula, a sa vunau kina, ka daucakacaka, 1—6. Sa vakacegui koya na agilose, 7—11. Era sa kauti koya na kai Jutia vei Kalio, 12—17. Sa lakova na veikoro eso ko Paula, 18—23. Sa dauvunau ko Apolosa, 24—28.

1Sa oti na veika oqo, sa lako tani e Aceni ko Paula, ka yaco ki Korinica; 2a sa kunea kina e dua na kai Jutia a yacana ko Akuila, sa sucu mai Ponito, a sa qai lako walega mai Itali, kei na watina ko Pirisila; ni sa vakarota ko Kilotiu me lako tani e Roma na kai Jutia kecega; a sa lako vei rau ko koya. 3Ka ni ratou sa matai vata, sa tiko vata kei rau ko koya, ka cakacaka: ni ratou sa matai ni vale-laca. 4A sa vunau e na vale ni lotu e na veisiga ni vakacecegu kecega, a sa rawai ira na kai Jutia kei ira na kai Kirisi. 5Ia ni sa lako mai Masitonia ko Sailasa kei Timoci, sa vakauqeti ko Paula, a sa dautukuna vei ira na kai Jutia ni sa Karisito ga ko Jisu.

6Ni ra sa qai vorata ka vosa vakacaca sa kuretaka na nonai sulu ko koya, ka kaya vei ira, Ena baleti kemudou ga na nomudou rusa; au sa sega ni cala kina: ka’u sa qai lako vei ira na veimatanitu tani.

7A sa lako tani eke, ka curu ki na nona vale e dua, a yacana ko Taito Jusitu, a tamata sa lotu tiko vua na Kalou, a sa voleka ki na vale ni lotu na nona vale. 8A sa vakabauta na Turaga ko Kirisipo, na turaga ni vale ni lotu, kei ira kecega na nona lewe-ni-vale; a sa lewe vuqa na kai Korinica ni ra sa rogoca, era sa vakabauta, ka ra sa papitaisotaki. 9Sa qai kaya vei Paula na Turaga e na bogi e na raivotu, Kakua ni rere, mo vosa ga, ka kua ni ko galu; 10ni ka’u sa tiko vata kei iko, ka na sega e dua me sagai iko me vakacacani iko: ni sa lewe vuqa na noqu tamata e na koro oqo. 11A sa tiko maikea ko koya ka yabaki dua ka vula ono, ka dauvakavulici ira e na vosa ni Kalou.

12Ia ni sa turaga mai Akaia ko Kalio, era sa lomavata na Jiu me ra tauri Paula vakaukauwa, a ra sa kauta ki na mata ni tikotiko ni veilewai, 13ka kaya, Ko koya oqo sa vakavulici ira na tamata me ra masu vakatani vua na Kalou ka sega ni vaka na vunau. 14Ia ni sa vakarau vosa ko Paula, sa kaya vei ira na Jiu ko Kalio, Oi kemudou na Jiu, kevaka sa dua na ka e kovei, se dua na ca levu, e dodonu me’u vosoti kemudou: 15ia kevaka e veiletitaki nai vakavuvuli, kei na yaca eso, kei na nomudou vunau, dou lewa ga; ni ka’u sa sega ni via lewa na veika vakaoqo. 16A sa vakasevi ira tani e na mata ni tikotiko ni veilewai. 17A ra sa qai tauri Sosiceni na turaga ni vale ni lotu, ka vaculaka e na mata ni tikotiko ni veilewai. A sa weletaka na ka kecega oqo ko Kalio.

18Sa oti oqori sa tiko ga ko Paula ka dede, a sa qai tatau vei ira na veiwekani, ka soko ki Siria, ko iratou vata kaya ko Pirisila kei Akuila; a sa tasia mada na uluna mai Kenikiria: ni sa bubului eliu ko koya. 19A sa yaco ki Efeso, ka laivi rau kina: a sa curu ko koya ki na vale ni lotu, ka vakavulici ira na Jiu. 20Ia ni ra sa masuta me tiko dede vei ira, sa sega ni vinakata ko koya; 21ia sa tatau ga vei ira, ka kaya, Au na lesu tale mai vei kemudou, kevaka e vinakata na Kalou, a sa soko tani e Efeso ko koya. 22Ia ni sa sobu ki Sisaria, ka lako cake, ka veikidavaki kei ira nai soqosoqo lewe ni lotu, sa qai lako sobu ki Anitioki. 23Ia ni sa tiko dede vakalailai, sa qai lako tani, a sa lakova vakadodonu voli na vanua ko Kalatia, kei Firijia, a sa vakataudeitaki ira kecega era sa lotu.

24A sa dua na Jiu na yacana ko Apolosa, sa sucu mai Alekisadria, a tamata sa dauvosa vakavuku, a sa rawata sara me tukuna nai Vola Tabu ko koya, sa tadu ki Efeso. 25Sa vakatavulici ko koya oqo e nai vakavuvuli ni Turaga, ia sa katakata na yalona, a sa tukuna ko koya ka vunautaka vagumatua na veika ni Turaga, ia sa kila ga na papitaiso i Joni. 26A sa vakatekivu me vosa doudou e na vale ni lotu: ia ni rau sa rogoca ko Akuila kei Pirisila, erau sa kauta vei rau, a rau sa tukuna vakadodonu cake vei koya nai vakavuvuli ni Kalou. 27Ia ni sa via lako yani ki Akaia ko koya, era sa vakauqeti koya kina ko ira na veiwekani ka ra sa volavola, ka masuti ira sa lotu me ra vakacegui koya: ia ni sa yaco kina ko koya, sa vukei ira vakalevu era sa vakabauta e na loloma: 28ni sa ka gumatua sara na nona rawai ira votu na Jiu, e na veileti kei ira, ka sa vakatakila mai nai Vola Tabu ni sa Karisito ko Jisu.

Currently Selected:

CAKACAKA 18: FOV

Highlight

Copy